କେନ୍ଦ୍ର ସରକାରୀ କର୍ମଚାରୀଙ୍କୁ ବଡ଼ ଖବର: ଏଥର ଆଗୁଆ ମିଳିବ ଦରମା, ଜାଣନ୍ତୁ କାହିିଁକି

ନୂଆଦିଲ୍ଲୀ୨୪।୯: କେନ୍ଦ୍ର ସରକାରୀ କର୍ମଚାରୀ ଓ ପେନସନଭୋଗୀଙ୍କ ପାଇଁ ବଡ଼ ଖବର। ସାଧାରଣତଃ ମାସର ଶେଷ କାର୍ଯ୍ୟଦିବସରେ କର୍ମଚାରୀଙ୍କ ଦରମା ଓ ପେନସନଭୋଗୀଙ୍କ ପେନସନ ଆକାଉଣ୍ଟରେ ଜମା ହୋଇଥାଏ। କିନ୍ତୁ ଚଳିତ ସେପ୍ଟେମ୍ବର ମାସରେ ଏହି ନିୟମରେ ପରିବର୍ତ୍ତନ କରାଯାଇଛି। ବ୍ୟାଙ୍କ ହଡ଼ତାଳକୁ ଦୃଷ୍ଟିରେ ରଖି ସେପ୍ଟେମ୍ବର ମାସର ଦରମା ଓ ପେନସନ ସେପ୍ଟେମ୍ବର ୨୫ ତାରିଖରେ ହିଁ ପ୍ରଦାନ କରାଯିବ।

ୟୁନାଇଟେଡ ଫୋରମ ଅଫ ବ୍ୟାଙ୍କ ୟୁନିଅନ୍ସ (UFBU) ପକ୍ଷରୁ ସେପ୍ଟେମ୍ବର ୨୮ରୁ ୩୦ ତାରିଖ ପର୍ଯ୍ୟନ୍ତ ୩ ଦିନିଆ ଦେଶବ୍ୟାପୀ ବ୍ୟାଙ୍କ ହଡ଼ତାଳ ଡାକରା ଦିଆଯାଇଛି। ଏହି ସମୟରେ ବ୍ୟାଙ୍କିଂ କାରବାର ପ୍ରଭାବିତ ହେବାର ଆଶଙ୍କା ରହିଛି।

ସେପ୍ଟେମ୍ବର ୩୦ରେ ଛମାସିକ କ୍ଲୋଜିଂ ମଧ୍ୟ ହେବାକୁ ଥିବାରୁ ସରକାର ଆଗୁଆ ଭାବେ ଦରମା ଓ ପେନସନ ପ୍ରଦାନ କରିବାକୁ ନିଷ୍ପତ୍ତି ନେଇଛି।
ବିତ୍ତ ମନ୍ତ୍ରଣାଳୟ ପକ୍ଷରୁ ସମସ୍ତ ବିଭାଗ ଓ ମନ୍ତ୍ରଣାଳୟକୁ ଏନେଇ ପରାମର୍ଶ ଦିଆଯାଇଛି। କଣ୍ଟ୍ରୋଲର ଜେନେରାଲ ଅଫ ଆକାଉଣ୍ଟସ (CGA) ପକ୍ଷରୁ ଜାରି ଅଫିସ ମେମୋରାଣ୍ଡମ ଅନୁଯାୟୀ, ୨୫ ସେପ୍ଟେମ୍ବର ୨୦୨୬, ଶୁକ୍ରବାର ଦିନ ସେପ୍ଟେମ୍ବର ମାସର ଦରମା ଓ ପେନସନ ପ୍ରଦାନ କରାଯିବ।

ଏହି ନିଷ୍ପତ୍ତିର ଲାଭ ସମସ୍ତ କେନ୍ଦ୍ର ସରକାରୀ କର୍ମଚାରୀ ପାଇପାରିବେ। ଏଥିରେ…

-କେନ୍ଦ୍ର ସରକାରୀ ବିଭାଗର ସମସ୍ତ କର୍ମଚାରୀ
-ପ୍ରତିରକ୍ଷା ବିଭାଗର କର୍ମଚାରୀ
-ଡାକ ବିଭାଗର କର୍ମଚାରୀ
-ଦୂରସଞ୍ଚାର ବିଭାଗର କର୍ମଚାରୀ
-କେନ୍ଦ୍ର ସରକାର ଅଧୀନ ଔଦ୍ୟୋଗିକ ଶ୍ରମିକ
-ଅବସରପ୍ରାପ୍ତ କେନ୍ଦ୍ର ସରକାରୀ କର୍ମଚାରୀ

ଏହା ସହିତ କେନ୍ଦ୍ର ସରକାରୀ ପେନସନଭୋଗୀଙ୍କ ପେନସନ ମଧ୍ୟ ୨୫ ସେପ୍ଟେମ୍ବରରେ ବ୍ୟାଙ୍କ ଓ ପେ ଆଣ୍ଡ ଆକାଉଣ୍ଟସ ଅଫିସ (PAO) ମାଧ୍ୟମରେ ଟ୍ରାନ୍ସଫର କରାଯିବ।

ସରକାର ସ୍ପଷ୍ଟ କରିଛି ଯେ ୨୫ ସେପ୍ଟେମ୍ବରରେ ଦିଆଯାଉଥିବା ଦରମାକୁ ଆଡଭାନ୍ସ ପେମେଣ୍ଟ ଭାବେ ଗଣନା କରାଯିବ। ସେପ୍ଟେମ୍ବର ମାସ ଶେଷ ହେବା ପରେ ଯଦି ଦରମା ଓ ଭତ୍ତାର ଅନ୍ତିମ ହିସାବରେ କୌଣସି ପରିବର୍ତ୍ତନ ଆସେ, ତେବେ ତାହାକୁ ଅକ୍ଟୋବର ମାସର ଦରମାରେ ଆଡଜଷ୍ଟ କରାଯିବ।
ଅର୍ଥାତ୍‌ ସେପ୍ଟେମ୍ବର ୨୬ରୁ ୩୦ ମଧ୍ୟରେ ଯଦି କୌଣସି ନୂଆ ଭତ୍ତା, ଏରିଅର୍‌ କିମ୍ବା ଓଭରଟାଇମ ରାଶି ଦେୟ ହୁଏ, ତେବେ ସେହି ଅର୍ଥ ଅକ୍ଟୋବର ମାସର ଦରମା ସହ ଯୋଡ଼ି ଦିଆଯିବ। ଫଳରେ ବ୍ୟାଙ୍କ ହଡ଼ତାଳ ଯୋଗୁ କେନ୍ଦ୍ର ସରକାରୀ କର୍ମଚାରୀ ଓ ପେନସନଭୋଗୀଙ୍କ ଦରମା-ପେନସନ ଦେବାରେ କୌଣସି ବିଳମ୍ବ ହେବ ନାହିଁ।