Voter Roll Row Turns Political: ଭୋଟର ତାଲିକାରୁ ରାଘବ ଚଢ଼ାଙ୍କ ନାଁ ବାଦ, ଆପ ଆଣିଲା ପାଲଟା ଅଭିଯୋଗ

ରାଜ୍ୟସଭା ସାଂସଦ ରାଘବ ଚଢ଼ାଙ୍କ ନାଁ ପଞ୍ଜାବର ଡ୍ରାଫ୍ଟ ଭୋଟର ତାଲିକାରୁ ବାଦ ପଡ଼ିବାକୁ ନେଇ ରାଜନୈତିକ ବିବାଦ ତୀବ୍ର ହୋଇଛି। ନିର୍ବାଚନ କମିଶନଙ୍କ ଚାଲିଥିବା ଏସଆଇଆର ପ୍ରକ୍ରିୟାରେ ରାଘବ ଚଢ଼ାଙ୍କ ନାଁକୁ ‘ପର୍ମାନେଣ୍ଟଲି ସିଫ୍ଟେଡ’ ବା ‘ସ୍ଥାୟୀ ଭାବେ ସ୍ଥାନାନ୍ତର’ ବୋଲି ଚିହ୍ନଟ କରାଯାଇଛି। ଏହାକୁ ନେଇ ରାଘବ ଚଢ଼ା ଆମ୍ ଆଦମୀ ପାର୍ଟି ସରକାର ଉପରେ ‘ରାଜନୈତିକ ପ୍ରତିଶୋଧ’ର ଅଭିଯୋଗ ଆଣିଛନ୍ତି। 

ଅଗଷ୍ଟ ୧୩ରେ ପ୍ରକାଶିତ ଏସଆଇଆର ଡ୍ରାଫ୍ଟ ତାଲିକାର ‘ଅନୁପସ୍ଥିତ, ସ୍ଥାନାନ୍ତରିତ, ମୃତ ଏବଂ ନକଲ/ଦ୍ୱିତୀୟ ଏଣ୍ଟ୍ରି’ ବର୍ଗରେ ରାଘବ ଚଢ଼ାଙ୍କ ନାଁ ରହିଛି। ତାଙ୍କ ନାଁ ସାମ୍ନାରେ କାରଣ ଭାବେ ‘ସ୍ଥାୟୀ ଭାବେ ସ୍ଥାନାନ୍ତର’ଉଲ୍ଲେଖ ରହିଛି। ଏହି ଡ୍ରାଫ୍ଟ ତାଲିକାରୁ ପଞ୍ଜାବର ପ୍ରାୟ ୨୦.୬୬ ଲକ୍ଷ ଭୋଟରଙ୍କ ନାଁ ବିଭିନ୍ନ କାରଣରୁ ବାଦ ଦିଆଯାଇଛି।

ଚଢ଼ାଙ୍କ କହିବା ଅନୁସାରେ, ତାଙ୍କ ଭୋଟର ଆଇଡି ମୋହାଲିରେ ପଞ୍ଜୀକୃତ ଥିବା ସତ୍ତ୍ୱେ ତାଙ୍କୁ ‘ସ୍ଥାନାନ୍ତର’ଭାବେ ଚିହ୍ନଟ କରାଯିବା ଠିକ୍ ନୁହେଁ। ସେ ଏହାକୁ କେବଳ ଏକ ‘ଦପ୍ତରୀୟ ତ୍ରୁଟି’ ନୁହେଁ, ବରଂ ରାଜନୈତିକ ପ୍ରତିଶୋଧ ବୋଲି ଅଭିଯୋଗ କରିଛନ୍ତି। ଡ୍ରାଫ୍ଟ ତାଲିକା ହୋଇଥିବାରୁ ଦାବି ଓ ଆପତ୍ତି ଜଣାଇବାର ବ୍ୟବସ୍ଥା ରହିଛି ବୋଲି ମଧ୍ୟ ସେ କହିଛନ୍ତି। 

ତେବେ ଚଢ଼ାଙ୍କ ଏହି ଅଭିଯୋଗକୁ ଆପ ଖଣ୍ଡନ କରିଛି। ଦଳ କହିଛି, ଭୋଟର ତାଲିକାର ଏସଆଇଆର ପ୍ରକ୍ରିୟା ନିର୍ବାଚନ କମିଶନଙ୍କ ଅଧୀନରେ ହେଉଛି ଏବଂ ଭୋଟରଙ୍କ ନାଁ ଯୋଡ଼ିବା କିମ୍ବା ବାଦ ଦେବାରେ ପଞ୍ଜାବ ସରକାରଙ୍କ କୌଣସି ଭୂମିକା ନାହିଁ। 

ଏହା ସହ ଆପ ରାଘବ ଚଢ଼ାଙ୍କ ଉପରେ ଏକ ପାଲଟା ଅଭିଯୋଗ ଆଣିଛି। ଦଳର ଦାବି ଅନୁସାରେ, ରାଘବ ଚଢ଼ା ଦିଲ୍ଲୀର ରାଜିନ୍ଦର ନଗର ଅଞ୍ଚଳରେ ନିଜର ଭୋଟର ପଞ୍ଜୀକରଣ କରାଇବା ପାଇଁ ପଛୁଆ ତାରିଖ ଦର୍ଶାଇ ପ୍ରକ୍ରିୟା ଆରମ୍ଭ କରିଥିଲେ। ଅର୍ଥାତ୍, ଆବେଦନ କିମ୍ବା ପଞ୍ଜୀକରଣର ପ୍ରକୃତ ସମୟଠାରୁ ପୂର୍ବର ତାରିଖ ଦର୍ଶାଇବାକୁ ଚେଷ୍ଟା କରାଯାଇଥିବା ବୋଲି AAP ଅଭିଯୋଗ କରୁଛି। ଆପ ଆହୁରି ଦାବି କରିଛି ଯେ, ଯଦି ଭୋଟର ପଞ୍ଜୀକରଣରେ ଏଭଳି ପଛୁଆ ତାରିଖ ବ୍ୟବହାର କିମ୍ବା ନିୟମ ବିରୋଧୀ ପ୍ରକ୍ରିୟା ହୋଇଥାଏ, ତେବେ ଏହାର ଉଚିତ ତଦନ୍ତ କରାଯିବା ଦରକାର।