ଜୈବ ବିବିଧତା ସୁରକ୍ଷା ନେଇ…

ଭଞ୍ଜନଗର, ୧୮/୯ (ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗରସ୍ଥିତ କବିସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟର ଉଦ୍ଭିଦ ବିଜ୍ଞାନ ବିଭାଗ ପକ୍ଷରୁ ଶୁକ୍ରବାର ପ୍ରଥମ ବର୍ଷର ଛାତ୍ରୀଛାତ୍ରଙ୍କୁ ସ୍ୱାଗତ ସହ ପାଠଚକ୍ର ଅନୁଷ୍ଠିତ ହୋଇଯାଇଛି। ମହାବିଦ୍ୟାଳୟ ଅଧ୍ୟକ୍ଷ ଡ. ଗଗନ ବିହାରୀ ପୁରୋହିତ ସଭାରେ ଅଧ୍ୟକ୍ଷତା କରି ପାଠଚକ୍ରକୁ ଉଦ୍‌ଘାଟନ କରିଥିଲେ।

ଏହି ଅବସରରେ ଛାତ୍ର ବିଶାଳ କୁମାର ବିଷୋୟୀ ‘ଭାରତର ଜୈବ ବିବିଧତାର ଉତ୍ତପ୍ତ କ୍ଷେତ୍ର’ ଶୀର୍ଷକ ସନ୍ଦର୍ଭ ପାଠ କରିଥିଲେ। ଜୈବ ବିବିଧତାର ଉତ୍ତପ୍ତ କ୍ଷେତ୍ରଗୁଡ଼ିକ ପୃଥିବୀର ମୂଲ୍ୟବାନ ଜୈବ ସମ୍ପଦର ଆଧାର। ତେଣୁ ଏହି ଅଞ୍ଚଳଗୁଡ଼ିକର ଆବାସସ୍ଥଳ ସୁରକ୍ଷା, ବନ ସଂରକ୍ଷଣ ଓ ଜୈବ ସମ୍ପଦର ସ୍ଥାୟୀ ବ୍ୟବହାର ଅତ୍ୟନ୍ତ ଆବଶ୍ୟକ ବୋଲି ଆଲୋଚନା ହୋଇଥିଲା।

ହିମାଳୟ, ଇଣ୍ଡୋ-ବର୍ମା, ପଶ୍ଚିମଘାଟ-ଶ୍ରୀଲଙ୍କା ଏବଂ ଆଣ୍ଡାମାନ-ନିକୋବର ଦ୍ୱୀପପୁଞ୍ଜ ଭଳି ଅଞ୍ଚଳରେ ଅନେକ ପ୍ରଜାତିର ପ୍ରାଣୀ ଓ ଉଦ୍ଭିଦ ଲୋପ ପାଇବା ଚିନ୍ତାଜନକ ବିଷୟ ବୋଲି ବକ୍ତାମାନେ କହିଥିଲେ। ଜୈବ ବିବିଧତାର ସୁରକ୍ଷା କରା ନ ଗଲେ ଆଗାମୀ ଦିନରେ ମାନବ ସମାଜ ମଧ୍ୟ ବିଭିନ୍ନ ବିପଦର ସମ୍ମୁଖୀନ ହେବ ବୋଲି ସେମାନେ ମତବ୍ୟକ୍ତ କରିଥିଲେ। ଉକ୍ତ ଅଞ୍ଚଳ ଓ ସେଠାକାର ପ୍ରାଣୀ ଏବଂ ଉଦ୍ଭିଦଙ୍କ ସୁରକ୍ଷା ପାଇଁ ବିଭିନ୍ନ ପଦକ୍ଷେପ ନେବାର ଆବଶ୍ୟକତା ରହିଛି ବୋଲି ଆଲୋଚନାରେ ମତ ପ୍ରକାଶ ପାଇଥିଲା।

ବିଭାଗୀୟ ମୁଖ୍ୟ ଅଧ୍ୟାପିକା ସୁନିତା ରାଣୀ ଖଣ୍ଡୁଆଳ ସ୍ୱାଗତ ଭାଷଣ ଦେଇଥିଲେ। ଅନ୍ୟମାନଙ୍କ ମଧ୍ୟରେ ପ୍ରଶାସନିକ ଅଧିକାରୀ କୁମୁଦ ଚନ୍ଦ୍ର ମହାପାତ୍ର, ବିତ୍ତ ଅଧିକାରୀ ପ୍ରଶାନ୍ତ କୁମାର ରଥ, ଶୈକ୍ଷିକ ପରିଷଦର ସମ୍ପାଦକ ରଜତ କୁମାର ମିଶ୍ର, ଅଧ୍ୟାପକ ଡ. ପ୍ରତ୍ୟୁଷ କାର୍ଜୀ, ଛାତ୍ର ଏମ୍‌. ସୌରଭ କୁମାର, ନିଜର, ଅମନ, ସୌରଭ ଓ ପୁରୁଷୋତ୍ତମ ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ। ଛାତ୍ରୀ ଲିକୁନା ଧନ୍ୟବାଦ ଅର୍ପଣ କରିଥିଲେ।

ଏହି ଅବସରରେ କ୍ଲାସ୍‌ ଟପ୍ପର ଇତିଶ୍ରୀ ଗୌଡ଼ଙ୍କୁ ସମ୍ବର୍ଦ୍ଧିତ କରାଯାଇଥିଲା। ବର୍ଣ୍ଣାଳୀ, କାର୍ତ୍ତିକ, ଶୁଭମ, ଶୁଭସ୍ମିତା, ସ୍ମାଇଲ ଓ ହରିପ୍ରିୟା ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ। ଶେଷରେ ସାଂସ୍କୃତିକ କାର୍ଯ୍ୟକ୍ରମ ସହ ଚାରାରୋପଣ ଉତ୍ସବ ଅନୁଷ୍ଠିତ ହୋଇଥିଲା।