ନୂଆଁଖାଇ ପାଇଁ ଚଳଚଞ୍ଚଳ ସମଲେଶ୍ୱରୀ ପୀଠ, ଜୋରଦାର ହେଲା ପ୍ରସ୍ତୁତି

ନନ୍ଦିଘୋଷ ବ୍ୟୁରୋ : ଆସନ୍ତା ୧୫ ତାରିଖରେ ପାଳିତ ହେବ ନୂଆଁଖାଇ। ପଶ୍ଚିମ ଓଡ଼ିଶାର ମାଟି, ପରମ୍ପରା ଓ ଭାବାବେଗ ସହ ଜଡ଼ିତ ଏକ ଗଣପର୍ବ ହେଉଛି ନୂଆଁଖାଇ। ନୂଆଁ ଧାନକୁ ପ୍ରଥମେ ଇଷ୍ଟଦେବୀଙ୍କୁ ସମର୍ପଣ କରିବା ପରେ ନୂଆଁ ଖାଇବାର ରହିଛି ପରମ୍ପରା। ଏଥିପାଇଁ ମାଆ ସମଲେଶ୍ୱରୀଙ୍କ ପୀଠରେ ଆରମ୍ଭ ହୋଇଛି ବିଶେଷ ପ୍ରସ୍ତୁତି। ମନ୍ଦିର ପରିସରକୁ ସଜାଇବା ସହ ଆରମ୍ଭ ହୋଇଛି ରଙ୍ଗକାମ। ନୂଆଁଖାଇ ଦିନ ମାଆଙ୍କ ନିକଟରେ ନବାନ୍ନ ଲାଗିବାକୁ ଥିବାରୁ ଏହାକୁ ନେଇ ଭକ୍ତଙ୍କ ମଧ୍ୟରେ ଉତ୍ସାହ ବଢ଼ିଛି। ପୂଜକଙ୍କଠାରୁ ଆରମ୍ଭ କରି ମନ୍ଦିର ଟ୍ରଷ୍ଟ ବୋର୍ଡ ପକ୍ଷରୁ ମଧ୍ୟ ପ୍ରସ୍ତୁତି ଜୋରଦାର ହୋଇଛି।

ଆସନ୍ତାକାଲି ମନ୍ଦିରରେ ପହଞ୍ଚିବ ନୂଆଁ ଧାନ। ଏହାପରେ ନବାନ୍ନ ପ୍ରସ୍ତୁତି ସହ ଅନ୍ୟାନ୍ୟ ନୀତିକାନ୍ତି ପାଇଁ ପ୍ରସ୍ତୁତି ଆହୁରି ଜୋରଦାର ହେବ। ପରମ୍ପରା ଓ ରୀତିନୀତି ଅନୁସାରେ ଯେପରି ନୂଆଁଖାଇ ପର୍ବ ସୁରୁଖୁରୁରେ ସମ୍ପନ୍ନ ହେବ, ସେଥିପାଇଁ ଟ୍ରଷ୍ଟ ବୋର୍ଡ ପକ୍ଷରୁ ସମସ୍ତ ପ୍ରସ୍ତୁତି ଆରମ୍ଭ ହୋଇଛି। ମନ୍ଦିରର ସାଜସଜ୍ଜା, ପରିଚ୍ଛନ୍ନତା ଓ ନୀତିକାନ୍ତି ପରିଚାଳନାକୁ ନେଇ ମଧ୍ୟ ପ୍ରସ୍ତୁତି ଚାଲିଛି। ନୂଆଁଖାଇ ଦିନ ମାଆ ସମଲେଶ୍ୱରୀଙ୍କ ନିକଟରେ ନବାନ୍ନ ଲାଗିବା ପରେ ଭକ୍ତମାନେ ନୂଆଁ ଖାଇବେ। ପରମ୍ପରା ଓ ଭକ୍ତିଭାବର ଏହି ମହାପର୍ବକୁ ନେଇ ଏବେଠାରୁ ଚଳଚଞ୍ଚଳ ହୋଇଉଠିଛି ସମଲେଶ୍ୱରୀଙ୍କ ପୀଠ।