ସିରିଜ୍ ବିଜୟ ଲକ୍ଷ୍ୟରେ ଭାରତ, ପୁଣି କୋହଲିଙ୍କ ଉପରେ ପ୍ରଶଂସକଙ୍କ ନଜର
ଗୁଆହାଟୀ,୨୯ା୯: ଭାରତ-ଓ୍ବେଷ୍ଟଇଣ୍ଡିଜ ମଧ୍ୟରେ ବୁଧବାର ଚଳିତ ଦିନିକିଆ ସିରିଜ୍ର ଦ୍ୱିତୀୟ ମ୍ୟାଚ୍ ଖେଳାଯିବ। ପ୍ରଥମ ମ୍ୟାଚ୍କୁ ବିରାଟ କୋହଲି ଓ ଶୁବମନ ଗିଲ୍ଙ୍କ ଶତକ ବଳରେ ଅତି ସହଜରେ ଜିତି ନେଇଥିବା ଭାରତୀୟ ଦଳ ଏହି ମ୍ୟାଚ୍ରେ ସିରିଜ୍କୁ ଆଗୁଆ ଜିତିବା ଲକ୍ଷ୍ୟରେ ରହିବ। ପ୍ରଶଂସକଙ୍କ ନଜର ପୁଣିଥରେ କୋହଲିଙ୍କ ଉପରେ ରହିବ, ଯିଏକି ଥିରୁଭାନନ୍ତପୁରମ୍ରେ ରେକର୍ଡ ଭଙ୍ଗକାରୀ ଶତକ ହାସଲ କରିଥିଲେ।
ଘରୋଇ ଦଳର ବ୍ୟାଟିଂ ଲାଇନ୍ଅପ୍ ଖୁବ୍ ଶକ୍ତିଶାଳୀ ଜଣାପଡ଼ୁଥିବା ବେଳେ ପେସ୍ ବୋଲିଂ କମ୍ବିନେଶନ ଦଳ ପାଇଁ ପ୍ରଥମ ମ୍ୟାଚ୍ରେ ଚିନ୍ତାର କାରଣ ପାଲଟିଥିଲା। ଯଶ୍ପ୍ରୀତ ବୁମ୍ରା ଓ ହାର୍ଦ୍ଦିକ ପାଣ୍ଡ୍ୟାଙ୍କ ଅନୁପସ୍ଥିତିରେ ଭାରତୀୟ ପେସରମାନେ ଫେଲ୍ ମାରିଥିବା ବେଳେ ବାମହାତୀ ରିଷ୍ଟ ସ୍ପିନର କୁଲଦୀପ ଯାଦବ ଦଳକୁ ଆବଶ୍ୟକ ସମୟରେ ବ୍ରେକ୍ ଥ୍ରୁ ପ୍ରଦାନ କରିଥିଲେ।
ଅଭିଜ୍ଞ ମହମ୍ମଦ ସିରାଜଙ୍କୁ ଚୂଡ଼ାନ୍ତ ଏକାଦଶରେ ସାମିଲ ନ କରି ଅଲ୍ରାଉଣ୍ଡର ନୀତୀଶ କୁମାର ରେଡ୍ଡୀଙ୍କ ସହ ବୋଲିଂ ଓପନ୍ କରିବା ନିଷ୍ପତ୍ତି ଅନେକଙ୍କ ଦୃଷ୍ଟି ଆକର୍ଷଣ କରିଥିଲା। ଇଞ୍ଜୁରିରୁ ପ୍ରତ୍ୟାବର୍ତ୍ତନ କରିଥିବା ରେଡ୍ଡୀ ରିଦିମ ଓ ଆକୁରେସି ସହ ବୋଲିଂ କରିବାରେ ସଂଘର୍ଷ କରିଥିଲେ।
ଫଳରେ ୩୨ ବର୍ଷୀୟ ଓ୍ବେଷ୍ଟଇଣ୍ଡିଜ୍ ଓପ୍ନର ଜଷ୍ଟିସ ଗ୍ରିଭ୍ସ ସେଟ୍ ହେବା ସହ କ୍ୟାରିୟରର ପ୍ରଥମ ଶତକ ହାସଲ କରିଥିଲେ। ହାର୍ଦ୍ଦିକ ଓ ବୁମ୍ରାଙ୍କ ଅନୁପସ୍ଥିତି ଭାରତ ଦଳକୁ ତା’ର ପେସ୍ କମ୍ବିନେଶନରେ ପରୀକ୍ଷା କରିବାକୁ ଅନୁମତି ଦେଉଛି। ଏଥିଯୋଗୁ ଜମ୍ମୁ-କଶ୍ମୀର ପେସର ଅକିନ ନବିଙ୍କୁ ପଦାର୍ପଣ ସୁଯୋଗ ଦିଆଯାଇପାରେ।
ପ୍ରଥମ ଦିନିକିଆରେ ଭାରତର ଟପ୍ ଅର୍ଡର ଖୁବ୍ ଭଲ ପ୍ରଦର୍ଶନ କରିଥିଲା। କୋହଲି ୭୪ ବଲ୍ରେ ଶତକ ପୂରଣ କରିବା ସହ ସଚିନ ତେନ୍ଦୁଲକରଙ୍କ ପରେ ଦ୍ୱିତୀୟ ବ୍ୟାଟର ଭାବେ ଦିନିକିଆରେ ୧୫ ହଜାର ରନ ପୂରଣ କରିଥିଲେ। କୋହଲିଙ୍କ ଫର୍ମ ଏହି ସିରିଜ୍ରେ କୌତୂହଳ ଭରି ଦେଇଛି।
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
