ମଧ୍ୟାହ୍ନଭୋଜନରେ ଅନୟମିତତା: ବିଦ୍ୟାଳୟ ଉପସ୍ଥାନ ଖାତାରେ ଅଧିକ ପିଲା, ବାସ୍ତବରେ କମ୍‌

ଝରିଗାଁ,୭ା୧୦(କିଶୋର ଚନ୍ଦ୍ର ମଣ୍ଡଳ): ସରକାରୀ ସ୍କୁଲରେ ନିମ୍ନମାନର ମଧ୍ୟାହ୍ନଭୋଜନ ପ୍ରଦାନ କରାଯାଉଥିବା ବେଳେ କିଛି ଛାତ୍ରୀଛାତ୍ର ସେହି ଭୋଜନ ଖାଉ ନାହାନ୍ତି। ଏପରିକି ଯେଉଁ ପିଲାମାନେ ଅଣ୍ଡା ଖାଉନାହାନ୍ତି, ସେମାନଙ୍କ ପାଇଁ ଭାତ, ଡାଲି ଛଡ଼ା ଆଉ କିଛି ଦିଆଯାଉନାହିଁ। ସେହିପରି ବିଦ୍ୟାଳୟରେ ପିଲାଙ୍କ ଉପସ୍ଥାନ ଖାତାରେ ଉପସ୍ଥିତ ପିଲା ସଂଖ୍ୟାଠାରୁ ୪୦ ପିଲାଙ୍କ ଉପସ୍ଥାନ ଅଧିକ ପକାଯାଇଥିଲା। ଏପରି ଅନିୟମିତତା ନବରଙ୍ଗପୁର ଜିଲା ଝରିଗାଁ ବ୍ଲକ ଫୁପୁଗାଁ ପଞ୍ଚାୟତ ଅନ୍ତର୍ଗତ ତାରାକୋନାଡ଼ି ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟରେ ଦେଖିବାକୁ ମିଳିଛି। ଏହି ବିଦ୍ୟାଳୟରେ ଶିଶୁ ବାଟିକାଠାରୁ ଦଶମ ଶ୍ରେଣୀ ପର୍ଯ୍ୟନ୍ତ ରହିଥିବା ବେଳେ ୨୪୩ ପିଲାଙ୍କ ପାଇଁ ପାଠ ପଢ଼ାଇବା ପାଇଁ ୮ ଜଣ ଶିକ୍ଷୟିତ୍ରୀ ଶିକ୍ଷକ ରହିଛନ୍ତି। ଗତ ସୋମବାର ଉକ୍ତ ବିଦ୍ୟାଳୟରେ ୧୬୪ ଜଣ ଛାତ୍ରୀଛାତ୍ର ଉପସ୍ଥିତ ରହିଥିବା ନେଇ ପିଏମ୍‌ ପୋଷଣ ପୋର୍ଟାଲ (ମଧ୍ୟାହ୍ନ ଭୋଜନ)ରେ ରହିଥିବା ବେଳେ ପ୍ରକୃତରେ ୧୨୪ ଜଣ ପିଲା ଉପସ୍ଥିତ ରହିଥିଲେ। କିନ୍ତୁ କେବଳ ୮୦ ଜଣ ପିଲାଙ୍କ ପାଇଁ ଅଣ୍ଡା ସିଝା ଦିଆଯାଇଥିଲା। ଅଣ୍ଡା ଖାଉଥିବା ପିଲାଙ୍କ ପାଇଁ କୌଣସି ବିକଳ୍ପ ବ୍ୟବସ୍ଥା କରାଯାଇ ନ ଥିଲା। ସେଥିମଧ୍ୟରୁ ୨୭ ଜଣ ଛାତ୍ରୀଛାତ୍ର ମଧ୍ୟାହ୍ନଭୋଜନ ଖାଉ ନ ଥିବା ଦେଖିବାକୁ ମିଳିଥିଲା।

ଏନେଇ ସମ୍ପୃକ୍ତ ଛାତ୍ରୀମାନଙ୍କୁ ପଚାରିବାରୁ କିଛି ମଧ୍ୟ କହି ନ ଥିଲେ। ପିଲାଙ୍କୁ ମାଗଣାରେ ଗୁଣାତ୍ମକ ଶିକ୍ଷା ସହ ପୁଷ୍ଟିକର ମଧ୍ୟାହ୍ନଭୋଜନ ପ୍ରଦାନ କରିବା ନେଇ ସରକାର ପ୍ରଚେଷ୍ଟା ଚଳାଇଥିବାବେଳେ ଶିକ୍ଷା ବିଭାଗର କ୍ଷେତ୍ର ସ୍ତରୀୟ ତଦାରଖ ଅଭାବ ଯୋଗୁ ଆଦିବାସୀ ଅଞ୍ଚଳର ଛାତ୍ରୀଛାତ୍ର ମୌଳିକ ସରକାରୀ ସୁବିଧାରୁ ବଞ୍ଚିତ ରହୁଛନ୍ତି।

ଏନେଇ ସମ୍ପୃକ୍ତ ବିଦ୍ୟାଳୟର ଭାରପ୍ରାପ୍ତ ପ୍ରଧାନଶିକ୍ଷକ ତରୁଣ କୁମାର ରଣାଙ୍କୁ ପଚାରିବାରୁ ନିରୁତ୍ତର ରହିଥିଲେ। ସେହିପରି ବିଇଓ ଉମରସିଂ ନାୟକଙ୍କୁ ପଚାରିବାରୁ ଯଦି ଏପରି ଅନିୟମିତତା ହୋଇଥିବା ତଦନ୍ତରେ ପ୍ରମାଣ ମିଳେ ତେବେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଥିଲେ।