ବଡ଼ ଘୋଷଣା କଲା କଂଗ୍ରେସ: ଏହି ଦିନ ଓଡ଼ିଶା ଡାକରା, ଜାଣନ୍ତୁ କ’ଣ ବନ୍ଦ, କ’ଣ ରହିବ ଖୋଲା
ଭୁବନେଶ୍ୱର,୨୩।୯: ଖଣି ପ୍ରସଙ୍ଗକୁ କେନ୍ଦ୍ର କରି ରାଜ୍ୟ ସରକାର ବିରୋଧରେ ଆନ୍ଦୋଳନକୁ ଆହୁରି ତୀବ୍ର କରିବାକୁ ଯୋଜନା କରିଛି ଓଡ଼ିଶା କଂଗ୍ରେସ। ଦଶହରା ପରେ ରାଜ୍ୟବ୍ୟାପୀ ବନ୍ଦ ପାଳନ ସହ ୭ ଦିନିଆ ‘ଇକୋନୋମିକ ବ୍ଲକେଡ’ କରିବାକୁ ଦଳ ଘୋଷଣା କରିଛି। ଖଣି ଖନନ, ଖଣିଜ ଉତ୍ତୋଳନ ଏବଂ ଖଣିଜ ପରିବହନ ବନ୍ଦ ରଖିବାକୁ କଂଗ୍ରେସ ଆହୱାନ ଦେଇଛି।
ରାଜ୍ୟ କଂଗ୍ରେସ କାର୍ଯ୍ୟକାରିଣୀ ବୈଠକରେ ଏନେଇ ରଣନୀତି ପ୍ରସ୍ତୁତ ହୋଇଛି। ବୈଠକରେ ମୋଟ ୭ଟି ପ୍ରସ୍ତାବ ପାରିତ ହୋଇଥିବାବେଳେ ‘ମୁଁ ନୁହେଁ, ଆମେ’ ନାରା ଦେଇ ସାମୂହିକ ଭାବେ ଆନ୍ଦୋଳନକୁ ଆଗକୁ ନେବା ଉପରେ ଜୋର ଦିଆଯାଇଛି।
MMDR ଆକ୍ଟକୁ ନେଇ ସ୍ପଷ୍ଟତା, ଖଣିଜ ସମ୍ପଦର ପରିଚାଳନା ଏବଂ ଖଣି ପ୍ରସଙ୍ଗରେ ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ ଇସ୍ତଫା ଦାବିକୁ କଂଗ୍ରେସ ଏହାର ପ୍ରମୁଖ ରାଜନୈତିକ ପ୍ରସଙ୍ଗ କରିଛି।
ପିସିସି ସଭାପତି ଭକ୍ତଚରଣ ଦାସ ଅଭିଯୋଗ କରିଛନ୍ତି ଯେ ରାଜ୍ୟରେ ଖଣିଜ ସମ୍ପଦର ଲୁଟ ପାଇଁ କେବଳ ବର୍ତ୍ତମାନର ସରକାର ନୁହେଁ, ପୂର୍ବତନ ବିଜେଡି ସରକାର ମଧ୍ୟ ଦାୟୀ। ଖଣି ପ୍ରସଙ୍ଗରେ ଉଭୟ ଦଳର ଭୂମିକାକୁ ନେଇ କଂଗ୍ରେସ ନିଜର ଆକ୍ରମଣ ଜାରି ରଖିବ ବୋଲି ସଙ୍କେତ ଦେଇଛି।
ଦଶହରା ପରେ ହେବାକୁ ଥିବା ବନ୍ଦର ତାରିଖ ଏବଂ ୭ ଦିନିଆ ଅର୍ଥନୈତିକ ଅବରୋଧର ବିସ୍ତୃତ କାର୍ଯ୍ୟକ୍ରମ ନେଇ ଦଳ ପକ୍ଷରୁ ପରବର୍ତ୍ତୀ ସମୟରେ ଅଧିକ ସୂଚନା ଦିଆଯିବ। ତେବେ କଂଗ୍ରେସର ଏହି ଘୋଷଣା ନେଇ ଏପର୍ଯ୍ୟନ୍ତ ରାଜ୍ୟ ଭାଜପା ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
