ବାରଣ୍ଡାରେ ଖାଉଛନ୍ତି ୧୬୯ ଛାତ୍ରୀଛାତ୍ର: ମଧ୍ୟାହ୍ନ ଭୋଜନ ପାଇଁ ଶେଡ ନିର୍ମାଣ ଦାବି
କେସିଙ୍ଗା,୨୩।୯ (ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ ଅଧୀନସ୍ଥ ଗାଈଗା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ମଧ୍ୟାହ୍ନ ଭୋଜନ ଖାଇବା ପାଇଁ ଶେଡ ନଥିବାରୁ ଛାତ୍ରୀଛାତ୍ରମାନେ ଅସୁବିଧାର ସମ୍ମୁଖୀନ ହେଉଛନ୍ତି। ବର୍ତ୍ତମାନ ୧୬୯ ଜଣ ଛାତ୍ରୀଛାତ୍ର ବିଦ୍ୟାଳୟ ବାରଣ୍ଡା, ସଭାମଣ୍ଡପ ଓ ଗଛମୂଳେ ବସି ମଧ୍ୟାହ୍ନ ଭୋଜନ କରୁଛନ୍ତି।
୧୯୬୦ ମସିହାରେ ପ୍ରତିଷ୍ଠିତ ଏହି ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୧୬୯ ଜଣ ଛାତ୍ରୀଛାତ୍ର ପଢ଼ୁଛନ୍ତି। ଆବଶ୍ୟକତା ଅନୁଯାୟୀ ପ୍ରଧାନ ଶିକ୍ଷକଙ୍କ ସମେତ ଶିକ୍ଷୟିତ୍ରୀମାନେ ମଧ୍ୟ ନିଯୁକ୍ତ ଅଛନ୍ତି। ତେବେ ବିଦ୍ୟାଳୟର କିଛି ଶ୍ରେଣୀଗୃହ ଦୀର୍ଘଦିନ ଧରି ବିପଦସଂକୁଳ ଅବସ୍ଥାରେ ରହିଥିବା ଜଣାପଡ଼ିଛି। ବିଦ୍ୟାଳୟରେ ଛାତ୍ରଛାତ୍ରୀଙ୍କ ସଂଖ୍ୟା ଅନୁସାରେ ମଧ୍ୟାହ୍ନ ଭୋଜନ ଖାଇବା ପାଇଁ ଆବଶ୍ୟକ ସ୍ଥାନ ନାହିଁ। ଫଳରେ ପିଲାମାନେ ବାରଣ୍ଡା, ସଭାମଣ୍ଡପ ଏବଂ ଗଛମୂଳେ ବସି ଭୋଜନ କରୁଛନ୍ତି। ଖରା ଓ ବର୍ଷା ସମୟରେ ଏହା ଯୋଗୁ ପିଲାମାନଙ୍କୁ ଅଧିକ ସମସ୍ୟା ହେଉଥିବା ଶିକ୍ଷା କମିଟି ପକ୍ଷରୁ କୁହାଯାଇଛି। ଏନେଇ ବିଦ୍ୟାଳୟ ଶିକ୍ଷା କମିଟି ପକ୍ଷରୁ ବ୍ଲକ ପ୍ରଶାସନ ଏବଂ ଗୋଷ୍ଠୀ ଶିକ୍ଷାଧିକାରୀଙ୍କ ନିକଟରେ ମଧ୍ୟାହ୍ନ ଭୋଜନ ଶେଡ ନିର୍ମାଣ ପାଇଁ ଲିଖିତ ଦାବି କରାଯାଇଥିଲା।
ଛାତ୍ରୀଛାତ୍ରଙ୍କ ସମସ୍ୟା ଦୂର କରିବା ପାଇଁ ୫ମ ଏସଏଫ୍ସି ଯୋଜନାରୁ ମଧ୍ୟାହ୍ନ ଭୋଜନ ଶେଡ ନିର୍ମାଣ ପାଇଁ ୩ ଲକ୍ଷ ଟଙ୍କା ମଞ୍ଜୁର ହୋଇଥିବା ଜଣାପଡ଼ିଛି। ବିଦ୍ୟାଳୟ ପରିସରରେ ଏନେଇ ସୂଚନା ଫଳକ ମଧ୍ୟ ଲଗାଯାଇଛି। ତେବେ ଅର୍ଥ ମଞ୍ଜୁର ହେବା ସତ୍ତ୍ୱେ ଏଯାଏ ଶେଡ ନିର୍ମାଣ ଆରମ୍ଭ ହୋଇନଥିବାରୁ ଛାତ୍ରୀଛାତ୍ରଙ୍କୁ ପୁଣି ବାରଣ୍ଡା, ଗଛମୂଳ ଓ ସଭାମଣ୍ଡପରେ ବସି ଭୋଜନ କରିବାକୁ ପଡ଼ୁଛି। ତେଣୁ ଯଥାଶୀଘ୍ର ମଧ୍ୟାହ୍ନ ଭୋଜନ ଶେଡ ନିର୍ମାଣ କରିବାକୁ ପ୍ରଧାନ ଶିକ୍ଷକଙ୍କ ସମେତ ଶିକ୍ଷା କମିଟି ସଦସ୍ୟମାନେ ଦାବି କରିଛନ୍ତି।
ଏନେଇ ଗାଈଗା ସରକାରୀ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ଆଛାରାମ ହରିଜନ କହିଛନ୍ତି ଯେ, ଶେଡ ନିର୍ମାଣ ପାଇଁ ସୂଚନା ଫଳକ ଲଗାଯାଇଛି। ବର୍ତ୍ତମାନ ପିଲାମାନେ ବାରଣ୍ଡାରେ ବସି ଅସୁବିଧାରେ ମଧ୍ୟାହ୍ନ ଭୋଜନ ଖାଉଛନ୍ତି। ତେଣୁ ଯଥାଶୀଘ୍ର ଶେଡ ନିaର୍ମାଣ କରାଯିବା ଆବଶ୍ୟକ ବୋଲି ସେ କହିଛନ୍ତି।
ଅନ୍ୟପକ୍ଷରେ ଏନେଇ କେସିଙ୍ଗା ବିଡିଓ ଜନ୍ମେଜୟ ସ୍ବାଇଁଙ୍କୁ ପଚାରିବାରୁ ବର୍ତ୍ତମାନ ବର୍ଷା ଲାଗି ରହିଥିବାରୁ ନିର୍ମାଣ କାମ ଆରମ୍ଭ କରାଯାଇପାରୁନାହିଁ। ବର୍ଷା ଛାଡ଼ିଲେ ଶେଡ ନିର୍ମାଣ କାମ ଆରମ୍ଭ କରାଯିବ ବୋଲି ସେ ପ୍ରକାଶ କରିଛନ୍ତି।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
