ଅମିତାଭଙ୍କ ସାମ୍ନାରେ ଭାବପ୍ରବଣ ହୋଇପଡ଼ିଲେ ରାଜକୁମାର: କହୁ କହୁ କହିଦେଲେ…

ମୁମ୍ବାଇ:ଲୋକପ୍ରିୟ କୁଇଜ ରିଆଲିଟି ଶୋ’ ‘କୌନ ବନେଗା କରୋଡପତି’ ସିଜନ ୧୮ର ମଞ୍ଚ କେବଳ ଜ୍ଞାନ ଓ ପୁରସ୍କାରରେ ସୀମିତ ନୁହେଁ। ଅନେକ ସମୟରେ ଏଠାରେ ଅତିଥିଙ୍କ ଜୀବନର ସଂଘର୍ଷ ଓ ଅନେକ ଅକୁହା କାହାଣୀ ମଧ୍ୟ ସାମ୍ନାକୁ ଆସିଥାଏ। ଏହିପରି କିଛି ଦେଖିବାକୁ ମିଳିଥିଲା କେବିସି ୧୮ର ଏକ ଏପିସୋଡରେ। ଅଭିନେତା ରାଜକୁମାର ରାଓ ତାଙ୍କ ଆଗାମୀ ଫିଲ୍ମ ‘ପ୍ରହାର’ର ସହ-କଳାକାର ୱାମିକା ଗବ୍ବୀ ଓ ଉଜ୍ଜ୍ୱଳ ନିକମଙ୍କ ସହ ହଟ ସିଟ୍‌ରେ ପହଞ୍ଚିଥିଲେ। ଶୋ’ର ହୋଷ୍ଟ ଅମିତାଭ ବଚ୍ଚନଙ୍କ ସାମ୍ନାରେ ବସିବା ପରେ ରାଜକୁମାର ତାଙ୍କ ସଂଘର୍ଷମୟ ଦିନଗୁଡ଼ିକୁ ମନେ ପକାଇଥିଲେ। ଅଭିନୟ ପ୍ରତି ତାଙ୍କର ଆଗ୍ରହ ଖୁବ କମ ବୟସରୁ ଥିଲା ବୋଲି କହିଥିଲେ।

ଏହି କାର୍ଯ୍ୟକ୍ରମରେ ଶାହରୁଖଙ୍କ ପ୍ରସଙ୍ଗ ଉଠିବା ପରେ ରାଜକୁମାର କହିଥିଲେ ଯେ, ଦିଲ୍ଲୀରୁ ଆସିଥିବା ଶାହରୁଖଙ୍କ ସଂଘର୍ଷ ତାଙ୍କୁ ଅନେକ ପ୍ରେରଣା ଦେଇଥିଲା। ମଧ୍ୟବିତ୍ତ ପରିବାରର ଜଣେ ଯୁବକ ଦିଲ୍ଲୀରୁ ମୁମ୍ବାଇ ଆସି ଥିଏଟର ଓ ଟେଲିଭିଜନ୍‌ରେ କାମ କରିବା ପରେ କିପରି ବଡ଼ ଷ୍ଟାର ହୋଇଥିଲେ, ତାହା ରାଜକୁମାରଙ୍କୁ ପ୍ରଭାବିତ କରିଥିଲା। କେବଳ ଶାହରୁଖ ନୁହେଁ, ଅମିତାଭ ବଚ୍ଚନଙ୍କର ପୋଷ୍ଟର ସବୁବେଳେ ତାଙ୍କ ଘରେ ଲାଗୁଥିଲା। ଅମିତାଭଙ୍କ ଅଭିନୟ ଓ ସଫଳତା ତାଙ୍କ ସମେତ ଅନେକଙ୍କୁ ପ୍ରେରଣା ଦେଇଥିଲା।

ମୁମ୍ବାଇରେ ନିଜର ପ୍ରଥମ ଦିନକୁ ମନେ ପକାଇ ରାଜକୁମାର କହିଥିଲେ, ଏକ ଶୋ’ ପାଇଁ ଅଡିସନ ଦେବାକୁ ସେ ପ୍ରଥମେ ମୁମ୍ବାଇ ଆସିଥିଲେ। କିନ୍ତୁ ଅଡିସନରେ ତାଙ୍କର ଚୟନ ହୋଇ ନ ଥିଲା। ରିଜେକ୍ସନ ପରେ ମଧ୍ୟ ସେ ନିରାଶ ହୋଇ ଫେରିଯାଇ ନ ଥିଲେ। ସେହି ସମୟରେ ସେ ଅମିତାଭଙ୍କ ‘ଜଲସା’ ଏବଂ ଶାହରୁଖ ଖାନଙ୍କ ‘ମନ୍ନତ’ ବଙ୍ଗଳା ସାମ୍ନାରେ ଛିଡ଼ା ହୋଇ ନିଜ ପ୍ରିୟ ଅଭିନେତାଙ୍କୁ ଦେଖିବାର ଆଶା ରଖୁଥିଲେ। ଆଜି ରାଜକୁମାର ବଲିଉଡ୍‌ର ଜଣେ ପରିଚିତ ଅଭିନେତା।