ଗୁପଚୁପ ଖାଇବା ପରେ ଆସିଲା ନିଦ; ବାକ୍ସ ଉପରେ ଶୋଇପଡ଼ିଲା ହନୁ ମାଙ୍କଡ଼, ଭାଇରାଲ ହେଉଛି Video
ପାଟଣା,୨୪।୮(ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ଷ୍ଟେଟବ୍ୟାଙ୍କ ସମ୍ମୁଖରେ ରବିବାର ଏକ ରୋଚକ ଦୃଶ୍ୟ ଦେଖିବାକୁ ମିଳିଥିଲା। ବଜାର ଅଞ୍ଚଳର ବିଭିନ୍ନ ଦୋକାନରୁ ଖାଦ୍ୟ ମାଗି ଖାଉଥିବା ଏକ ବୁଲା ହନୁ ମାଙ୍କଡ଼ ଅପରାହ୍ନ ପ୍ରାୟ ୩ଟା ସମୟରେ ଷ୍ଟେଟବ୍ୟାଙ୍କ ସମ୍ମୁଖରେ ଥିବା ଏକ ଗୁପଚୁପ ଦୋକାନକୁ ଆସିଥିଲା।
ଗୁପଚୁପ ବେପାରୀ ମାଙ୍କଡ଼ଟିକୁ କିଛି ଗୁପଚୁପ ଖାଇବାକୁ ଦେଇଥିଲେ। ଖାଇ ସାରିବା ପରେ ମାଙ୍କଡ଼ଟି ସିଧା ଗୁପଚୁପ ବାକ୍ସ ଉପରକୁ ଚଢ଼ି ଯାଇ ସେଠାରେ ଆରାମରେ ଶୋଇ ପଡ଼ିଥିଲା। ଦୋକାନୀ ତାକୁ ଉଠାଇବାକୁ ବାରମ୍ବାର ଚେଷ୍ଟା କରିଥିଲେ ମଧ୍ୟ ମାଙ୍କଡ଼ଟି ନିର୍ବିଘ୍ନରେ ଶୋଇ ରହିଥିଲା। ଫଳରେ କିଛି ସମୟ ପାଇଁ ଦୋକାନୀଙ୍କୁ ଗୁପଚୁପ ବିକ୍ରିରେ ଅସୁବିଧା ହୋଇଥିଲା।
ଗୁପଚୁପ ଷ୍ଟଲ୍ ଉପରେ ମାଙ୍କଡ଼ଟିର ଏଭଳି ଆରାମଦାୟକ ନିଦ ଦୋକାନୀ ଓ ଗ୍ରାହକଙ୍କ ମଧ୍ୟରେ କୌତୂହଳ ସୃଷ୍ଟି କରିଥିଲା। ବଜାରରେ ଲୋକଙ୍କ ଚଳପ୍ରଚଳ ଓ ଗହଳି ସତ୍ତ୍ୱେ ମାଙ୍କଡ଼ଟି କୌଣସି ଭୟ ନକରି ବାକ୍ସ ଉପରେ ଶୋଇ ରହିଥିଲା। ଏହି ରୋଚକ ଦୃଶ୍ୟକୁ ଉପସ୍ଥିତ ଲୋକେ ମୋବାଇଲ୍ କ୍ୟାମେରାରେ କଏଦ କରିଥିଲେ।
ପ୍ରାୟ ଦେଢ଼ ଘଣ୍ଟା ପରେ ପ୍ରବଳ ବର୍ଷା ଆରମ୍ଭ ହେବାରୁ ମାଙ୍କଡ଼ଟି ଗୁପଚୁପ ବାକ୍ସ ଉପରୁ ଡେଇଁ ଚାଲିଯାଇଥିଲା। ମାଙ୍କଡ଼ଟିର ଏଭଳି ରୋଚକ କାରନାମା ସ୍ଥାନୀୟ ଦୋକାନୀ ଓ ଗ୍ରାହକଙ୍କ ମଧ୍ୟରେ ଦିନତମାମ ଚର୍ଚ୍ଚାର ବିଷୟ ପାଲଟିଥିଲା।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
