ନେପାଳରେ ଆଜି ଜାତୀୟ ଶୋକ ଦିବସ, ଫ୍ଲାସ୍ ଫ୍ଲଡ୍ରେ ମୃତକଙ୍କୁ ଶ୍ରଦ୍ଧାଞ୍ଜଳି
ନନ୍ଦିଘୋଷ ବ୍ୟୁରୋ : ପ୍ରଳୟଙ୍କରୀ ଫ୍ଲାସ୍ ଫ୍ଲଡ୍ରେ ପ୍ରାଣ ହରାଇଥିବା ସହସ୍ରାଧିକ ଲୋକଙ୍କ ସ୍ମୃତିରେ ଆଜି ନେପାଳରେ ପାଳନ ହେବ ଜାତୀୟ ଶୋକ ଦିବସ। ତ୍ରିଶୂଳୀ ଓ ଭୋଟେକୋଶୀ ନଦୀରେ ଆସିଥିବା ଭୟଙ୍କର ଫ୍ଲାସ୍ ଫ୍ଲଡ୍ରେ ଅନେକ ଜୀବନ ଯାଇଥିଲା। ଏହାକୁ ନେଇ ସେପ୍ଟେମ୍ବର ୮ ତାରିଖକୁ ଜାତୀୟ ଛୁଟି ମଧ୍ୟ ଘୋଷଣା କରାଯାଇଛି। ଜାତୀୟ ଶୋକ ଦିବସ ପାଳନ ନେଇ ଅନୁଷ୍ଠିତ କ୍ୟାବିନେଟ୍ ବୈଠକରେ ଏହି ନିଷ୍ପତ୍ତି ହୋଇଥିଲା। ଏହି ଅବସରରେ ଦେଶର ସମସ୍ତ ସ୍ଥାନରେ ଜାତୀୟ ପତାକାକୁ ଅର୍ଦ୍ଧନମିତ ରଖାଯିବ। ଏଥିସହ ଉଦ୍ଧାର କାର୍ଯ୍ୟ ଓ ସର୍ଚ୍ଚ ଅପରେସନ୍ରେ ନିୟୋଜିତ ଯବାନ ଓ କର୍ମଚାରୀଙ୍କୁ ସ୍ୱତନ୍ତ୍ର ଭତ୍ତା ପ୍ରଦାନ କରାଯିବ ବୋଲି ସରକାର ନିଷ୍ପତ୍ତି ନେଇଛନ୍ତି।
ନେପାଳର ବିଧ୍ୱସ୍ତ ଅଞ୍ଚଳର ପୁନର୍ଗଠନ ପାଇଁ ଏସୀୟ ଉନ୍ନୟନ ବ୍ୟାଙ୍କ ପକ୍ଷରୁ ଦିଆଯାଇଥିବା ୫ ନିୟୁତ ଡଲାର ସହାୟତାକୁ ସରକାର ଗ୍ରହଣ କରିଛନ୍ତି। ଏହି ଅର୍ଥରେ ବନ୍ୟା ପ୍ରଭାବିତ ଲୋକଙ୍କୁ ସହାୟତା ଯୋଗାଇବା ସହ ଶିଳ୍ପ ଓ ବ୍ୟବସାୟ ପ୍ରତିଷ୍ଠାନର ପୁନରୁଦ୍ଧାର ପାଇଁ ଅନୁଦାନ ଦିଆଯିବ। ଏହି ପ୍ରଳୟଙ୍କରୀ ବିପତ୍ତିରେ ରାସୁୱା, ନୂଆକୋଟ, ଧାଦିଙ୍ଗ, ଗୋର୍ଖା, ଚିତୱାନ ଓ ତାନହୁନ୍ ସମେତ ଅନେକ ଜିଲ୍ଲା ପ୍ରଭାବିତ ହୋଇଥିଲା।
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ NANDIGHOSHA TV - ନନ୍ଦିଘୋଷ ଟିଭି ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି NANDIGHOSHA TV - ନନ୍ଦିଘୋଷ ଟିଭି ଦେଖନ୍ତୁ।
