ଅକ୍ଟୋବର ୧୦ ଆନ୍ଦୋଳନ ପୂର୍ବରୁ CJPର ବଡ଼ ଘୋଷଣା, ସୌରଭ ଦାସ କହିଲେ Gen Z….

ନୂଆଦିଲ୍ଲୀ,୬।୧୦: ଦିଲ୍ଲୀରେ ଅକ୍ଟୋବର ୧୦ ତାରିଖରେ ବଡ଼ ଯୁବ ଆନ୍ଦୋଳନ କରିବାକୁ ଘୋଷଣା କରିଛି କକରୋଚ୍ ଜନତା ପାର୍ଟି (CJP)। ଦଳର ପ୍ରବକ୍ତା ସୌରଭ ଦାସ କହିଛନ୍ତି, ଏହି ଆନ୍ଦୋଳନର ଡାକ ଦଳ ଦେଇଥିଲେ ମଧ୍ୟ ଏହା ଦେଶର ଯୁବପିଢ଼ି ଓ Gen Zଙ୍କ ସ୍ୱର। ଭୋଟ୍ ଦେବାର ଅଧିକାର ଏବଂ ଉନ୍ନତ ବ୍ୟବସ୍ଥା ଦାବିରେ ଯୁବପିଢ଼ି ରାସ୍ତାକୁ ଓହ୍ଲାଇବେ ବୋଲି ସୌରଭ ଦାସ ଏକ୍ସରେ ପୋଷ୍ଟ କରି କହିଛନ୍ତି ।

ସୌରଭ ଦାସ ନିର୍ବାଚନ ପ୍ରକ୍ରିୟାକୁ ନେଇ ମଧ୍ୟ ପ୍ରଶ୍ନ ଉଠାଇଛନ୍ତି । ଭୋଟର ତାଲିକାରୁ ନାଁ ହଟାଯିବା ଯୋଗୁଁ ଯୁବପିଢ଼ିର ଭୋଟ୍ ଦେବା ଅଧିକାର ପ୍ରଭାବିତ ହୋଇପାରେ ବୋଲି ସେ ଅଭିଯୋଗ କରିଛନ୍ତି । ଏହି ପ୍ରସଙ୍ଗକୁ ସେ ବେକାରୀ ସମସ୍ୟା ସହ ମଧ୍ୟ ଯୋଡ଼ିଛନ୍ତି। ତାଙ୍କ କହିବା ଅନୁଯାୟୀ, ଯଦି ଯୁବପିଢ଼ି ଭୋଟ୍ ମାଧ୍ୟମରେ ବ୍ୟବସ୍ଥାରେ ପରିବର୍ତ୍ତନ ଆଣିପାରିବେ ନାହିଁ, ତେବେ ବେକାରୀ ଭଳି ସମସ୍ୟାର ସମାଧାନ କିପରି ହେବ?

CJP ପକ୍ଷରୁ ମୁଖ୍ୟ ନିର୍ବାଚନ କମିଶନର (CEC) ଜ୍ଞାନେଶ କୁମାରଙ୍କ ଇସ୍ତଫା ଦାବି ମଧ୍ୟ କରାଯାଇଛି । ଜ୍ଞାନେଶ କୁମାର ଇସ୍ତଫା ନଦେବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ଦଳ ପକ୍ଷରୁ କୁହାଯାଇଛି।ଦଳ ସହ ଜଡ଼ିତ କର୍ମୀଙ୍କୁ ଅଟକ କିମ୍ବା ଗିରଫ କରାଗଲେ ମଧ୍ୟ ଆନ୍ଦୋଳନ ଜାରି ରହିବ ବୋଲି ସୌରଭ ଦାସ କହିଛନ୍ତି । ଯୁବପିଢ଼ିଙ୍କୁ ନିଜ ଅଧିକାର ପାଇଁ ସ୍ୱର ଉଠାଇବାକୁ ସେ ଆହ୍ୱାନ ଦେଇଛନ୍ତି।

ଏହି ଆନ୍ଦୋଳନ ଏବେ ନିର୍ବାଚନୀ ଅଧିକାର ଓ ଭୋଟର ତାଲିକା ପ୍ରସଙ୍ଗକୁ କେନ୍ଦ୍ର କରିଛି । ଏହା ପୂର୍ବରୁ ଅକ୍ଟୋବର ୨ରେ ମୁମ୍ବାଇର ଶିବାଜୀ ପାର୍କରେ ମଧ୍ୟ CJP ପକ୍ଷରୁ ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ପ୍ରଦର୍ଶନ କରାଯାଇଥିଲା। ଏବେ ଅକ୍ଟୋବର ୧୦ରେ ଦିଲ୍ଲୀରେ ବଡ଼ ପ୍ରଦର୍ଶନ ପାଇଁ ଡାକରା ଦିଆଯାଇଛି ।