ବୈଭବ ସୂର୍ଯ୍ୟବଂଶୀଙ୍କୁ କାହିଁକି ବାହାର କରିଦେବା ଉଚିତ? କାରଣ କହିଲେ…
ନୂଆଦିଲ୍ଲୀ,୧୧।୯: ଭାରତର ଯୁବ ବିସ୍ଫୋରକ ବ୍ୟାଟର ବୈଭବ ସୂର୍ଯ୍ୟବଂଶୀଙ୍କ ବ୍ୟାଟିଂ ଶୈଳୀର ଅନେକ ପ୍ରଶଂସକ ରହିଛନ୍ତି। ସେ ମଇଦାନକୁ ଓହ୍ଲାଇଲେ ଦର୍ଶକଙ୍କ ପ୍ରବଳ ଭିଡ଼ ଜମିଥାଏ। ତେବେ ଅଫଗାନିସ୍ତାନ ବିପକ୍ଷ ଆଗାମୀ ଟି-୨୦ ସିରିଜ୍ରେ ତାଙ୍କୁ ଚୂଡ଼ାନ୍ତ ଏକାଦଶ (Playing 11)ରେ ସୁଯୋଗ ନଦେବା ପାଇଁ ପୂର୍ବତନ ଅଧିନାୟକ ଅଜିଙ୍କ୍ୟ ରାହାଣେ ପରାମର୍ଶ ଦେଇଛନ୍ତି। ରହାଣେଙ୍କ ମତରେ ସଞ୍ଜୁ ସାମସନଙ୍କୁ ଅଭିଷେକ ଶର୍ମାଙ୍କ ସହ ଓପନିଂ କରିବାର ସୁଯୋଗ ମିଳିବା ଉଚିତ୍।
ନିଜ ୟୁଟ୍ୟୁବ୍ ଚ୍ୟାନେଲ୍ରେ ଆଲୋଚନା କରି ରାହାଣେ କହିଛନ୍ତି, “ମୋ ମତରେ ଟି-୨୦ ୱାର୍ଲ୍ଡକପ୍ରେ ଖେଳିଥିବା ଶୀର୍ଷ ୩ ଜଣ ବ୍ୟାଟର ହିଁ ଏହି ସିରିଜ୍ରେ ଓପନିଂ ଓ ଟପ୍ ଅର୍ଡର ସମ୍ଭାଳିବା ଦରକାର। ସଞ୍ଜୁ ସାମସନ ବହୁତ ଭଲ ପ୍ରଦର୍ଶନ କରିଥିଲେ, କିନ୍ତୁ କିଛି ଖରାପ ପାରି ଯୋଗୁ ତାଙ୍କୁ ବାଦ୍ ଦିଆଯାଇଥିଲା। ମୁଁ ଚାହୁଁଛି ସଞ୍ଜୁଙ୍କୁ ଆଉ ଗୋଟିଏ ସୁଯୋଗ ମିଳୁ। ଅଭିଷେକ ଶର୍ମା, ସଞ୍ଜୁ ସାମସନ ଏବଂ ଇଶାନ କିଷାନ ଶୀର୍ଷ ୩ ସ୍ଥାନରେ ଖେଳିବା ଉଚିତ୍। ବୈଭବ ସୂର୍ଯ୍ୟବଂଶୀଙ୍କୁ ମଧ୍ୟ ଆଗକୁ ସୁଯୋଗ ମିଳିବ, ତାଙ୍କ ସମୟ ଆସିବ, କିନ୍ତୁ ଏବେ ପାଇଁ ସେ ଅପେକ୍ଷା କରିବା ଉଚିତ୍।”
ଇଂଲଣ୍ଡ ଏବଂ ଜିମ୍ବାବୱେ ସିରିଜ୍ରେ ଡେବ୍ୟୁ କରିଥିବା ବୈଭବ ସୂର୍ଯ୍ୟବଂଶୀ ୬ଟି ମ୍ୟାଚ୍ରେ ୩୨.୧୬ ହାରରେ ୧୯୩ ରନ୍ ସଂଗ୍ରହ କରିବା ସହ ୨ଟି ଅର୍ଦ୍ଧଶତକ ହାସଲ କରିସାରିଛନ୍ତି। ନିକଟରେ ଶେଷ ହୋଇଥିବା ଦୁଲୀପ ଟ୍ରଫିରେ ମଧ୍ୟ ତାଙ୍କୁ ଦେଖିବାକୁ ପ୍ରଶଂସକଙ୍କ ଭିଡ଼ ଜମିଥିଲା। ତେବେ ଟିମ୍ କମ୍ବିନେସନ୍କୁ ଦୃଷ୍ଟିରେ ରଖି ପ୍ରଥମ ଦୁଇଟି ମ୍ୟାଚ୍ରେ ସୂର୍ଯ୍ୟବଂଶୀଙ୍କୁ ବ୍ୟାକ୍ଅପ୍ ଓପନର୍ ଭାବେ ବେଞ୍ଚରେ ବସାଯାଇପାରେ ଏବଂ ତୃତୀୟ ମ୍ୟାଚ୍ରେ ସୁଯୋଗ ମିଳିପାରେ ବୋଲି ଆଶଙ୍କା କରାଯାଉଛି।
ଏବେ ଦେଖିବାକୁ ବାକି ରହିଲା ଅଫଗାନିସ୍ତାନ ବିପକ୍ଷ ପ୍ରଥମ ଟି-୨୦ରେ ଟିମ୍ ମ୍ୟାନେଜମେଣ୍ଟ୍ ରାହାଣେଙ୍କ ପରାମର୍ଶ ଗ୍ରହଣ କରୁଛନ୍ତି ନା ଫର୍ମରେ ଥିବା ସୂର୍ଯ୍ୟବଂଶୀଙ୍କ ଉପରେ ପୁଣି ଭରସା ଦେଖାଉଛନ୍ତି।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
