ନବରଙ୍ଗପୁରରେ ରେଡ ଆଲର୍ଟ: ବର୍ଷା ପରିସ୍ଥିତି ଉପରେ ପ୍ରଶାସନର କଡ଼ା ନଜର
ନବରଙ୍ଗପୁର,୨୪।୯(ସଦାଶିବ ପ୍ରହରାଜ): ଭାରତୀୟ ପାଣିପାଗ ବିଭାଗ (IMD) ପକ୍ଷରୁ ନବରଙ୍ଗପୁର ସମେତ ବିଭିନ୍ନ ଜିଲାରେ ମଧ୍ୟମରୁ ପ୍ରବଳ ବର୍ଷା, ଘଡ଼ଘଡ଼ି ଓ ବିଜୁଳି ଚମକିବା ନେଇ ସତର୍କ ସୂଚନା ସହ ରେଡ ଆଲର୍ଟ ଜାରି ହେବା ପରେ ନବରଙ୍ଗପୁର ଜିଲା ପ୍ରଶାସନ ସଜାଗ ହୋଇଛି। ସମ୍ଭାବ୍ୟ ବର୍ଷାଜନିତ ପରିସ୍ଥିତିର ମୁକାବିଲା ପାଇଁ ବ୍ୟାପକ ପ୍ରସ୍ତୁତି ସହ ଉଦ୍ଧାର ଓ ରିଲିଫ ବ୍ୟବସ୍ଥାକୁ ସୁଦୃଢ଼ କରାଯାଇଛି।
ଜିଲା, ବ୍ଲକ ଓ ସହରାଞ୍ଚଳ ସ୍ତରରେ ୨୪ ଘଣ୍ଟିଆ ନିୟନ୍ତ୍ରଣ କକ୍ଷ କାର୍ଯ୍ୟକ୍ଷମ ରହିଛି। ବିପଦପ୍ରବଣ ଅଞ୍ଚଳ ଉପରେ ନିରନ୍ତର ନଜର ରଖାଯାଉଥିବା ବେଳେ ଅଧିକାରୀ ଓ କ୍ଷେତ୍ର କର୍ମଚାରୀଙ୍କୁ ନିଜ ନିଜ କାର୍ଯ୍ୟକ୍ଷେତ୍ରରେ ସଜାଗ ରହିବାକୁ ନିର୍ଦ୍ଦେଶ ଦିଆଯାଇଛି। ସମସ୍ତ ବିଡିଓ ଓ ତହସିଲଦାରଙ୍କୁ ମୁଖ୍ୟାଳୟ ନ ଛାଡ଼ିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ନନ୍ଦାହାଣ୍ଡି ବିଡିଓ ଦହଣା ସେତୁ ପରିଦର୍ଶନ କରି ଜଳସ୍ତରର ସ୍ଥିତି ଅନୁଧ୍ୟାନ କରିଛନ୍ତି। ବର୍ତ୍ତମାନ ସେତୁ ଉପରେ ପାଣି ପ୍ରବାହିତ ହେଉନଥିବା ବେଳେ ପରିସ୍ଥିତି ଉପରେ ପ୍ରଶାସନ ପକ୍ଷରୁ ନଜର ରଖାଯାଇଛି।
ସେହିପରି ତେନ୍ତୁଳିଖୁଣ୍ଟି-ନବରଙ୍ଗପୁର ରାସ୍ତାରେ ପଡ଼ିଥିବା ଗଛକୁ ଅଗ୍ନିଶମ ବାହିନୀ ହଟାଇବା ପରେ ଯୋଗାଯୋଗ ବ୍ୟବସ୍ଥା ସ୍ବାଭାବିକ ହୋଇଛି। କୁକୁଡ଼ାବାଇ ନୂଆପୁଜାରୀଗୁଡ଼ା ବିଦ୍ୟାଳୟ ନିକଟରେ ଥିବା ଏକ ବିପଦଜନକ ଗଛକୁ ମଧ୍ୟ ହଟାଯାଇଛି। ଯାତ୍ରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ଆମଲିଗୁମା ନିର୍ମାଣାଧୀନ ସେତୁ ନିକଟରେ ପୋଲିସ ମୁତୟନ କରାଯାଇଛି। ବର୍ଷାଜନିତ ବିପଦକୁ ନେଇ ଜିଲାର ବିଭିନ୍ନ ବିପଦପ୍ରବଣ ଅଞ୍ଚଳରେ ମାଇକ ଯୋଗେ ଜନସଚେତନତା କରାଯାଉଛି। ଇନ୍ଦ୍ରାବତୀ ଡ୍ୟାମର ଜଳଦ୍ୱାର ଖୋଲାଯିବା ସମ୍ପର୍କରେ ମଧ୍ୟ ଲୋକଙ୍କୁ ସତର୍କ କରାଯାଉଛି।
ଏଥିସହ PDS ବଣ୍ଟନ ବ୍ୟବସ୍ଥାକୁ ନିରବଚ୍ଛିନ୍ନ ରଖିବା ସହ ସହରାଞ୍ଚଳର ଡ୍ରେନ ଓ ଜଳ ନିଷ୍କାସନ ପଥଗୁଡ଼ିକୁ ସଫା କରାଯାଉଛି। ବରିଷ୍ଠ ଅଧିକାରୀମାନେ ବିଭିନ୍ନ ଗ୍ରାମ, ବିଦ୍ୟାଳୟ ଓ ବିପଦପ୍ରବଣ ଅଞ୍ଚଳ ପରିଦର୍ଶନ କରି ପ୍ରସ୍ତୁତିର ସମୀକ୍ଷା କରୁଛନ୍ତି। ବର୍ଷା ସମୟରେ ନଦୀ, ନାଳ ଓ ଜଳମଗ୍ନ ଅଞ୍ଚଳକୁ ନ ଯିବା ପାଇଁ ଜିଲା ପ୍ରଶାସନ ପକ୍ଷରୁ ଲୋକଙ୍କୁ ପରାମର୍ଶ ଦିଆଯାଇଛି। ଏଥିସହ ବିପଦ ସମୟରେ ଡଙ୍ଗା ବ୍ୟବହାର ନକରିବା, ନିର୍ମାଣାଧୀନ ସେତୁ ଓ ଅନ୍ୟ ବିପଦପ୍ରବଣ ସ୍ଥାନଠାରୁ ଦୂରେଇ ରହିବାକୁ କୁହାଯାଇଛି।
ଘଡ଼ଘଡ଼ି ଓ ବିଜୁଳି ଚମକିବା ସମୟରେ ଗଛତଳେ ଆଶ୍ରୟ ନ ନେବାକୁ ମଧ୍ୟ ପ୍ରଶାସନ ସତର୍କ କରିଛି। ସମ୍ଭାବ୍ୟ ବର୍ଷା ଓ ବନ୍ୟା ପରିସ୍ଥିତିକୁ ନେଇ ଜିଲା ପ୍ରଶାସନ ପୂରା ସଜାଗ ରହିଥିବା ଜଣାପଡ଼ିଛି।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
