୧୩ରୁ ୨୨ ଯାଏ ୧୦ ଟ୍ରେନ୍‌ ବାତିଲ, କେଉଁ କେଉଁ ଟ୍ରେନ୍‌ ହେଲା ବାତିଲ୍‌ ଜାଣନ୍ତୁ…

ଜୟପୁର,୧୨ା୧୦(ପବନ ପାଣିଗ୍ରାହୀ): କୋରାପୁଟ ଜିଲା ଜୟପୁରସ୍ଥିତ ମାଳିଗୁଡ଼ା ଓ ଛତ୍ରୀପୁଟ ରେଳ ଷ୍ଟେଶନ ମଧ୍ୟରେ ଭୂସ୍ଖଳନ ଯୋଗୁ ଚାଲିଥିବା ପୁନରୁଦ୍ଧାର କାର୍ଯ୍ୟ ପାଇଁ ପୂର୍ବତଟ ରେଲଓ୍ବେ ରାୟଗଡ଼ା ଡିଭିଜନରେ ଟ୍ରେନ୍‌ ଚଳାଚଳ ବାଧାପ୍ରାପ୍ତ ହୋଇଛି।

ଏଥିପାଇଁ ଅକ୍ଟୋବର ୧୩ରୁ ୨୨ ଯାଏ ଅନେକ ଏକ୍ସପ୍ରେସ୍‌ ଓ ପ୍ୟାସେଞ୍ଜର ବାତିଲ କରାଯାଇ ଚଳାଚଳ ପଥ ମଧ୍ୟ ସଂକ୍ଷିପ୍ତ କରାଯାଇଛି। ବୁଲେଟିନ ନଂ.୧୦ ଅନୁଯାୟୀ, ଏହି ସମୟ ମଧ୍ୟରେ ୪ ଏକ୍ସପ୍ରେସ ବାତିଲ ରହିବ। ବିଶାଖାପାଟଣା-କିରଣ୍ଡୁଲ ଏକ୍ସପ୍ରେସ(୧୮୫୧୫) ଓ କିରଣ୍ଡୁଲ-ବିଶାଖାପାଟଣା ଏକ୍ସପ୍ରେସ(୧୮୫୧୬) ଅକ୍ଟୋବର ୧୩ରୁ ୨୦ ଯାଏ ବାତିଲ ରହିବ। ରାଉରକେଲା-ଜଗଦଲପୁର ଏକ୍ସପ୍ରେସ(୧୮୧୦୭) ଅକ୍ଟୋବର ୧୩ରୁ ୨୦ ଯାଏ ଓ ଜଗଦଲପୁର-ରାଉରକେଲା ଏକ୍ସପ୍ରେସ(୧୮୧୦୮) ଅକ୍ଟୋବର ୧୪ରୁ ୨୧ ଯାଏ ବାତିଲ ରହିବ। ଏହି ବାଧା ଯୋଗୁ ଅନ୍ୟ କେତେକ ଟ୍ରେନ ସଂକ୍ଷିପ୍ତ ପଥରେ ଚଳାଚଳ କରିବ। ହାୱଡା-ଜଗଦଲପୁର ଏକ୍ସପ୍ରେସ(୧୮୦୦୫), ଭୁବନେଶ୍ୱର-ଜଗଦଲପୁର ଏକ୍ସପ୍ରେସ(୧୮୪୪୭) ଓ ବିଶାଖାପାଟଣା-କିରଣ୍ଡୁଲ ପାସେଞ୍ଜର(୫୮୫୦୧) ଅକ୍ଟୋବର ୧୩ରୁ ୨୦ ତାରିଖ ଯାଏ କୋରାପୁଟ ଷ୍ଟେଶନରେ ଯାତ୍ରା ଶେଷ କରିବେ। ଶର୍ଟ-ଟର୍ମିନେଟ ହେବେ। ଫେରନ୍ତା ଯାତ୍ରା କ୍ଷେତ୍ରରେ, ଟ୍ରେନ ନଂ ଜଗଦଲପୁର-ହାୱଡା ଏକ୍ସପ୍ରେସ(୧୮୦୦୬) ଅକ୍ଟୋବର ୧୫ରୁ ୨୨ ତାରିଖ ଯାଏ ଜଗଦଲପୁର ପରିବର୍ତ୍ତେ କୋରାପୁଟରୁ ଯାତ୍ରା ଆରମ୍ଭ କରିବ।

ଜଗଦଲପୁର-ଭୁବନେଶ୍ୱର ଏକ୍ସପ୍ରେସ(୧୮୪୪୮) ଅକ୍ଟୋବର ୧୪ରୁ ୨୧ ତାରିଖ ଯାଏ ଓ କିରଣ୍ଡୁଲ-ବିଶାଖାପାଟଣା ପାସେଞ୍ଜର(୫୮୫୦୨) ଅକ୍ଟୋବର ୧୩ରୁ ୨୦ ତାରିଖ ପର୍ଯ୍ୟନ୍ତ କୋରାପୁଟରୁ ଯାତ୍ରା ଆରମ୍ଭ କରିବ। ନିର୍ଦ୍ଦିଷ୍ଟ ସମୟସୀମା ମଧ୍ୟରେ ଉଲ୍ଲେଖ କରାଯାଇଥିବା ଟ୍ରେନ୍‌ଗୁଡ଼ିକ ପାଇଁ କୋରାପୁଟ-ଜଗଦଲପୁର ସେକ୍ସନ୍‌ରେ ଉଭୟ ଦିଗର ସେବା ପ୍ରଭାବିତ ହେବ ବୋଲି ରେଳଓ୍ବେ କର୍ତ୍ତୃପକ୍ଷ ସ୍ପଷ୍ଟ କରିଛନ୍ତି। ପ୍ରଭାବିତ ରୁଟ୍‌ରେ ଯାତ୍ରା କରୁଥିବା ଯାତ୍ରୀମାନେ ଯାତ୍ରା ଆରମ୍ଭ କରିବା ପୂର୍ବରୁ ଟ୍ରେନ ସମ୍ବନ୍ଧୀୟ ସବିଶେଷ ସୂଚନା ଯାଞ୍ଚ କରିବାକୁ ପରାମର୍ଶ ଦିଆଯାଇଛି।