୮% ମହଙ୍ଗା ହେବ ଗୃହୋପକରଣ, ଇଲେକ୍‌ଟ୍ରୋନିକ୍ସ ସାମଗ୍ରୀ

ନୂଆଦିଲ୍ଲୀ,୨୮ା୯: ସାଧାରଣତଃ ପାର୍ବଣ ସମୟରେ ଭାରତୀୟ ବଜାରରେ ଅଧିକ କାରବାର ହୋଇଥାଏ। କାରଣ ଦଶହରା ଏବଂ ଦୀପାବଳିରେ ଲୋକମାନେ ଅନେକ କିସମର ଗୃହ ଉପକରଣ ଏବଂ ଇଲେକଟ୍ରୋନିକ୍ସ ସାମଗ୍ରୀ ଘରକୁ ଆଣିବାକୁ ଶ୍ରେୟ ମଣିଥାଆନ୍ତି। କିନ୍ତୁ ଚଳିତ ବର୍ଷ ପାର୍ବଣରେ ଗ୍ରାହକମାନଙ୍କୁ ଏସବୁ ଜିନିଷ ପାଇଁ ଅଧିକ ଖର୍ଚ୍ଚାନ୍ତ ହେବାକୁ ପଡ଼ିବ। କାରଣ ପ୍ରମୁଖ ଗୃହ ଉପକରଣ (ହୋମ୍‌ ଆପ୍ଲାଏନ୍ସେସ) ଏବଂ କଞ୍ଜ୍ୟୁମର ଇଲେକ୍ଟ୍ରୋନିକ୍ସ କମ୍ପାନୀ ଆସନ୍ତା ଅକ୍ଟୋବର ୧ ତାରିଖରୁ ସେମାନଙ୍କ ଉତ୍ପାଦ ମୂଲ୍ୟ ବୃଦ୍ଧି କରିବାକୁ ଯାଉଛନ୍ତି। ଏହି କ୍ରମରେ ଏୟାର କଣ୍ଡିଶନର (ଏସି), ଏଲ୍‌ଇଡି ଟିଭି ଏବଂ ୱାଶିଂ ମେଶିନ ଭଳି ଅନେକ ଗୃହ ଉପକରଣ ଓ ଇଲେକଟ୍ରୋନିକ୍ସ ସାମଗ୍ରୀ ମୂଲ୍ୟ ବୃଦ୍ଧି ପାଇବ। ପଶ୍ଚିମ ଏସିଆରେ ଚାଲିଥିବା ଭୂ-ରାଜନୈତିକ ଅଶାନ୍ତି ଯୋଗୁ ଧାତୁ ମୂଲ୍ୟ ଆକାଶଛୁଆଁ ହେବା ଏବଂ ମୁଦ୍ରା ବିନିମୟ ହାରରେ ଅସ୍ଥିରତାକୁ ନେଇ ଅନେକ ପ୍ରମୁଖ କମ୍ପାନୀଙ୍କ ଉତ୍ପାଦନ ଖର୍ଚ୍ଚ ବୃଦ୍ଧି ପାଇଥିବାରୁ ସେମାନେ ଉତ୍ପାଦ ମୂଲ୍ୟ ବୃଦ୍ଧି କରିବାକୁ ବାଧ୍ୟ ହୋଇଥିବା କହିଛନ୍ତି। କେବଳ ଏଥରକ ନୁହେଁ, ମଧ୍ୟପ୍ରାଚ୍ୟ ସଙ୍କଟକୁ ନେଇ ଚଳିତ ବର୍ଷ ସମ୍ପୃକ୍ତ ଶିଳ୍ପ କ୍ଷେତ୍ରରେ ତୃତୀୟ ଥର ପାଇଁ ମୂଲ୍ୟ ବୃଦ୍ଧି ହେବ। ପୂର୍ବରୁ ଦୁଇଟି ପର୍ଯ୍ୟାୟରେ ବିଭିନ୍ନ ସାମଗ୍ରୀ ମୂଲ୍ୟ ବୃଦ୍ଧି ପାଇସାରିଛି। ତମ୍ବା, ଇସ୍ପାତ, ଆଲୁମିନିୟମ ଏବଂ ଅଶୋଧିତ ତୈଳଜାତ ଦ୍ରବ୍ୟ ଭଳି ପ୍ରମୁଖ କଞ୍ଚାମାଲର ମୂଲ୍ୟରେ ଅହେତୁକ ବୃଦ୍ଧି ସହିତ ମାଲ୍‌ ପରିବହନ ଖର୍ଚ୍ଚ ବଢ଼ିବା ଯୋଗୁଏହି ନିଷ୍ପତ୍ତି ନିଆଯାଇଛି। ଏୟାର କଣ୍ଡିଶନର ମୂଲ୍ୟରେ ୫ ରୁ ୮ ପ୍ରତିଶତ ବୃଦ୍ଧି ଘଟିବା ସହିତ ୱାଶିଂ ମେଶିନ, ରେଫ୍ରିଜରେଟର ଏବଂ ଏଲ୍‌ଇଡି ଟିଭିର ଦାମ୍‌ ମଧ୍ୟ ୩ ରୁ ୪ ପ୍ରତିଶତ ବଢ଼ିବ ବୋଲି କୁହାଯାଇଛି। ଅନ୍ୟ କେତେକ କମ୍ପାନୀ ସାମଗ୍ରିକ ପ୍ରଭାବକୁ ଆକଳନ କରିବା ପାଇଁ ବର୍ତ୍ତମାନ ପରିସ୍ଥିତି ଉପରେ ନଜର ରଖିଛନ୍ତି।
ଅଗଷ୍ଟ ଏବଂ ସେପ୍ଟେମ୍ବରରେ ଚାଲିଥିବା ‘ପ୍ରି-ବାଇଙ୍ଗ ସ୍କିମ୍‌’ ଯୋଗୁ ପୁରୁଣା ଦରରେ କିଣାଯାଇଥିବା ଷ୍ଟକ୍‌ ଉପଲବ୍ଧ ରହିଛି, ଯାହାଫଳରେ ଦୀପାବଳି ପର୍ଯ୍ୟନ୍ତ ଖୁଚୁରା ମୂଲ୍ୟ ସ୍ଥିର ରହିପାରେ। କିନ୍ତୁ ପାର୍ବଣ ଋତୁ ଶେଷ ଭାଗରେ ନୂତନ ମୂଲ୍ୟ ସମ୍ପୂର୍ଣ୍ଣ ରୂପେ ଲାଗୁ ହେବ। ପିଟିଆଇ ରିପୋର୍ଟ ଅନୁଯାୟୀ, ବ୍ଲୁ ଷ୍ଟାର୍‌, ଗୋଦରେଜ ଆପ୍ଲାଏନ୍ସ, ହାୟର, ଡାଇକିନ ଏବଂ ସୁପର ପ୍ଲାଷ୍ଟ୍ରୋନିକ୍ସ ଭଳି ପ୍ରମୁଖ କମ୍ପାନୀଗୁଡ଼ିକ ୪ ରୁ ୧୦ ପ୍ରତିଶତ ପର୍ଯ୍ୟନ୍ତ ମୂଲ୍ୟ ବୃଦ୍ଧି କରିବାକୁ ନିଶ୍ଚିତ କରିଛନ୍ତି କିମ୍ବା ଏହାକୁ ଲାଗୁ କରିସାରିଛନ୍ତି। ଏହା ସହିତ ଏଲ୍‌ଜି ଏବଂ ବସ ହୋମ କମ୍ଫର୍ଟ (ହିଟାଚି) ଏୟାର କଣ୍ଡିଶନର ମୂଲ୍ୟ ପ୍ରାୟ ୫ ପ୍ରତିଶତ ବୃଦ୍ଧି କରିସାରିଥିବା ବେଳେ ବ୍ଲୁ ଷ୍ଟାର୍‌ ଏସି ଏବଂ ଡିପ୍‌ ଫ୍ରିଜର ମୂଲ୍ୟ ଇତିମଧ୍ୟରେ ୫ ରୁ ୮ ପ୍ରତିଶତ ବଢ଼ିସାରିଥିବା କୁହାଯାଇଛି।