ବିଶ୍ୱବ୍ୟାଙ୍କ ରିପୋର୍ଟରେ ବଡ଼ ଖୁଲାସା, ଧନୀ ଦେଶର ଗରିବଙ୍କ ଆୟ ବି ଭାରତର ଧନୀଙ୍କଠୁ ଅଧିକ!

ନୂଆଦିଲ୍ଲୀ,୧୩।୧୦: ବିଶ୍ୱର ବିକଶିତ ଓ ଉନ୍ନତ ଆର୍ଥିକ ବ୍ୟବସ୍ଥା ଥିବା ଧନୀ ଦେଶଗୁଡ଼ିକର ସବୁଠାରୁ ଗରିବ ୧୦ ପ୍ରତିଶତ ଲୋକଙ୍କ ଆୟ ଭାରତର ସବୁଠାରୁ ଧନୀ ୧୦ ପ୍ରତିଶତ ଲୋକଙ୍କ ଦୈନିକ ଆୟ କିମ୍ବା ବ୍ୟୟ କ୍ଷମତାଠାରୁ ବି ଅଧିକ। ବିଶ୍ୱବ୍ୟାଙ୍କର ‘ଦାରିଦ୍ର୍ୟ ଓ ଅସମାନତା ମଞ୍ଚ’ର ସଦ୍ୟତମ ଆକଳନରୁ ଏହି ଚିନ୍ତାଜନକ ତଥ୍ୟ ସାମ୍ନାକୁ ଆସିଛି। ଏହି ତୁଳନାତ୍ମକ ରିପୋର୍ଟ ଦର୍ଶାଉଛି, ଭାରତର ସବୁଠାରୁ ଧନୀ ଶ୍ରେଣୀରେ ଗଣ୍ୟ ହେଉଥିବା ପରିବାରଗୁଡ଼ିକର ଜୀବନଶୈଳୀ ଓ ଜୀବନଧାରଣର ମାନ, ବିକଶିତ ରାଷ୍ଟ୍ରଗୁଡ଼ିକର ସବୁଠାରୁ ତଳସ୍ତରରେ ଥିବା ନାଗରିକଙ୍କ ତୁଳନାରେ ଯଥେଷ୍ଟ କମ୍‌।
ବିଶ୍ୱବ୍ୟାଙ୍କ ତଥ୍ୟ ଅନୁଯାୟୀ, ଭାରତର ସବୁଠାରୁ ଗରିବ ୧୦ ପ୍ରତିଶତ ଲୋକଙ୍କ ଦୈନିକ ଆୟ କିମ୍ବା ବ୍ୟୟ ସୀମା ପ୍ରତି ବ୍ୟକ୍ତି ପିଛା ପ୍ରାୟ ୩ ଡଲାର (ପ୍ରାୟ ୨୯୦ ଟଙ୍କା) ରହିଛି। ଅପରପକ୍ଷରେ ଆମେରିକାରେ ଗରିବ ୧୦ ପ୍ରତିଶତଙ୍କ ଦୈନିକ ବ୍ୟୟ ସୀମା ୨୫ ଡଲାର, କାନାଡାରେ ୩୧ ଡଲାର ଏବଂ ଜର୍ମାନୀ ଓ ଅଷ୍ଟ୍ରେଲିଆରେ ୨୮ ଡଲାର ଲେଖାଏ ରହିଛି। ସେହିପରି ଭାରତର ସବୁଠାରୁ ଧନୀ ୧୦ ପ୍ରତିଶତ ଲୋକଙ୍କ ଦୈନିକ ଆୟ କିମ୍ବା ବ୍ୟୟ ସୀମା ମାତ୍ର ୧୦ ଡଲାର (ପ୍ରାୟ୯୬୦ ଟଙ୍କା) ରହିଥିବା ବେଳେ, ଆମେରିକାର ଧନୀ ୧୦ ପ୍ରତିଶତଙ୍କ କ୍ଷେତ୍ରରେ ଏହା ୧୭୩ ଡଲାର, କାନାଡ଼ା ଓ ଅଷ୍ଟ୍ରେଲିଆରେ ୧୨୯ ଡଲାର ଏବଂ ଜର୍ମାନୀରେ ୧୨୮ ଡଲାର ରହିଛି। ସୂଚନାଯୋଗ୍ୟ ଯେ, ଭାରତୀୟ ଅର୍ଥନୈତିକ ସର୍ବେକ୍ଷଣ ଅନୁଯାୟୀ, ଦେଶରେ ମାସକୁ ୮୦,୦୦୦ ଟଙ୍କା ରୋଜଗାର କରୁଥିବା ଜଣେ ବ୍ୟକ୍ତି ଭାରତର ଶୀର୍ଷ ୧୦ ପ୍ରତିଶତ ଧନୀ ଶ୍ରେଣୀରେ ସାମିଲ ହୋଇଥାଆନ୍ତି।
ଏହି ସନ୍ଦର୍ଭରେ ‘ଫାଉଣ୍ଡେଶନ ଫର୍‌ ଇକୋନୋମିକ ଡେଭେଲପ୍‌ମେଣ୍ଟ’ର ପ୍ରୋଗ୍ରାମ ଆସୋସିଏଟ ଆହୋନା ଦତ୍ତଗୁପ୍ତା କହିଛନ୍ତି ଯେ, ଏହି ତୁଳନା ଭାରତ ଅର୍ଥବ୍ୟବସ୍ଥାର ଏକ ଗଭୀର ସମସ୍ୟାକୁ ଦର୍ଶାଉଛି। ତାହା ହେଉଛି କେବଳ ଗରିବୀ ନୁହେଁ, ବରଂ ସମଗ୍ର ଅର୍ଥବ୍ୟବସ୍ଥାରେ ସାଧାରଣ ଆୟର ନିମ୍ନ ସ୍ତର। ଭାରତରେ ଦୈନିକ ୧୦ ଡଲାର ଖର୍ଚ୍ଚ କରୁଥିବା ବ୍ୟକ୍ତି ଧନୀ ୧୦ ପ୍ରତିଶତଙ୍କ ମଧ୍ୟରେ ଗଣ୍ୟ ହେଉଥିବା ବେଳେ କାନାଡା, ଜାପାନ କିମ୍ବା ଆମେରିକାରେ ଏହି ସମାନ ପରିମାଣ ଜଣେ ବ୍ୟକ୍ତିଙ୍କୁ ସବୁଠାରୁ ଗରିବ ୧୦ ପ୍ରତିଶତଙ୍କ ମଧ୍ୟରେ ରଖିଥାଏ।
ଦତ୍ତଗୁପ୍ତାଙ୍କ ଅନୁଯାୟୀ, ଗରିବ ଭାରତୀୟଙ୍କ ଜୀବନଶୈଳୀରେ ସୁଧାର ଆଣିବା ନିଶ୍ଚିତ ଭାବେ ଆବଶ୍ୟକ, କିନ୍ତୁ ଦେଶକୁ ସମୃଦ୍ଧ କରିବା ପାଇଁ ଏହା ଯଥେଷ୍ଟ ନୁହେଁ। ଯଦି ଗରିବ ବର୍ଗ ଆଜିର ମଧ୍ୟବିତ୍ତ କିମ୍ବା ଧନୀଙ୍କ ସ୍ତରକୁ ଆସନ୍ତି, ତଥାପି ବିଶ୍ୱ ସ୍ତରରେ ସେମାନଙ୍କ ଜୀବନଧାରଣର ମାନ ଧନୀ ଦେଶଗୁଡ଼ିକ ତୁଳନାରେ ଯଥେଷ୍ଟ ପଛରେ ରହିଯିବ। ତେଣୁ ଭାରତ କେବଳ ଧନୀ ଓ ଗରିବଙ୍କ ମଧ୍ୟରେ ଥିବା ବ୍ୟବଧାନ କମାଇବା ପରିବର୍ତ୍ତେ ସମଗ୍ର ଜନସଂଖ୍ୟାର ଆୟ ଏବଂ ଉତ୍ପାଦନ କ୍ଷମତା ବୃଦ୍ଧି କରିବା ଉପରେ ଧ୍ୟାନ ଦେବା ଆବଶ୍ୟକ। ଉତ୍ପାଦନ ବୃଦ୍ଧି ପାଇଁ ନୂତନ ଉଦ୍ଭାବନ ଏବଂ ବ୍ୟବସାୟ ଅନୁକୂଳ ପରିବେଶ ଦରକାର। ନୂତନ ଉଦ୍ୟୋଗୀମାନଙ୍କୁ ସହଜରେ ବ୍ୟବସାୟ ଆରମ୍ଭ କରିବା, ସରଳ ଓ ନିର୍ଦ୍ଦିଷ୍ଟ କର ବ୍ୟବସ୍ଥା ଯୋଗାଇଦେବା ଏବଂ ଅନାବଶ୍ୟକ ସରକାରୀ ଆଇନଗତ ବୋଝକୁ ହ୍ରାସ କରିବା ଜରୁରୀ। ଭାରତ ସରକାର ଆଇନ ସରଳୀକରଣ ଏବଂ କେତେକ ସାମାନ୍ୟ ଭୁଲ୍‌କୁ ଅପରାଧମୁକ୍ତ କରିବା ପାଇଁ ପଦକ୍ଷେପ ନେଇଛନ୍ତି। କିନ୍ତୁ ଭାରତୀୟ ଶିଳ୍ପକୁ ବିଶ୍ୱସ୍ତରରେ ପ୍ରତିଯୋଗୀ କରିବା ପାଇଁ ଆଇନଗତ ଚୁକ୍ତିପତ୍ରର ଶୀଘ୍ର କାର୍ଯ୍ୟକାରିତା ଏବଂ ଶିଳ୍ପ କ୍ଲଷ୍ଟରଗୁଡ଼ିକର ବିକାଶ ପାଇଁ ଆହୁରି ସଂସ୍କାର ଆବଶ୍ୟକ ବୋଲି ବିଶେଷଜ୍ଞମାନେ ମତପ୍ରକାଶ କରିଛନ୍ତି।