ପ୍ରଧାନମନ୍ତ୍ରୀ ମୋଦିଙ୍କୁ ଭେଟିଲେ ବାଲ୍ୟବନ୍ଧୁ, BJP ବିଧାୟକଙ୍କୁ ନେଇ ଆଣିଲେ ବଡ଼ ଅଭିଯୋଗ! ଛାନିଆ ହୋଇଗଲେ….

ମୁମ୍ବାଇ,୧୩।୯: ମହାରାଷ୍ଟ୍ରର ଭାୟନ୍ଦରରେ ଜମି ବିବାଦକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବାଲ୍ୟବନ୍ଧୁ ଅସଗରଅଲି ଭୋରା ତାଙ୍କୁ ଭେଟିଛନ୍ତି । ୮ ସେପ୍ଟେମ୍ବରରେ ୮୧ ବର୍ଷୀୟ ଭୋରା ପ୍ରଧାନମନ୍ତ୍ରୀଙ୍କୁ ଭେଟି ନିଜ ଜମି ସମ୍ପର୍କିତ ବିବାଦର CBI ତଦନ୍ତ କରାଇବାକୁ ଦାବି କରିଛନ୍ତି । ମୋଦିଙ୍କ ସହ ସାକ୍ଷାତ ପରେ ତାଙ୍କୁ ସକାରାତ୍ମକ ପ୍ରତିକ୍ରିୟା ମିଳିଥିବା ଏବଂ ଏବେ ନ୍ୟାୟ ମିଳିବ ବୋଲି ଆଶା ରଖିଥିବା ଭୋରା କହିଛନ୍ତି।

ଭୋରାଙ୍କ ଦାବି ଅନୁସାରେ, ଗୁଜରାଟର ବଡ଼ନଗରସ୍ଥିତ ବି.ଏନ୍‌. ସ୍କୁଲରେ ପଢ଼ୁଥିବା ସମୟରୁ ସେ ମୋଦିଙ୍କୁ ଜାଣିଛନ୍ତି ଏବଂ ତାଙ୍କର ବାଲ୍ୟବନ୍ଧୁ । ମହାରାଷ୍ଟ୍ରର ପରିବହନ ମନ୍ତ୍ରୀ ପ୍ରତାପ ସରନାଏକ ମଧ୍ୟ ଏହି ସାକ୍ଷାତର ଫଟୋ ସେୟାର କରି ପ୍ରଧାନମନ୍ତ୍ରୀ ତାଙ୍କ ବନ୍ଧୁଙ୍କୁ ନିଶ୍ଚିତ ନ୍ୟାୟ ଦେବେ ବୋଲି କହିଛନ୍ତି। ଭୋରାଙ୍କ କହିବା ଅନୁଯାୟୀ, ୧୯୮୯ରେ ଭାୟନ୍ଦର ପୂର୍ବର ନବଘର ଅଞ୍ଚଳରେ ପ୍ରାୟ ୨,୮୧୦ ବର୍ଗମିଟର ଜମି ଏକ ପଞ୍ଜୀକୃତ ଚୁକ୍ତି ମାଧ୍ୟମରେ କିଣିଥିଲେ। ତାଙ୍କ ଦାବି ହେଉଛି, ସେ ଏହି ଜମିକୁ କେବେ ବିକ୍ରି କରିନାହାନ୍ତି କିମ୍ବା ଅନ୍ୟ କାହା ନାମକୁ ହସ୍ତାନ୍ତର କରିନାହାନ୍ତି। କିନ୍ତୁ ୨୦୧୧ରେ ସ୍ୱୟଂ ବିଲ୍ଡର୍ସ ସହ କଥିତ ମିଳିଭଗତ କରି ଜାଲ୍‌ ଦଲିଲ ପ୍ରସ୍ତୁତ କରାଯାଇଥିଲା। ପରେ ତାଙ୍କ ଅଜାଣତରେ ସମ୍ପତ୍ତିକୁ ଦୁଇ ଭାଗରେ ବିଭକ୍ତ କରାଯାଇଥିବା ସେ ଅଭିଯୋଗ କରିଛନ୍ତି।

ଭୋରାଙ୍କ ଅଭିଯୋଗ ଅନୁସାରେ, ଜମିର ଗୋଟିଏ ଅଂଶର ମାଲିକ ଭାବେ ସ୍ୱୟଂ ବିଲ୍ଡର୍ସକୁ ଏବଂ ଅନ୍ୟ ଅଂଶର ମାଲିକ ଭାବେ ସେଭେନ୍‌ ଇଲେଭେନ୍‌ କନ୍‌ଷ୍ଟ୍ରକ୍ସନ୍ସକୁ ଦର୍ଶାଯାଇଛି। ସେଭେନ୍‌ ଇଲେଭେନ୍‌ କନ୍‌ଷ୍ଟ୍ରକ୍ସନ୍ସର ସମ୍ପର୍କ ଭାଜପା ବିଧାୟକଙ୍କ ସହ ଥିବା ସେ ଦାବି କରିଛନ୍ତି। ନିଜର ମାଲିକାନା ଦାବି ଥିବା ସତ୍ତ୍ୱେ ମୀରା-ଭାୟନ୍ଦର ମହାନଗର ନିଗମର ନଗର ଯୋଜନା ବିଭାଗ ବିବାଦୀୟ ଜମିରେ ନିର୍ମାଣ ପାଇଁ ଅନୁମତି ଦେଇଥିବା ଭୋରା ଅଭିଯୋଗ କରିଛନ୍ତି। ଏହାସହ ଦଲିଲରେ କଥିତ ହେରଫେରରେ ସମ୍ପୃକ୍ତ ଲୋକଙ୍କ ବିରୋଧରେ ନଗର ନିଗମ, ରାଜସ୍ୱ ବିଭାଗ ଓ ସ୍ଥାନୀୟ ପୁଲିସ ଅଧିକାରୀମାନେ ପଦକ୍ଷେପ ନେଇନଥିବା ମଧ୍ୟ ସେ ଅଭିଯୋଗ କରିଛନ୍ତି।

କଥିତ ଜାଲିଆତି ନେଇ ଭୋରା ୨୦୧୫ରେ FIR ଦାଖଲ କରିଥିବା କହିଛନ୍ତି। ପରେ ମାମଲା କୋର୍ଟକୁ ଯାଇଥିଲା। ତେବେ FIR ଦାଖଲ ହେବାର ପ୍ରାୟ ୧୧ ବର୍ଷ ପରେ, ୨୦୨୬ରେ CID ରିପୋର୍ଟ ଦାଖଲ କରାଯାଇଥିବା ସେ ଦାବି କରିଛନ୍ତି। ରାଜନୈତିକ ଚାପ ଯୋଗୁଁ ଅଧିକାରୀମାନେ ଏହି ମାମଲାରେ ଠୋସ୍‌ ପଦକ୍ଷେପ ନେଇନଥାଇପାରନ୍ତି ବୋଲି ମଧ୍ୟ ସେ ଅଭିଯୋଗ କରିଛନ୍ତି । ଏହାସହ ୨୦୨୫ରେ ତାଙ୍କୁ ପୂର୍ବ ସୂଚନା ନଦେଇ କିମ୍ବା ନିଜ ପକ୍ଷ ରଖିବାର ସୁଯୋଗ ନଦେଇ ତାଙ୍କ ବିରୋଧରେ ପାଲଟା ମାମଲା ରୁଜୁ କରାଯାଇଥିବା ମଧ୍ୟ ସେ ଦାବି କରିଛନ୍ତି।

ପ୍ରଧାନମନ୍ତ୍ରୀଙ୍କ ସହ ଭୋରାଙ୍କ ସାକ୍ଷାତ ପରେ ସ୍ଥାନୀୟ ପୌର ଅଧିକାରୀମାନେ ଏହି ମାମଲା ଉପରେ ଧ୍ୟାନ ଦେଇଥିବା ଜଣାପଡ଼ିଛି । ଆସନ୍ତା ୧୬ ସେପ୍ଟେମ୍ବରରେ ମାମଲାର ଶୁଣାଣି ଧାର୍ଯ୍ୟ ହୋଇଛି । ସମ୍ପୃକ୍ତ କମ୍ପାନୀଗୁଡ଼ିକର ପ୍ରତିନିଧିଙ୍କୁ ଶୁଣାଣିରେ ଉପସ୍ଥିତ ରହିବାକୁ ନିର୍ଦ୍ଦେଶ ଦିଆଯାଇଛି ।