ଦୁର୍ବଳ ମୌସୁମୀ ବର୍ଷା ମାଇକ୍ରୋଫାଇନାନ୍ସ କମ୍ପାନିଙ୍କ ଚିନ୍ତା ବଢ଼ାଇଲା

ନୂଆଦିଲ୍ଲୀ: ଦୁର୍ବଳ ମୌସୁମୀ ବର୍ଷା ଯୋଗୁଁ ଦେଶର କ୍ଷୁଦ୍ର ଋଣ ପ୍ରଦାନକାରୀ ସଂସ୍ଥାଗୁଡ଼ିକର ଚିନ୍ତା ବଢ଼ିଛି। ପ୍ରାୟ ୩.୩୦ ଲକ୍ଷ କୋଟି ଟଙ୍କାର ଏହି କ୍ଷେତ୍ର ଏବେ ଋଣ ଆଦାୟକୁ ନେଇ ନୂଆ ଆହ୍ୱାନର ସମ୍ମୁଖୀନ ହେଉଛି। ଚଳିତ ବର୍ଷ ସେପ୍ଟେମ୍ବର ଶେଷ ସୁଦ୍ଧା ଦେଶରେ ସ୍ୱାଭାବିକଠାରୁ ୧୨.୬ ପ୍ରତିଶତ କମ୍ ବର୍ଷା ହୋଇଛି। କର୍ଣ୍ଣାଟକ, ମହାରାଷ୍ଟ୍ର, ଆନ୍ଧ୍ରପ୍ରଦେଶ, ତେଲେଙ୍ଗାନା ଓ ରାଜସ୍ଥାନରେ ମରୁଡ଼ି ସ୍ଥିତି ଗ୍ରାମାଞ୍ଚଳର ଆୟ ଉପରେ ଚାପ ସୃଷ୍ଟି କରିବା ଆଶଙ୍କା ରହିଛି।

କ୍ଷୁଦ୍ର ଋଣ ନେଉଥିବା ଅନେକ ଗ୍ରାହକ କୃଷି ଓ ଗ୍ରାମୀଣଜୀବିକା ଉପରେ ନିର୍ଭରଶୀଳ। ବର୍ଷା ଅଭାବରୁ ଫସଲ ଉତ୍ପାଦନ ଓ ଚାଷୀଙ୍କ ରୋଜଗାର ପ୍ରଭାବିତ ହେଲେ ଋଣର କିସ୍ତି ଠିକ୍ ସମୟରେ ପରିଶୋଧ କରିବା କଷ୍ଟକର ହୋଇପାରେ। ଏହା ଫଳରେ ଋଣ ପ୍ରଦାନକାରୀ ସଂସ୍ଥାଗୁଡ଼ିକର ଅସୁଲି ଖର୍ଚ୍ଚ ଓ ଆର୍ଥିକ ଚାପ ବଢ଼ିପାରେ। କ୍ରେଡିଟ୍‌ଆକ୍ସେସ୍ ଗ୍ରାମୀଣର ପରିଚାଳନା ନିର୍ଦ୍ଦେଶକ ଗଣେଶ ନାରାୟଣନ୍‌ଙ୍କ କହିବା ଅନୁଯାୟୀ, ସଂସ୍ଥା ମରୁଡ଼ି ପ୍ରଭାବିତ ଅଞ୍ଚଳ ଉପରେ ନଜର ରଖିଛି ଏବଂ ସେଠାରେ ଋଣ ପ୍ରଦାନ କ୍ଷେତ୍ରରେ ସତର୍କତା ଅବଲମ୍ବନ କରୁଛି। ଏପର୍ଯ୍ୟନ୍ତ ପ୍ରଭାବ ସୀମିତ ରହିଥିବା ସେ କହିଛନ୍ତି।

ଗ୍ରାମାଞ୍ଚଳ ଲୋକଙ୍କ ଆୟ କମିବା ଆଶଙ୍କା
କୃଷି ଋଣ କ୍ଷେତ୍ରରେ ଫସଲ ବୀମା କିଛି ସୁରକ୍ଷା ଦେଇପାରୁଥିବା ବେଳେ, ଗ୍ରାମାଞ୍ଚଳରେ ଦିଆଯାଉଥିବା ଅନେକ କ୍ଷୁଦ୍ର ଋଣ ସାଧାରଣତଃ ଏଭଳି ବୀମା ସୁରକ୍ଷା ଅଧୀନରେ ଆସେ ନାହିଁ। ତେଣୁ ଆୟ କମିଲେ ଋଣଗ୍ରହୀତା ଓ ଋଣ ପ୍ରଦାନକାରୀ ଉଭୟଙ୍କ ଉପରେ ଚାପ ବଢ଼ିପାରେ। ବିଶେଷଜ୍ଞଙ୍କ ମତରେ, ବର୍ଷା ଅଭାବ ଦୀର୍ଘସ୍ଥାୟୀ ହେଲେ କ୍ଷୁଦ୍ର ଋଣ କ୍ଷେତ୍ରର ପୁନରୁଦ୍ଧାର ପ୍ରକ୍ରିୟା ଧିମା ହୋଇପାରେ।