ଛାଡ଼ିଲା ବନ୍ୟା, ବଢ଼ିଲା ଚାଷୀଙ୍କ ଦୁର୍ଦ୍ଦଶା

ଭବାନୀପାଟଣା,୨୯ା୯(ଉତ୍ତମ କୁମାର ଦାଶ): କଳାହାଣ୍ଡି ଜିଲାରେ ଗତ ସପ୍ତାହରେ ହାତୀ ଓ ତେଲ ନଦୀରେ ବନ୍ୟା ଆସିବାରୁ ନଦୀ କୂଳରେ ଥିବା ଶତାଧିକ ଏକର ଧାନଚାଷ ନଷ୍ଟ ହୋଇଯାଇଛି। ଗତ ମାସରେ ଚାଷୀ ଧାନରୁଆ କାମ ସାରି ଦ୍ୱିତୀୟ ଥର ଖତ ସାର ମଧ୍ୟ ପ୍ରୟୋଗ କରିଥିଲେ।

ହେଲେ ଲଗାଣ ବର୍ଷା ଯୋଗୁ ହାତୀ ଓ ତେଲ ନଦୀର ଜଳସ୍ତର ବୃଦ୍ଧି ପାଇଥିଲା। ପରବର୍ତ୍ତୀ ସମୟରେ ଏହା ବନ୍ୟା ରୂପ ନେଇଥିଲା, ଯାହାର ସିଧାସଳଖ ପ୍ରଭାବ ପଡ଼ିଥିଲା ଚାଷୀଙ୍କ ଉପରେ।

ବନ୍ୟା ଛାଡ଼ିବା ପରେ ଏବେ ଚାଷୀଙ୍କ ଦୁର୍ଦ୍ଦଶା ବଢ଼ିଛି। ଅନେକ ଚାଷଜମି ବାଲିଚର ହେବା ସହ ଧାନ ଫସଲ ପଚି ନଷ୍ଟ ହୋଇଯାଇଛି। କିଛି ଜମିରେ ଏବେ ମଧ୍ୟ ବନ୍ୟାପାଣି ଲହଡ଼ି ମାରୁଥିବା ଦେଖିବାକୁ ମିଳିଛି। ଏହାକୁ ନେଇ ଚାଷୀ ମୁଣ୍ଡରେ ହାତଦେଇ ବସିଛି। ବିଶେଷକରି ହାତୀ ନଦୀରେ ବନ୍ୟା ଯୋଗୁ ଜୁନାଗଡ଼ ବ୍ଲକ୍‌ର ମୂର୍ଲାପଦର, ପରିଆଗାଁ, ଚିଙ୍ଗୁଡ଼ିସର, ପାଣିଗାଁ, ଝାରବନ୍ଧ, ପରିଆଗଡ଼, ଭଇଁରିଗୁଡା, ବାଗଡୁଙ୍ଗରୀ, ମିଚାଗାଁ, ଚିଚୈଗୁଡ଼ା ତଲମଲା, ମସିଗାଁ ଓ ସାହାଜକନା ପ୍ରଭୃତି ଗ୍ରାମର ପ୍ରାୟ ୮ ଶହ ଏକରରୁ ଊଦ୍ଧର୍‌ବ ଧାନ ଚାଷ ସମ୍ପୂର୍ଣ୍ଣ ନଷ୍ଟ ହୋଇଯାଇଥିବା ଚାଷୀ ଅଭିଯୋଗ କରିଛନ୍ତି। ହାତୀ ନଦୀରେ ଏହା ତୃତୀୟ ବନ୍ୟା ଥିଲା।

ଧାରକରଜ କରି ୩ଥର ଚାଷୀ ଜମିରେ ଧାନ ରୋଇଥିବାବେଳେ ବନ୍ୟା ସେମାନଙ୍କ ସ୍ବପ୍ନକୁ ଉଜାଡ଼ିଦେଇଛି। ସେହିପରି ବନ୍ୟା ସମୟରେ ଇନ୍ଦ୍ରାବତୀ କର୍ତ୍ତୃପକ୍ଷ ମଙ୍ଗଳପୁର ବ୍ୟାରେଜରୁ ୫ଟି ଗେଟ୍‌ ଖୋଲିଦେବା ପରେ ତଳମୁଣ୍ଡରେ ବନ୍ୟା ପାଣି ମାଡିଆସିବାରୁ ଧାନ ଫସଲ ଆମର ନଷ୍ଟ ହୋଇଗଲା। ଯଦି ସରକାର କ୍ଷତିପୂରଣ ନ ଦିଅନ୍ତି ତଥା ଇନ୍‌ସ୍ୟୁରାନ୍ସ କମ୍ପାନୀ ବୀମା ଟଙ୍କା ପ୍ରଦାନ ନ କରନ୍ତି ପରିବାର କେମିତି ଚଳିବ ବୋଲି ଅତି କ୍ଷୋଭର ସହ ସ୍ଥାନୀୟ ଚାଷୀ ହିମାଂଶୁ ପୂଜାରୀ, ଭବାନୀ ବିଶ୍ୱାଳ, ଗଦାଧର ବିଶ୍ୱାଳ, ଈଶ୍ୱର ପୂଜାରୀ ପ୍ରମୁଖ ପ୍ରକାଶ କରିଛନ୍ତି। ପ୍ରଶାସନ ତୁରନ୍ତ କ୍ଷତିଗ୍ରସ୍ତ ଚାଷଜମିର ଆକଳନ କରି କ୍ଷତିପୂରଣ ଦେବାକୁ ଦାବି କରିଛନ୍ତି।