ଗୁଣି ସନ୍ଦେହରେ ଯୁବକଙ୍କୁ ପିଟିପିଟି ହତ୍ୟା ଘଟଣା: ୧୨ଜଣଙ୍କୁ ବାନ୍ଧିଲା ପୋଲିସ

ମୋହନା, ୨୮।୯(ମନ୍ମଥ ମିଶ୍ର):ଗୁଣି କରି ଲୋକଙ୍କୁ ମାରୁଥିବା ସନ୍ଦେହରେ ଜଣେ ଯୁବକଙ୍କୁ ପିଟିପିଟି ହତ୍ୟା କରିବା ପରେ ଜଙ୍ଗଲରେ ପୋଡ଼ିଦେବା ଅଭିଯୋଗ ହୋଇଛି। ଗଜପତି ଜିଲା ମୋହନା ଥାନା ଅନ୍ତର୍ଗତ ମେରାପଲ୍ଲୀ ପଞ୍ଚାୟତର ମେରାମା ଗାଁରେ ଏହି ଘଟଣା ଘଟିଛି। ଘଟଣାରେ ମୋହନା ପୋଲିସ ୧୨ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି।

ସୂଚନା ଅନୁସାରେ, ମେରାମା ଗାଁଠାରୁ ପ୍ରାୟ ଦୁଇ କିଲୋମିଟର ଦୂର ଜଙ୍ଗଲରେ ରହୁଥିବା ରାମଚନ୍ଦ୍ର ମଳିକଙ୍କୁ ଗତ ରବିବାର ରାତି ପ୍ରାୟ ୨ଟା ସମୟରେ କିଛି ଯୁବକ ଏକ ସ୍ବୟଂ ସହାୟକ ଗୋଷ୍ଠୀ ମାଧ୍ୟମରେ ଟଙ୍କା ମିଳିବ ବୋଲି କହି ଘରୁ ଡାକି ନେଇଥିଲେ। ପରେ ଗାଁରେ ଏକ ବୈଠକ କରାଯାଇଥିଲା।

ମୃତକଙ୍କ ପତ୍ନୀ କଳାବତୀ ମଳିକଙ୍କ ଅଭିଯୋଗ ଅନୁସାରେ, ପୂର୍ବାହ୍ନ ପ୍ରାୟ ୫ଟା ସମୟରେ ଗୁଣି କରୁଥିବା ସନ୍ଦେହରେ ରାମଚନ୍ଦ୍ରଙ୍କୁ ଲୁଙ୍ଗିରେ ବେକ ଚିପି ଶ୍ୱାସରୁଦ୍ଧ କରିବା ସହ ପିଟିପିଟି ହତ୍ୟା କରାଯାଇଥିଲା। ପରେ ତାଙ୍କ ମୃତଦେହକୁ ଗାଁ ନିକଟସ୍ଥ ଜଙ୍ଗଲକୁ ନେଇ ପୋଡ଼ି ଦିଆଯାଇଥିବା ସେ ଅଭିଯୋଗ କରିଛନ୍ତି।

ରାମଚନ୍ଦ୍ରଙ୍କୁ ମାଡ଼ ମରାଯାଉଥିବା ସମୟରେ ତାଙ୍କ ପତ୍ନୀ କଳାବତୀ ତାଙ୍କୁ ଉଦ୍ଧାର କରିବାକୁ ଯାଇ ଆହତ ହୋଇଥିବା ମଧ୍ୟ ଅଭିଯୋଗରେ ଦର୍ଶାଯାଇଛି। ଏନେଇ କଳାବତୀ ମୋହନା ଥାନାରେ ଲିଖିତ ଅଭିଯୋଗ କରିଥିଲେ।

ଘଟଣାକୁ ନେଇ ମୋହନା ଥାନାରେ କେସ ନମ୍ବର ୧୯୫/୨୬ରେ ମାମଲା ରୁଜୁ ହୋଇଛି। ଏହି ମାମଲାରେ ମେରାମା ଗାଁର କାମଦେବ ମଳିକ (୪୬), ଦୀପୁ ବେହେରା (୨୧), କାର୍ତ୍ତିକ ମଳିକ (୩୪), ପ୍ରଭା ମଳିକ (୪୧), ଅନନ୍ତ ବେହେରା (୨୪), କଟ ମଳିକ (୫୧), ଚୈତନ୍ୟ ମଳିକ, ଅଶୋକ ମଳିକ, ରବିନ୍ଦ୍ର ବେହେରା, ରାଜୁ ବେହେରା, ରାଘବ ମଳିକ ଓ କାଳିଆ ବେହେରାଙ୍କୁ ପୁଲିସ ଗିରଫ କରିଛି।

ଘଟଣାସ୍ଥଳରେ ପାରଳାଖେମୁଣ୍ଡିରୁ ସାଇଣ୍ଟିଫିକ ଟିମ ପହଞ୍ଚି ତଦନ୍ତ କରିବା ସହ ଘଟଣାସ୍ଥଳରୁ ହାଡ଼ ଓ ପାଉଁଶ ଜବତ କରିଛି। ଘଟଣାର ତଦନ୍ତ ଜାରି ରହିଥିବା ମୋହନା ଏସଡିପିଓ ରାକେଶ କୁମାର ସାହୁ ସୂଚନା ଦେଇଛନ୍ତି।