ଯୁବକଙ୍କୁ ଆକ୍ରମଣ ପରେ ଛିନ ତାଇ ଘଟଣା: ଜଣେ ଅଭିଯୁକ୍ତ ଗଲେ ଜେଲ, ସମ୍ପୃକ୍ତ ୩ ନାବାଳକ ଗଲେ ବାଳ ସୁଧାର ଗୃହ

ଦିଗପହଣ୍ଡି,୧।୧୦(ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ଚୁଡୁଙ୍ଗପୁର ଗ୍ରାମ ଶ୍ରୀ ଗଣେଶ ମନ୍ଦିର ସମ୍ମୁଖ ୩୨୬ ନଂ ଜାତୀୟ ରାଜପଥରେ ବାଇକ ଅଟକାଇ ବୁଗୁଡ଼ା ଥାନା କଞ୍ଚୁରୁ ଗ୍ରାମର ଡି.ରଞ୍ଜିତ ପାତ୍ରଙ୍କ ଠାରୁ ମଙ୍ଗଳବାର ରାତି ପ୍ରାୟ ସାଢେ ୯ ଟାରେ ୫ ଜଣ ଦୁର୍ବୃତ୍ତ ମାଡ଼ ମାରି ତାଙ୍କ ହାତରୁ ୩୦ ଗ୍ରାମ ଓଜନର ରୂପା ବ୍ରେସଲେଟ ଏବଂ ୯,୭୦୦ ଟଙ୍କା ଲୁଟି ନେଇଥିବା ଅଭିଯୋଗ ହୋଇଥିଲା। ଏହି ଘଟଣାରେ ତଦନ୍ତକାରୀ ଅଧିକାରୀ ତଥା ଦିଗପହଣ୍ଡି ଥାନା ଏସ.ଆଇ ମହାପ୍ରସାଦ ମହାନ୍ତି ଜଣେ ଅଭିଯୁକ୍ତଙ୍କୁ ଗୁରୁବାର ମଧ୍ୟାହ୍ନ ପ୍ରାୟ ୧୨ ଟାରେ ଗିରଫ କରି ସା ପ୍ରାୟ ସାଢେ ୭ ଟାରେ କୋର୍ଟ ଚାଲାଣ କରିଛନ୍ତି। ଅଭିଯୁକ୍ତ ଜଣକ ହେଲେ ଦିଗପହଣ୍ଡି ଥାନା ଚୁଡୁଙ୍ଗପୁର ଗ୍ରାମର ପି.ବାବୁ ପାତ୍ର(୧୮)। ଥାନା ମାମଲା ନଂ.୪୧୭/୨୬ ବିଏନଏସର ଦଫା- ୩୧୦(୨) ଅନୁଯାୟୀ ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି। ସେହିପରି ଏହି ଛିନ ତାଇ ରାହାଜାନି ଘଟଣାରେ ସମ୍ପୃକ୍ତ ୩ ନାବାଳକଙ୍କୁ ବ୍ରହ୍ମପୁର ସ୍ଥିତ ଜୁଭେନାଇଲ ଜଷ୍ଟିସ ବୋର୍ଡରେ ହାଜର କରାଯିବା ପରେ ଉଭୟଙ୍କୁ ବାଳସୁଧାର ଗୃହକୁ ପଠାଇ ଦିଆଯାଇଛି। ସେମାନଙ୍କ ନିକଟରୁ ରଞ୍ଜିତଙ୍କ ରୂପା ବ୍ରେସଲେଟ ଜବତ କରାଯାଇଛି। ଗତ ମଙ୍ଗଳବାର ରଞ୍ଜିତ ବାଇକ ରେ ତାଙ୍କ ଶ୍ବଶୁର ଘର ଗାଁ ଚୁଡୁଙ୍ଗପୁର ଆସିଥିଲେ। ଗାଁର ହାଇସ୍କୁଲ ପାଖରେ ପୂର୍ବ ଯୋଜନା ପ୍ରକାରେ ପି.ବାବୁ ପାତ୍ର ବାଇକ ଅଟକାଇ ପାଖରେ ଥିବା ୨ ଜଣ ଅଚିହ୍ନା ଯୁବକଙ୍କୁ ସାହସପୁର ଗାଁ ନିକଟରେ ଛାଡ଼ିଦେବାକୁ ଅନୁରୋଧ କରିଥିଲେ। ରଞ୍ଜିତ ୨ ଜଣଙ୍କୁ ବାଇକରେ ବସାଇ ସାହସପୁର ଅଭିମୁଖେ ଯାଉଥିବା ବେଳେ ତାଙ୍କୁ ପିଛା କରି ଅନ୍ୟ ଏକ ବାଇକରେ ୨ ଜଣ ଯୁବକ ତାଙ୍କୁ ରାସ୍ତାରେ ଅଟକାଇ ଥିଲେ। ୪ ଜଣ ଦୁର୍ବୃତ୍ତ ସଂଘବଦ୍ଧ ଭାବେ ରଞ୍ଜିତଙ୍କୁ ମାଡ଼ ମାରି ତାଙ୍କ ହାତରୁ ରୂପା ବ୍ରେସଲେଟ ଛଡାଇ ନେବା ସହ ତାଙ୍କ ପ୍ୟାଣ୍ଟ ପକେଟ ରୁ ୯,୭୦୦ ଟଙ୍କା ଲୁଟି ନେଇ ତାଙ୍କ ବାଇକ ଛଡାଇ ନେବାକୁ ଉଦ୍ୟମ କରିଥିଲେ। ସେ ପାଟି କରିବାରୁ ସେମାନେ ତାଙ୍କୁ ଜୀବନରେ ମାରିଦେବାକୁ ଧମକ ଦେଇ ବାଇକ ଯୋଗେ ଚମ୍ପଟ ମାରିଥିଲେ। ରଞ୍ଜିତ ଶ୍ବଶୁର ଘରେ ପହଞ୍ଚି ସମସ୍ତ ଘଟଣା କହିବା ପରେ ଥାନାରେ ଏତଲା ଦେଇଥିଲେ। ଏତଲାକୁ ଭିତ୍ତିକରି ଆଇଆଇସି କିଶୋର କୁମାର ସାମଲ ଅଭିଯୁକ୍ତ ମାନଙ୍କ ବିରୋଧରେ ମକଦ୍ଦମା ରୁଜୁ କରି ଏସ.ଆଇ ମହା ପ୍ରସାଦ ମହାନ୍ତିଙ୍କୁ ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ।