କଳିଙ୍ଗା ଘାଟିରେ ପରିବହନ ମନ୍ତ୍ରୀ: ବିକଳ୍ପ ରାସ୍ତା ନିର୍ମାଣ ଓ ଘାଟି ରାସ୍ତା ମରାମତି ନେଇ ଅନୁଧ୍ୟାନ

ଭଞ୍ଜନଗର, ୨୬/୯ (ବାବୁଲା ପ୍ରଧାନ): ଲଗାଣ ବର୍ଷା ଯୋଗୁଁ ଗଞ୍ଜାମ-କନ୍ଧମାଳ ଜିଲା ସୀମାରେ ଥିବା କଳିଙ୍ଗା ଘାଟିର ଦୁଇଟି ସ୍ଥାନରେ ଭୂସ୍ଖଳନ ହେବାରୁ ବିଗତ ୫ ଦିନ ହେଲା ଘାଟି ରାସ୍ତା ବନ୍ଦ ରହିଛି। ଫଳରେ ୧୫ଟି ଜିଲାର ଯାତାୟାତ ବ୍ୟବସ୍ଥା ପ୍ରଭାବିତ ହୋଇଛି। ଘାଟି ରାସ୍ତା କେବେ ସ୍ୱାଭାବିକ ହେବ, ତାହା ଏଯାଏ ସ୍ପଷ୍ଟ ହୋଇନାହିଁ।

ଏଭଳି ପରିସ୍ଥିତିରେ ଶନିବାର ରାଜ୍ୟ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା କଳିଙ୍ଗା ଘାଟି ପରିଦର୍ଶନ କରି ସ୍ଥିତି ଅନୁଧ୍ୟାନ କରିଥିଲେ। ଏହାପରେ ସେ କଳିଙ୍ଗା ଘାଟିର ପ୍ରସ୍ତାବିତ ବିକଳ୍ପ ରାସ୍ତା ବୁଲି ଦେଖିବା ସହ ଏହାର ନିର୍ମାଣ ସମ୍ପର୍କରେ ଅଧିକାରୀଙ୍କ ସହ ଆଲୋଚନା କରିଥିଲେ।

ଖବରଦାତାଙ୍କ ସହ ଆଲୋଚନା ସମୟରେ ମନ୍ତ୍ରୀ କହିଥିଲେ ଯେ, କଳିଙ୍ଗା ଘାଟି ରାସ୍ତା ଆଉ ସୁରକ୍ଷିତ ନୁହେଁ। ତେବେ ବିକଳ୍ପ ରାସ୍ତା ନିର୍ମାଣ ନ ହେବା ପର୍ଯ୍ୟନ୍ତ ଏହି ରାସ୍ତା ଉପରେ ନିର୍ଭର କରିବାକୁ ପଡ଼ିବ। ବୈଷୟିକ ଟିମ୍‌ ଅନୁଧ୍ୟାନ କରିବା ପରେ ଘାଟି ରାସ୍ତାକୁ ଯଥାଶୀଘ୍ର ସ୍ୱାଭାବିକ କରିବା ପାଇଁ ପଦକ୍ଷେପ ନିଆଯାଉଛି। ଏହି ରାସ୍ତା ବନ୍ଦ ହେବା ଯୋଗୁଁ ୧୫ଟି ଜିଲା ପ୍ରଭାବିତ ହୋଇଥିବାରୁ ସରକାର ସବୁ ଦିଗକୁ ବିଚାର କରି ତ୍ୱରିତ ପଦକ୍ଷେପ ନେଉଛନ୍ତି ବୋଲି ସେ କହିଥିଲେ।

ପରିବହନ ମନ୍ତ୍ରୀଙ୍କ ଗସ୍ତ ସମୟରେ କନ୍ଧମାଳ ଜିଲା ଜି. ଉଦୟଗିରି ବିଧାୟକ, ଗଞ୍ଜାମ ଜିଲାପାଳ ଭି. କୀର୍ତ୍ତି ଭାସନ, ଭଞ୍ଜନଗର ଉପଜିଲାପାଳ ଉମାଶଙ୍କର ବେହେରା, ଭଞ୍ଜନଗର ଅତିରିକ୍ତ ଉପଜିଲାପାଳ ପ୍ରଧାନ ଟୁଲିଆମ୍ମା, ଭାରପ୍ରାପ୍ତ ତହସିଲଦାର ଅବିନାଶ ମହାର, ବିଡିଓ ଭାରତୀ ଦେବୀ, ଭଞ୍ଜନଗର ଘୁମୁସର ଉତ୍ତର ବନଖଣ୍ଡ ଅଧିକାରୀ ହିମାଂଶୁ ଶେଖର ମହାନ୍ତି, ଏସିଏଫ୍‌ ବିମଳ କୁମାର ପ୍ରଧାନ, ଭଞ୍ଜନଗର ଆଞ୍ଚଳିକ ପରିବହନ ଅଧିକାରୀ ଭାଗିରଥି ନାୟକ, ଏମ୍‌ପି ପ୍ରତିନିଧି ସନ୍ତୋଷ ତିଆଡି, ଧୋବା ଗୌଡ଼, ଶିବ ଶଙ୍କର ପ୍ରଧାନଙ୍କ ସମେତ ପୂର୍ତ୍ତ, ବ୍ଲକ ଓ ଜାତୀୟ ରାଜପଥ ବିଭାଗର ଅଧିକାରୀମାନେ ଉପସ୍ଥିତ ଥିଲେ।

ଅପରପକ୍ଷେ, ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ କିଛି ଗୁରୁତ୍ୱପୂର୍ଣ୍ଣ କାର୍ଯ୍ୟରେ ଭଞ୍ଜନଗର ବାହାରେ ଥିବାରୁ ଶନିବାର ଘଟଣାସ୍ଥଳକୁ ଯାଇପାରି ନ ଥିବା ଜଣାପଡ଼ିଛି। ତେବେ ସେ ବିଭାଗୀୟ ଅଧିକାରୀଙ୍କ ସହ ଘାଟି ରାସ୍ତା ସମସ୍ୟା ସମ୍ପର୍କରେ ବାରମ୍ବାର ଆଲୋଚନା କରୁଥିବା ଜଣାପଡ଼ିଛି।

କିଛି ମାସ ପୂର୍ବେ ବିଧାୟକ ପ୍ରଦ୍ୟୁମ୍ନ କୁମାର ନାୟକ ପ୍ରସ୍ତାବିତ ବିକଳ୍ପ ରାସ୍ତା ଅନୁଧ୍ୟାନ କରିବାକୁ ଯାଇଥିଲେ। ପରେ ସେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସହ ଘାଟିର ବିକଳ୍ପ ରାସ୍ତା ନିର୍ମାଣ ସମ୍ପର୍କରେ ଆଲୋଚନା କରିଥିଲେ। ଏହାପରେ ପ୍ରଶାସନ ପକ୍ଷରୁ ବିକଳ୍ପ ରାସ୍ତା ନିର୍ମାଣ ଯୋଜନା ଚାଲିଥିବା ଜଣାପଡ଼ିଛି।ଏହି ଗସ୍ତ ସମୟରେ ଏସ୍‌ଡିପିଓ ଡ. ଦୀପକ କୁମାର ମିଶ୍ର ଓ ଥାନା ଅଧିକାରୀ ଜୀବନାନନ୍ଦ ଜେନା ମଧ୍ୟ ଉପସ୍ଥିତ ଥିଲେ।