ପୁଜାରାଙ୍କ ବେଷ୍ଟ ODI ଏକାଦଶରେ ୬ ଭାରତୀୟ, ବାଦ ପଡ଼ିଲେ ଏହି କ୍ରିକେଟର
ନୂଆଦିଲ୍ଲୀ, ୨୬।୧୦: ଭାରତର ଅଭିଜ୍ଞ କ୍ରିକେଟର ଚେତେଶ୍ୱର ପୁଜାରା ନିଜର ସର୍ବଶ୍ରେଷ୍ଠ ଦିନିକିଆ (ODI) ପ୍ଲେଇଂ ଏକାଦଶ ଚୟନ କରିଛନ୍ତି। ଏହି ଦଳରେ ୧୧ ଜଣ ଖେଳାଳିଙ୍କ ମଧ୍ୟରୁ ୬ ଜଣ ଭାରତୀୟ ରହିଛନ୍ତି। ତେବେ ନିକଟ ଅତୀତରେ ଦିନିକିଆ କ୍ରିକେଟ୍ରେ ଭଲ ପ୍ରଦର୍ଶନ କରିଥିବା ଶ୍ରେୟସ ଆୟର ଓ ଇଂଲଣ୍ଡର ହ୍ୟାରି ବ୍ରୁକ୍ଙ୍କୁ ପୁଜାରା ନିଜ ଦଳରେ ସ୍ଥାନ ଦେଇନାହାନ୍ତି।
ପୁଜାରାଙ୍କ ଏକାଦଶରେ ଓପନିଂ ଦାୟିତ୍ୱ ତୁଲାଇବେ ଶୁଭମନ ଗିଲ୍ ଓ ରୋହିତ ଶର୍ମା। ତୃତୀୟ ସ୍ଥାନରେ ରହିଛନ୍ତି ବିରାଟ କୋହଲି। ଏହି ତିନି ଭାରତୀୟ ବ୍ୟାଟର ନିଜ ନିଜ ପ୍ରଦର୍ଶନ ଦ୍ୱାରା ଦିନିକିଆ କ୍ରିକେଟ୍ରେ ନିଜର ଦକ୍ଷତା ପ୍ରମାଣିତ କରିଛନ୍ତି । ଦିଆଯାଇଥିବା ତଥ୍ୟ ଅନୁସାରେ, ୨୦୨୬ରେ ଶୁଭମନ ଗିଲ୍ ୮୯୫ ରନ୍, ରୋହିତ ଶର୍ମା ୬୦୪ ରନ୍ ଏବଂ ବିରାଟ କୋହଲି ୫୫୨ ରନ୍ ସଂଗ୍ରହ କରିଛନ୍ତି।
ଚତୁର୍ଥ ସ୍ଥାନରେ ଇଂଲଣ୍ଡର ଅଭିଜ୍ଞ ବ୍ୟାଟର ଜୋ ରୁଟ୍ଙ୍କୁ ରଖିଛନ୍ତି ପୁଜାରା। ଚଳିତ ବର୍ଷ ଦିନିକିଆରେ ୮୫ ହାରରେ ୬୮୦ ରନ୍ କରିଥିବା ରୁଟ୍ ମଧ୍ୟକ୍ରମକୁ ମଜବୁତ କରିବେ । ଏହା ସହ ଭାରତର କେଏଲ୍ ରାହୁଲ ଓ ୱେଷ୍ଟଇଣ୍ଡିଜ୍ର ଶାଇ ହୋପ୍ଙ୍କୁ ମଧ୍ୟ ଦଳରେ ସ୍ଥାନ ମିଳିଛି। ଅଲ୍ରାଉଣ୍ଡର ଭାବେ ଦକ୍ଷିଣ ଆଫ୍ରିକାର ମାର୍କୋ ଜାନସେନ୍ଙ୍କୁ ଚୟନ କରିଛନ୍ତି ପୁଜାରା। ତାଙ୍କ ବ୍ୟାଟିଂ ଓ ବୋଲିଂ ଦଳକୁ ସନ୍ତୁଳନ ଦେବ ବୋଲି ଆଶା କରାଯାଉଛି।
ବୋଲିଂ ବିଭାଗରେ ଭାରତର ଯଶପ୍ରୀତ ବୁମ୍ରା ଓ କୁଲଦୀପ ଯାଦବଙ୍କୁ ସାମିଲ କରିଛନ୍ତି ପୁଜାରା। ଏହା ସହ ନ୍ୟୁଜିଲାଣ୍ଡର ମ୍ୟାଟ୍ ହେନରୀ ଏବଂ ୱେଷ୍ଟଇଣ୍ଡିଜ୍ର ଜେଡେନ୍ ସିଲ୍ସଙ୍କୁ ଦ୍ରୁତ ବୋଲିଂ ବିଭାଗରେ ସ୍ଥାନ ଦିଆଯାଇଛି। ଆଫଗାନିସ୍ତାନର ରାଶିଦ ଖାନ୍ ଓ ନ୍ୟୁଜିଲାଣ୍ଡର ମିଚେଲ ସାଣ୍ଟନରଙ୍କୁ ବାଦ୍ ଦେଇ ପୁଜାରା ମୁଖ୍ୟ ସ୍ପିନର ଭାବେ କୁଲଦୀପ ଯାଦବଙ୍କୁ ବାଛିଛନ୍ତି।
ଚେତେଶ୍ୱର ପୁଜାରାଙ୍କ ବେଷ୍ଟ ODI ପ୍ଲେଇଂ ଏକାଦଶ
୧. ଶୁଭମନ ଗିଲ୍
୨. ରୋହିତ ଶର୍ମା
୩. ବିରାଟ କୋହଲି
୪. ଜୋ ରୁଟ୍
୫. କେଏଲ୍ ରାହୁଲ
୬. ଶାଇ ହୋପ୍
୭. ମାର୍କୋ ଜାନସେନ୍
୮. ଯଶପ୍ରୀତ ବୁମ୍ରା
୯. ମ୍ୟାଟ୍ ହେନରୀ
୧୦. ଜେଡେନ୍ ସିଲ୍ସ
୧୧. କୁଲଦୀପ ଯାଦବ
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
