ପୁଣି ଭାରତ-ପାକିସ୍ତାନ ସାମ୍ନାସାମ୍ନି: ଦୀପାବଳିରେ ହେବ ହାଇଭୋଲ୍ଟେଜ ମ୍ୟାଚ
ନୂଆଦିଲ୍ଲୀ,୯।୧୦: କ୍ରିକେଟ ପ୍ରେମୀଙ୍କ ପାଇଁ ବଡ଼ ଖବର। ଏସିଆନ କ୍ରିକେଟ କାଉନସିଲ (ACC) ପକ୍ଷରୁ ଅଣ୍ଡର-୧୯ ଏସିଆ କପ ୨୦୨୬ର କାର୍ଯ୍ୟସୂଚୀ ଘୋଷଣା କରାଯାଇଛି। ଏଥର ନଭେମ୍ବର ୫ରୁ ୧୪ ତାରିଖ ପର୍ଯ୍ୟନ୍ତ ଓମାନରେ ଏହି ଟୁର୍ନାମେଣ୍ଟ ଖେଳାଯିବ। ଏଥିରେ ଭାରତ ଓ ପାକିସ୍ତାନ ସମେତ ମୋଟ ୮ଟି ଦଳ ଅଂଶଗ୍ରହଣ କରିବେ। ସବୁଠାରୁ ରୋମାଞ୍ଚକର କଥା ହେଉଛି, ନଭେମ୍ବର ୮ ତାରିଖ ଦୀପାବଳି ଦିନ ଭାରତ ଓ ପାକିସ୍ତାନ ମଧ୍ୟରେ ହେବ ମହାମୁକାବିଲା।
ଏଥର ଅଣ୍ଡର-୧୯ ଏସିଆ କପ ଏକଦିବସୀୟ ଫର୍ମାଟ୍ରେ ଖେଳାଯିବ। ଅଂଶଗ୍ରହଣ କରୁଥିବା ୮ଟି ଦଳକୁ ଦୁଇଟି ଗ୍ରୁପ୍ରେ ରଖାଯାଇଛି। ଗ୍ରୁପ-ଏରେ ଭାରତ, ପାକିସ୍ତାନ, ନେପାଳ ଓ ୟୁଏଇ ଥିବାବେଳେ ଗ୍ରୁପ-ବିରେ ଆଫଗାନିସ୍ତାନ, ବାଂଲାଦେଶ, ଶ୍ରୀଲଙ୍କା ଓ ମାଲେସିଆ ରହିଛନ୍ତି। ଟୁର୍ନାମେଣ୍ଟର ପ୍ରଥମ ମ୍ୟାଚ ନଭେମ୍ବର ୫ରେ ଖେଳାଯିବ। ଗ୍ରୁପ ପର୍ଯ୍ୟାୟରେ ପ୍ରତ୍ୟେକ ଦଳ ନିଜ ଗ୍ରୁପ୍ର ଅନ୍ୟ ଦଳଗୁଡ଼ିକ ସହ ମ୍ୟାଚ ଖେଳିବ।
ଅଣ୍ଡର-୧୯ ଏସିଆ କପ୍ରେ ଭାରତୀୟ ଦଳ ନଭେମ୍ବର ୬ରେ ନେପାଳ ବିପକ୍ଷରେ ନିଜର ଅଭିଯାନ ଆରମ୍ଭ କରିବ। ଏହି ମ୍ୟାଚ ଓମାନର ଅଲ ଆମେରାତ୍ କ୍ରିକେଟ ଗ୍ରାଉଣ୍ଡରେ ଖେଳାଯିବ। ଏହାପରେ ନଭେମ୍ବର ୮ରେ ଭାରତୀୟ ଯୁବ ଦଳ ପାକିସ୍ତାନକୁ ଭେଟିବ। ଏହି ମ୍ୟାଚ ଅଲ ଆମେରାତ୍ କ୍ରିକେଟ ଗ୍ରାଉଣ୍ଡର ମିନିଷ୍ଟ୍ରି ଟର୍ଫ-୨ରେ ଖେଳାଯିବ। ଭାରତୀୟ ସମୟ ଅନୁସାରେ ମ୍ୟାଚ୍ଟି ସକାଳ ୧୦ଟା ୩୦ ମିନିଟ୍ରେ ଆରମ୍ଭ ହେବାର ସୂଚନା ରହିଛି।
ଗ୍ରୁପ ପର୍ଯ୍ୟାୟର ଶେଷ ମ୍ୟାଚ୍ରେ ଭାରତ ନଭେମ୍ବର ୧୦ରେ ୟୁଏଇ ସହ ମୁକାବିଲା କରିବ। ତେଣୁ ଭାରତୀୟ ଦଳ ପାଇଁ ପାକିସ୍ତାନ ବିପକ୍ଷ ମ୍ୟାଚ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ରହିବ। ଗ୍ରୁପ ପର୍ଯ୍ୟାୟର ମ୍ୟାଚ ଶେଷ ହେବା ପରେ ନଭେମ୍ବର ୧୨ ତାରିଖରେ ଦୁଇଟି ସେମିଫାଇନାଲ ଖେଳାଯିବ।
ପ୍ରଥମ ସେମିଫାଇନାଲ୍ରେ ଗ୍ରୁପ-ଏର ଶୀର୍ଷ ଦଳ ଗ୍ରୁପ-ବିର ଦ୍ୱିତୀୟ ସ୍ଥାନରେ ଥିବା ଦଳକୁ ଭେଟିବ। ଦ୍ୱିତୀୟ ସେମିଫାଇନାଲ୍ରେ ଗ୍ରୁପ-ବିର ଶୀର୍ଷ ଦଳ ଗ୍ରୁପ-ଏର ଦ୍ୱିତୀୟ ସ୍ଥାନରେ ଥିବା ଦଳ ସହ ଖେଳିବ। ନଭେମ୍ବର ୧୪ରେ ଟୁର୍ନାମେଣ୍ଟର ଫାଇନାଲ ମ୍ୟାଚ ଅନୁଷ୍ଠିତ ହେବ।
ଅଣ୍ଡର-୧୯ ଏସିଆ କପ୍ରେ ଭାରତୀୟ ଦଳର ରେକର୍ଡ ଉଲ୍ଲେଖନୀୟ ରହିଛି। ଭାରତ ଏହି ଟୁର୍ନାମେଣ୍ଟରେ ୮ ଥର ଚାମ୍ପିୟନ ହୋଇଥିବା ବେଳେ ୨ ଥର ରନର୍ସଅପ ହୋଇଛି। ଏବେ ଦଳର ଲକ୍ଷ୍ୟ ରହିବ ଆଉ ଏକ ଟାଇଟଲ ହାସଲ କରିବା।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
