ବଦଳୁଛି ନିଯୁକ୍ତି ରଣନୀତି: ଛୋଟ ସହରରେ ବଡ଼ ସୁଯୋଗ

ମୁମ୍ବାଇ, ୨୧ା୯ (ପି.ଟି.): ‘ଜିନିୟସ ଏଚ୍‌ଆର୍‌ଟେକ୍‌’ର ରିପୋର୍ଟ ଅନୁଯାୟୀ, ଗତ ଦୁଇ ବର୍ଷ ମଧ୍ୟରେ ୬୯ ପ୍ରତିଶତ ବ୍ୟବସାୟିକ ପ୍ରତିଷ୍ଠାନ ଟାୟାର-୨ ଓ ୩ ସହରଗୁଡ଼ିକରୁ ନିଜ ନିଯୁକ୍ତି ପ୍ରକ୍ରିୟାକୁ ୩୦%ରୁ ଅଧିକ ବୃଦ୍ଧି କରିଛନ୍ତି। ଗତ ଅଗଷ୍ଟରେ ଫାଇନାନ୍ସ, ବିଏଫ୍‌ଏସ୍‌ଆଇ, ଏଫଏମ୍‌ସିଜି, ଇଞ୍ଜିନିୟରିଂ, ଆଇଟି, ମାନୁଫାକ୍ଚରିଂ, ଟେଲିକମ୍‌ ଏବଂ ରିଟେଲ/ଇ-କମର୍ସ ଭଳି ବିଭିନ୍ନ କ୍ଷେତ୍ରର ୧,୭୨୯ ଜଣ ନିଯୁକ୍ତିଦାତାଙ୍କୁ ନେଇ କରାଯାଇଥିବା ସର୍ଭେରୁ ଏହି ତଥ୍ୟ ସାମ୍ନାକୁ ଆସିଛି।
ରିପୋର୍ଟ ମୁତାବକ, ଛୋଟ ସହରଗୁଡ଼ିକରେ ପ୍ରତିଭାବାନ କର୍ମଚାରୀଙ୍କ ସଂଖ୍ୟା ବୃଦ୍ଧି ପାଉଥିବାରୁ ସଂସ୍ଥାଗୁଡ଼ିକ ଏବେ କେନ୍ଦ୍ରୀଭୂତ ନିଯୁକ୍ତି ବଦଳରେ ସାରା ଦେଶରେ ନିଜର ଆଞ୍ଚଳିକ ପରିସର ବିସ୍ତାର କରୁଛନ୍ତି। ଆଗାମୀ ୩ ବର୍ଷ ମଧ୍ୟରେ ସେମାନଙ୍କର ଅଧିକାଂଶ ନିଯୁକ୍ତି ପ୍ରକ୍ରିୟା ଏହି ଟାୟାର-୨ ଓ ୩ ସହରଗୁଡ଼ିକୁ ସ୍ଥାନାନ୍ତର ହେବ ବୋଲି ୫୫ ପ୍ରତିଶତ ନିଯୁକ୍ତିଦାତା ଆଶାବ୍ୟକ୍ତ କରିଛନ୍ତି। ୬୪ ପ୍ରତିଶତ ବ୍ୟବସାୟିକ ସଂସ୍ଥା ବିଶ୍ୱାସ କରନ୍ତି ଯେ ଛୋଟ ସହରଗୁଡ଼ିକରେ ଅଧିକାଂଶ ବିଭାଗ ପାଇଁ ଆବଶ୍ୟକ ଉପଯୁକ୍ତ ଓ ଦକ୍ଷ କର୍ମଚାରୀ ସହଜରେ ମିଳିପାରୁଛନ୍ତି।
ଟାୟାର-୨ ଓ ୩ ସହରରୁ କର୍ମଚାରୀ ନିଯୁକ୍ତି କରିବାର ମୁଖ୍ୟ କାରଣ ସମ୍ପର୍କରେ ରିପୋର୍ଟରେ ଗୁରୁତ୍ୱପୂର୍ଣ୍ଣ ସୂଚନା ଦିଆଯାଇଛି। ତଦନୁଯାୟୀ, ୩୯ ପ୍ରତିଶତ ସଂସ୍ଥା ନିଯୁକ୍ତି ଖର୍ଚ୍ଚ କମ୍‌ ହେବାକୁ ସବୁଠାରୁ ବଡ଼ ଫାଇଦା ଭାବେ ଦର୍ଶାଇଥିବାବେଳେ ୨୬ ପ୍ରତିଶତ କର୍ମଚାରୀଙ୍କ ଅଧିକ ନିଷ୍ଠା ଏବଂ ୨୨ ପ୍ରତିଶତ କମ୍‌ ଚାକିରି ଛାଡ଼ିବା ହାରକୁ ମୁଖ୍ୟ କାରଣ ଭାବେ ଗ୍ରହଣ କରିଛନ୍ତି। ସେହିପରି ୧୩ ପ୍ରତିଶତ ସଂସ୍ଥା ଏହାକୁ ନୂତନ ଓ ଅବ୍ୟବହୃତ ପ୍ରତିଭା ସଂଗ୍ରହର ମାଧ୍ୟମ ଭାବେ ଦେଖୁଛନ୍ତି। ତେବେ ଏହି ନିଯୁକ୍ତି ସ୍ଥାନାନ୍ତରଣ ଦ୍ୱାରା ଉତ୍ପାଦନ ଏବଂ ଇଞ୍ଜିନିୟରିଂ କ୍ଷେତ୍ର ସବୁଠାରୁ ଅଧିକ ଲାଭବାନ ହେବାକୁ ଯାଉଛି। ଆଗାମୀ ୨ରୁ ୩ ବର୍ଷ ମଧ୍ୟରେ ଟାୟାର-୨ ଓ ୩ ସହରଗୁଡ଼ିକରେ ମାନୁଫାକ୍ଚରିଂ କ୍ଷେତ୍ରରୁ ସର୍ବାଧିକ ନିଯୁକ୍ତି ସୁଯୋଗ ସୃଷ୍ଟି ହେବ ବୋଲି ୩୭ ପ୍ରତିଶତ ଅଂଶଗ୍ରହଣକାରୀ ଆକଳନ କରିଛନ୍ତି। ଏହି ବିଶାଳ ସମ୍ଭାବନା ସତ୍ତ୍ୱେ ଭିତ୍ତିଭୂମି ଏବଂ ଯୋଗାଯୋଗ ଏବେ ବି ସବୁଠାରୁ ବଡ଼ ଚ୍ୟାଲେଞ୍ଜ ଭାବେ ଛିଡ଼ା ହୋଇଛି। ୬୦ ପ୍ରତିଶତ ନିଯୁକ୍ତିଦାତା ଏହାକୁ ମେଟ୍ରୋ ବାହାରେ ସମ୍ପ୍ରସାରଣର ମୁଖ୍ୟ ପ୍ରତିବନ୍ଧକ ଭାବେ ଚିହ୍ନଟ କରିଛନ୍ତି।
ଏହି ସନ୍ଦର୍ଭରେ ‘ଜିନିୟସ ଏଚ୍‌ଆର୍‌ଟେକ୍‌’ର ଅଧ୍ୟକ୍ଷ ଆର୍‌. ପି. ଯାଦବ କହିଛନ୍ତି, ଟାୟାର-୨ ଓ ୩ ସହରଗୁଡ଼ିକୁ ଏବେ ଆଉ ମେଟ୍ରୋର ବିକଳ୍ପ ଭାବେ ଦେଖାଯାଉନାହିଁ, ବରଂ ଏଗୁଡ଼ିକ ସ୍ବତନ୍ତ୍ର ରଣନୈତିକ ପ୍ରତିଭା ବଜାରରେ ପରିଣତ ହେଉଛିି। ଏହି ପରିବର୍ତ୍ତନ କେବଳ ଖର୍ଚ୍ଚ କାଟ ମଧ୍ୟରେ ସୀମିତ ନ ରହି ଦୀର୍ଘମିଆଦୀ କର୍ମଚାରୀ ରଣନୀତିରେ ପରିଣତ ହୋଇଛି, ଯାହା ପାଇଁ ଆଗାମୀ ଦିନରେ ଭିତ୍ତିଭୂମିର ସୁଦୃଢ଼ୀକରଣ ଏବଂ ବିଶେଷ ଦକ୍ଷତା ବୃଦ୍ଧି ଉପରେ ପ୍ରାଥମିକତା ଦିଆଯିବା ଆବଶ୍ୟକ।