ନୃତ୍ୟାଶା ସମ୍ମାନ ୨୦୨୬: ପଦ୍ମଶ୍ରୀ ଗୁରୁ ଦୁର୍ଗାଚରଣ ରଣବୀର ସମ୍ମାନୀତ

ଭୁବନେଶ୍ୱର,୧୭।୮: ଓଡ଼ିଶୀ ନୃତ୍ୟ ଓ ସଙ୍ଗୀତର ପ୍ରଚାର, ପ୍ରସାର ଏବଂ ଏହାର ଅମୂଲ ପରମ୍ପରାର ସୁରକ୍ଷା ପାଇଁ ନିରନ୍ତର କାର୍ଯ୍ୟରତ ଅନୁଷ୍ଠାନ ‘ନୃତ୍ୟାଶା’ ପକ୍ଷରୁ ଆୟୋଜିତ ଅଷ୍ଟମ ନୃତ୍ୟାଶା ସମ୍ମାନ ୨୦୨୬ ଅନୁଷ୍ଠିତ ହୋଇଯାଇଛି। ଏହି ଅବସରରେ ବିଶିଷ୍ଟ ଓଡ଼ିଶୀ ନୃତଗୁରୁ , ପଦ୍ମଶ୍ରୀ ଗୁରୁ ଦୁର୍ଗାଚରଣ ରଣବୀରଙ୍କୁ ନୃତ୍ୟାଶା ସମ୍ମାନରେ ସମ୍ମାନୀତ କରାଯାଇଛି। ତାଙ୍କର ଦୀର୍ଘଦିନର ନୃତ୍ୟ ସାଧନା, ଶିକ୍ଷାଦାନ ଏବଂ ଓ ନୃ୍ୟତର ବିକାଶ ଓ ପ୍ରସାର ପାଇଁ ଅବଦାନକୁ ସ୍ବୀକୃତି ଦେଇ ଏହି ସମ୍ମାନ ପ୍ରଦାନ କରାଯାଇଛି। ସନ୍ଧ୍ୟାରେ ଅନୁଷ୍ଠିତ ଏହି ଭବ୍ୟ ସାଂସ୍କୃତିକ ସମାରୋହର ଶୁଭାରମ୍ଭ ଶ୍ରୀ ଜଗନ୍ନାଥ ପ୍ରଧାନ, ଶ୍ରୀମତୀ ସୁଚିସ୍ମିତା ମନ୍ତ୍ରୀ, ଗୁରୁ ଶ୍ରୀ ଧନେଶ୍ୱର ସ୍ବାଇଁ, ଶ୍ରୀ ବିଶ୍ୱଜିତ ଦାଶ ଏବଂ ଶ୍ରୀ ବିସ୍ମୟ ସାହୁଙ୍କ ଦ୍ୱାରା ପ୍ରଦୀପ ପ୍ରଜ୍ୱଳନରେ ହୋଇଥିଲା। ଏହି ଅବସରରେ ଅତିଥିମାନେ ଓଡ଼ିଶାର ସମୃଦ୍ଧ ନୃତ୍ୟ, ସଙ୍ଗୀତ ଓ ଲୋକକଳା ପରମ୍ପରାର ସୁରକ୍ଷା ଓ ନୂତନ ପିଢି ମଧ୍ୟରେ ଏହାର ପ୍ରସାର ଉପରେ ଗୁରୁତ୍ୱାରୋପ କରିଥିଲେ।
‘ନୃତ୍ୟାଶା’ର ପ୍ରତିଷ୍ଠାତା ଗୁରୁ ପ୍ରିୟଦର୍ଶିନୀ ପ୍ରଧାନ ସ୍ବଗତ ଅଭିଭାଷଣ ପ୍ରଦାନ କରି ଅନୁଷ୍ଠାନର ଲକ୍ଷ୍ୟ, ଉଦ୍ଦେଶ୍ୟ ଏବଂ ଓ ନୃତ୍ୟର ପ୍ରଚାର ଓ ସୁରକ୍ଷା ପାଇଁ ନୃତ୍ୟାଶାର ପ୍ରୟାସ ଉପରେ ଆଲୋକପାତ କରିଥିଲେ। କାର୍ଯ୍ୟକ୍ରମକୁ ସଂଚାଳନା କରିଥିଲେ ଡ. ମୃତ୍ୟୁଞ୍ଜୟ ରଥ।
ସମାରୋହର ଅନ୍ୟତମ ଆକର୍ଷଣ ଥିଲା ବିଶିଷ୍ଟ ଓଡ଼ିଶୀ ନୃତ୍ୟଶିଳ୍ପୀ ଶ୍ରୀପୁଣ୍ୟା ମହାନ୍ତିଙ୍କ ସମେତ ବହୁ କଳାକାରଙ୍କ ଚିତ୍ତାକର୍ଷକ ନୃତ୍ୟ ପରିବେଷଣ। ଓଡ଼ିଶୀ ନୃତ୍ୟର ଶାସ୍ତ୍ରୀୟ ପରମ୍ପରା ସହିତ ଓଡ଼ିଶାର ବିଭିନ୍ନ ଲୋକ ଓ ଆଦିବାସୀ କଳାରୂପକୁ ଗୋଟିଏ ମଞ୍ଚରେ ପ୍ରଦର୍ଶିତ କରି ଏହି ସମାରୋହ ରାଜ୍ୟର ବିବିଧମୟ ସାଂସ୍କୃତିକ ଐତିହର ଏକ ଅନନ୍ୟ ପ୍ରତିଛବି ପ୍ରଦାନ କରିଥିଲା।