ବିବାହର ୩ ଦିନ ପରେ ବୋହୂଙ୍କ ଭୟଙ୍କର କାଣ୍ଡ! ପୂରା ପରିବାରକୁ ଦେଇଦେଲେ ମୂଷାମରା ଔଷଧ, ତାପରେ….

ମହାରାଷ୍ଟ୍ର,୧୧।୧୦: ବିବାହର ଖୁସି ମନାଉଥିବା ପରିବାରରେ ହଠାତ୍‌ ଖେଳିଗଲା ଆତଙ୍କ । ବିବାହର ମାତ୍ର ୭୨ ଘଣ୍ଟା ମଧ୍ୟରେ ନବବଧୂ ନିଜ ସ୍ୱାମୀଙ୍କ ସମେତ ଶାଶୂଘରର ଅନ୍ୟ ସଦସ୍ୟଙ୍କ ଖାଦ୍ୟରେ ମୂଷାମରା ବିଷ ମିଶାଇଥିବା ଅଭିଯୋଗ ହୋଇଛି । ଖାଦ୍ୟ ଖାଇବା ପରେ ପରିବାରର ସଦସ୍ୟମାନେ ଅସୁସ୍ଥ ହୋଇପଡ଼ିବାରୁ ସେମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ଏହାପରେ ନବବଧୂ ଜଣକ ଘରୁ ଗହଣା ଓ ବିବାହରେ ମିଳିଥିବା ଟଙ୍କା ନେଇ ଫେରାର ହେବାକୁ ଉଦ୍ୟମ କରିଥିବା ଜଣାପଡ଼ିଛି । ଏଭଳି ଘଟଣା ମହାରାଷ୍ଟ୍ରର ଜଳଗାଓଁ ଜିଲା ଅନ୍ତର୍ଗତ ପାରୋଲା ତାଲୁକାର ୱେଲ୍‌ହାନେ ଗାଁରେ ଘଟିଛି । ଘଟଣାରେ ଦୁଇ ମହିଳାଙ୍କୁ ପୋଲିସ ଅଟକ ରଖିଥିବା ରିପୋର୍ଟରୁ ଜଣାପଡ଼ିଛି।

ରିପୋର୍ଟ ଅନୁଯାୟୀ, ୩୨ ବର୍ଷୀୟ ଜଣେ ଯୁବକଙ୍କ ବିବାହ ଅକ୍ଟୋବର ୭ ତାରିଖରେ ହୋଇଥିଲା। ଅକ୍ଟୋବର ୯ ତାରିଖ ରାତିରେ ନବବଧୂ ଜଣକ ସ୍ୱାମୀଙ୍କ ସମେତ ପରିବାରର ଅନ୍ୟ ସଦସ୍ୟଙ୍କ ଖାଦ୍ୟରେ ମୂଷାମରା ଔଷଧ ମିଶାଇଥିବା ଅଭିଯୋଗ ହୋଇଛି। ଖାଦ୍ୟ ଖାଇବା ପରେ ପରିବାରର ସଦସ୍ୟମାନେ ଶୋଇବାକୁ ଯାଇଥିଲେ। କିଛି ସମୟ ପରେ ସେମାନଙ୍କ ସ୍ୱାସ୍ଥ୍ୟାବସ୍ଥା ବିଗିଡ଼ିବା ଆରମ୍ଭ ହୋଇଥିଲା। ପରିବାରରେ ସ୍ୱାମୀଙ୍କ ସମେତ ଆଉ ତିନି ଜଣ ସଦସ୍ୟ ଥିବା ରିପୋର୍ଟରେ ଉଲ୍ଲେଖ ରହିଛି। ପରିବାରର ସଦସ୍ୟମାନଙ୍କ ସ୍ୱାସ୍ଥ୍ୟାବସ୍ଥା ବିଗିଡ଼ିବା ପରେ ଘଟଣା ସମ୍ପର୍କରେ ଜଣାପଡ଼ିଥିଲା। ଅସୁସ୍ଥ ବୟସ୍କ ଦମ୍ପତିଙ୍କୁ ଚିକିତ୍ସା ପାଇଁ ଧୁଲେ ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଚିକିତ୍ସା ପରେ ସେମାନଙ୍କ ସ୍ଥିତିରେ ସୁଧାର ଆସିଥିବା ରିପୋର୍ଟରେ କୁହାଯାଇଛି।

ଘଟଣା ପରେ ସ୍ଥାନୀୟ ଲୋକେ ଓ ପରିବାରର ଅନ୍ୟ ସଦସ୍ୟମାନେ ଦୁଇ ମହିଳାଙ୍କୁ ଗିରଫ କରିବା ଦାବିରେ ଥାନା ସମ୍ମୁଖରେ ରାସ୍ତା ଅବରୋଧ କରିଥିଲେ। ଏହାପରେ ପୋଲିସ ତଦନ୍ତକୁ ଜୋରଦାର କରିଥିଲା। ଫେରାର ହେବାକୁ ଉଦ୍ୟମ କରୁଥିବା ଦୁଇ ମହିଳାଙ୍କୁ ଧୁଲେ ଜିଲାର ନିମଗୁଲ ଗାଁ ନିକଟରୁ ଅଟକ ରଖାଯାଇଥିବା ରିପୋର୍ଟରେ କୁହାଯାଇଛି। ପୋଲିସର ତଦନ୍ତ ସମୟରେ ନବବଧୂ ଝାଡ଼ଖଣ୍ଡର ବାସିନ୍ଦା ବୋଲି ଜଣାପଡ଼ିଛି । ତାଙ୍କୁ ସହଯୋଗ କରୁଥିବା ଅନ୍ୟ ମହିଳା ମଧ୍ୟ ଝାଡ଼ଖଣ୍ଡର ବାସିନ୍ଦା ବୋଲି କୁହାଯାଉଛି। ରିପୋର୍ଟ ଅନୁସାରେ, ଦୁଇ ମହିଳାଙ୍କ ନାମ ସୁମନ ସୁଭାଷ ସାହନୀ ଓ ଆରତୀ ସୂର୍ଯ୍ୟାକ୍ଷ ପଟେଲ। ଏହି ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।