ଝାଟିପଦର ଠାକୁରାଣୀ ମନ୍ଦିରରେ ଶେଷ ପର୍ଯ୍ୟାୟରେ ନବରାତ୍ର ପୂଜା ପ୍ରସ୍ତୁତି
ଗଞ୍ଜାମ,୨ା୧୦(ବିଦ୍ୟାଧର ସାହୁ): ଚଳିତ ଆଶ୍ୱିନ ମାସ କୃଷ୍ଣପକ୍ଷ ଅଷ୍ଟମୀ ତିଥି ଶନିବାରଠାରୁ ଆରମ୍ଭ ହୋଇଛି ମା’ ଠାକୁରାଣୀଙ୍କ ପୀଠରେ ଶାରଦୀୟ ନବ ରାତ୍ର ପୂଜା। ଏହି ପୂଜା ଆଶ୍ୱିନ ମାସ ଶୁକ୍ଳ ପକ୍ଷ ଅଷ୍ଟମୀ ତିଥି ୧୮ ରବିବାର ପର୍ଯ୍ୟନ୍ତ ପୂଜା ପାଠ ଚାଲିବ ବୋଲି ଝାଟିପଦର ଗ୍ରାମ୍ୟ ପୂଜା ପରିଚାଳନା କମିଟି ପକ୍ଷରୁ କୁହାଯାଇଛି। ଝାଟିପଦର ଗ୍ରାମରେ ବିଜେ ମା’ ଭଗବତୀ କରୁଣାମୟୀ ମା’ ବୁଢୀ ଠାକୁରାଣୀ ଶକ୍ତି ପୀଠରେ ଗତ ୧୬ ବର୍ଷ ଧରି ଏହି ନବରାତ୍ର ପୂଜା ଚାଲିଛି। ଶନିବାରଠାରୁ ଆରମ୍ଭ ହେବ ଷୋଡ଼ଶ ଦିବସାତ୍ମକ ଶାରଦୀୟ ଦୁର୍ଗା ପୂଜାଭତ୍ସବ ଏବଂ କ୍ଳେଶ ହରଣ ଅଖଣ୍ଡ ଦୀପ ମହାଯଜ୍ଞ। ସମସ୍ତ ପାରମ୍ପରିକ ରୀତିରେ ମହା ସମାରୋହରେ ଅନୁଷ୍ଠିତ ହେବ। ଏଥିପାଇଁ ଚଳଚଞ୍ଚଳ ହୋଇ ଉଠିଛି ସମଗ୍ର ଅଞ୍ଚଳ l ମୁଖ୍ୟ ପୁରୋଧା ପଣ୍ଡିତ ଗୋପାଳ କୃଷ୍ଣ ବ୍ରହ୍ମାଙ୍କ ବେଦମନ୍ତ୍ର ପଦ ଧନିରେ ପ୍ରକମ୍ପିତ ହୋଇ ଉଠିବ ମା’ଙ୍କ ଶକ୍ତି ପୀଠ। ଗ୍ରାମବାସୀଙ୍କ ସହଯୋଗ ଓ ତତ୍ତ୍ୱାବଧାନରେ ଏହି ପୂଜା ପ୍ରତ୍ୟେକ ବର୍ଷ ଦଶହରା ଉପଲକ୍ଷେ ନବରାତ୍ର ପୂଜା ପାଳିତ ହୋଇ ଆସୁଛି। ଏଥିସହ ଠାକୁରାଣୀ ଯୁବ ଗୋଷ୍ଠୀ ଓ ସ୍ଥାନୀୟ ଅଞ୍ଚଳର ଭକ୍ତଙ୍କ ନିଃସ୍ବାର୍ଥ ସହଯୋଗରେ ମା’ଙ୍କ ଯାତ୍ରା ଅନୁଷ୍ଠିତ ହୁଏ।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
