ହାରୁ ହାରୁ ମ୍ୟାଚ ଜିତିଗଲା ଭାରତ, ଦୀର୍ଘ ନିଃଶ୍ୱାସ ମାରି ଶ୍ରେୟସ ଆୟର କହିଲେ…

ନୂଆଦିଲ୍ଲୀ,୨୨।୯: ମଙ୍ଗଳବାର (୨୨ ସେପ୍ଟେମ୍ବର) ଭାରତ ଓ ଜାପାନ ମଧ୍ୟରେ ଖେଳାଯାଇଥିବା ଐତିହାସିକ ଟି-୨୦ ମ୍ୟାଚ ବେଶ ରୋମାଞ୍ଚକର ରହିଥିଲା। ହାରୁଥିବା ମ୍ୟାଚକୁ ଶେଷରେ ମାତ୍ର ୨ ରନରେ ଜିତି ନେଇଛି ଟିମ ଇଣ୍ଡିଆ। ବର୍ଷା ଯୋଗୁ ମ୍ୟାଚକୁ ୫-୫ ଓଭରରେ ସୀମିତ କରାଯାଇଥିଲା। ଭାରତୀୟ ବ୍ୟାଟରମାନେ ସହଜରେ ବଡ଼ ସ୍କୋର କରି ଏକତରଫା ବିଜୟ ହାସଲ କରିବେ ବୋଲି ଲାଗୁଥିଲେ ମଧ୍ୟ ମ୍ୟାଚ ଶେଷ ପର୍ଯ୍ୟନ୍ତ ରୋମାଞ୍ଚକର ରହିଥିଲା।

ଜାପାନ ବିପକ୍ଷରେ କଷ୍ଟକର ବିଜୟ ପରେ ଭାରତୀୟ ଅଧିନାୟକ ଶ୍ରେୟସ ଆୟର ଆଶ୍ୱସ୍ତିକର ନିଃଶ୍ୱାସ ନେଇଥିଲେ। ମ୍ୟାଚ ପରବର୍ତ୍ତୀ ପ୍ରେଜେଣ୍ଟେସନରେ ସେ ପିଚ୍ର ପରିସ୍ଥିତି ଏବଂ ନିଜ ବ୍ୟାଟିଂ ରଣନୀତି ବିଷୟରେ କହିଥିଲେ।

ଶ୍ରେୟସ କହିଥିଲେ ଯେ ପିଚରେ ବଲ ଭଲ ଭାବେ ଟର୍ନ ହେଉଥିଲା। ଏଭଳି ପରିସ୍ଥିତିରେ ବ୍ୟାଟିଂ କରିବା ସହଜ ନଥିଲା। ଭାରତୀୟ ଓପନରମାନେ ନିୟମିତ ଭାବେ ରନ କରୁଥିଲେ ମଧ୍ୟ ଏହି ପିଚରେ ସ୍ପିନରେ ଗତିକୁ ବୁଝିବାରେ ସେମାନେ ମଧ୍ୟ ସମସ୍ୟାର ସମ୍ମୁଖୀନ ହୋଇଥିଲେ ବୋଲି ଆୟର କହିଥିଲେ। ତାଙ୍କ କହିବାନୁସାରେ, ସତ କହିବାକୁ ଗଲେ ଏହି ପିଚ୍‌ରେ ବ୍ୟାଟିଂ କରିବା ବହୁତ କଷ୍ଟକର ଥିଲା। ପିଚରେ ବ୍ୟାଟରମାନେ ସଂଘର୍ଷ କରୁଥିବା ଦେଖି ଶ୍ରେୟସ ଆକ୍ରମଣାତ୍ମକ ସଟ ବଦଳରେ ସିଙ୍ଗଲ ଓ ଡବଲ ନେଇ ଷ୍ଟ୍ରାଇକ ରୋଟେଟ କରିବାକୁ ଯୋଜନା କରିଥିଲେ।

ସେ କହିଥିଲେ, ମୁଁ କ୍ରିଜକୁ ଆସିବା ପରେ ସିଙ୍ଗଲ ଓ ଡବଲ ନେଇ ଷ୍ଟ୍ରାଇକ ରୋଟେଟ କରିବା ଜରୁରୀ ବୋଲି ସ୍ଥିର କରିଥିଲି। ବଲ ସହ ଖେଳିବି ଏବଂ ପରିସ୍ଥିତି ଅନୁଯାୟୀ ଯୋଜନା କରିବି ବୋଲି ନିଷ୍ପତ୍ତି ନେଇଥିଲି ବୋଲି ଆୟର କହିଛନ୍ତି।