୩୩ ଫିଲ୍ମକୁ ପଛରେ ପକାଇ ଓସ୍କାର ଗଲା ‘ଗୋନ୍ଧଳ’; ମିଳିଲା ଅଫିସିଆଲ୍ ଟିକେଟ୍!
ନୂଆଦିଲ୍ଲୀ: ୯୯ତମ ଏକାଡେମୀ ଆୱାର୍ଡ (ଓସ୍କାର ୨୦୨୭) ପାଇଁ ଭାରତରୁ ଅଫିସିଆଲ ଏଣ୍ଟ୍ରି କରିଛି ମରାଠୀ ଫିଲ୍ମ ‘ଗୋନ୍ଧଳ’। ଫିଲ୍ମ ଫେଡେରେସନ ଅଫ ଇଣ୍ଡିଆ ଏବଂ ଇମ୍ପାର ଅଧ୍ୟକ୍ଷ ଅଭୟ ସିହ୍ନା ଶୁକ୍ରବାର ଦିନ ଏହି ସୂଚନା ଦେଇଛନ୍ତି। ଏହି ଚଳଚ୍ଚିତ୍ରଟି ଓସ୍କାରର ‘ଶ୍ରେଷ୍ଠ ଅନ୍ତର୍ଜାତୀୟ ଫିଚର ଫିଲ୍ମ’ ବର୍ଗରେ ଭାରତର ପ୍ରତିନଧିତ୍ୱ କରିବ। ନିର୍ଦ୍ଦେଶକ, ଲେଖକ ତଥା ଫିଲ୍ମ ନିର୍ମାତା ସନ୍ତୋଷ ଦାବଖରଙ୍କ ଦ୍ୱାରା ନିର୍ମିିତ ଏହି ଫିଲ୍ମଟି ନଭେମ୍ବର ୧୪ରେ ପ୍ରେକ୍ଷାଳୟରେ ମୁକ୍ତିଲାଭ କରିଥିଲା। ଏହା ପୂର୍ବରୁ ଇଣ୍ଟରନ୍ୟାସନାଲ ଫିଲ୍ମ ଫେଷ୍ଟିଭାଲ ଅଫ ଇଣ୍ଡିଆ ୨୦୨୫ରେ ଏହି ଫିଲ୍ମ ପାଇଁ ଦାବଖର ଶ୍ରେଷ୍ଠ ନିର୍ଦ୍ଦେଶକ ଭାବେ ’ସିଲଭର ପିକକ’ ପୁରସ୍କାର ମଧ୍ୟ ଜିତିସାରିଛନ୍ତି।
ଫିଲ୍ମଟି ଓସ୍କାର ପାଇଁ ମନୋନୀତ ହେବା ପରେ ଅଭୟ ସିହ୍ନା ‘ଗୋନ୍ଧଳ’ର ସମ୍ପୂର୍ଣ୍ଣ ଟିମ୍କୁ ଶୁଭେଚ୍ଛା ଜଣାଇଛନ୍ତି। ସେ କହିଛନ୍ତି ଯେ, ଏହା କେବଳ ମରାଠୀ ସିନେମା ନୁହେଁ, ବରଂ ସମଗ୍ର ଭାରତୀୟ ଚଳଚ୍ଚିତ୍ର ଜଗତ ପାଇଁ ଏକ ଗର୍ବ ଓ ଗୌରବର ବିଷୟ। ବିଶ୍ୱ ଦରବାରରେ ଏହି ଫିଲ୍ମଟି ଭାରତୀୟ କଳା ଓ ସଂସ୍କୃତିକୁ ସଫଳତାର ସହ ଉପସ୍ଥାପନ କରିବ ବୋଲି ସେ ଆଶା ବ୍ୟକ୍ତ କରିଛନ୍ତି। ତେବେ ଚଳିତ ବର୍ଷ ଓସ୍କାର ଦୌଡ଼ ପାଇଁ ୧୪ଟି ହିନ୍ଦୀ ଫିଲ୍ମ ସମେତ ମୋଟ ୩୩ ଫିଲ୍ମର ନାମ ଆସିଥିଲା, ଯାହା ମଧ୍ୟରୁ ଏହି ମରାଠୀ ଫିଲ୍ମଟି ବାଜି ମାରିନେଇଛି।
କହିରଖୁଛୁ,‘ଗୋନ୍ଧଳ’ ହେଉଛି ମହାରାଷ୍ଟ୍ରର ଗ୍ରାମାଞ୍ଚଳର ପୃଷ୍ଠଭୂମିରେ ନିର୍ମିତ ଏକ ସସପେନ୍ସ-ଥ୍ରୀଲର ଫିଲ୍ମ। ଏଥିରେ ମହାରାଷ୍ଟ୍ରର ପ୍ରାଚୀନ ଲୋକକଳା ଏବଂ ଧାର୍ମିକ ପରମ୍ପରା ‘ଗୋନ୍ଧଳ’ର ସୁନ୍ଦର ଝଲକ ଦେଖିବାକୁ ମିଳିଛି। କାହାଣୀଟି ସୁମନ ନାମ୍ନୀ ଜଣେ ବିବାହିତା ମହିଳାଙ୍କ ଜୀବନକୁ ନେଇ ଗତିଶୀଳ। ଫିଲ୍ମରେ କିଶୋର କଦମ, ଇଶିତା ଦେଶମୁଖ, ଯୋଗେଶ ସୋହୋନୀ, ନିଷାଦ ଭୋଇର ଏବଂ ଅନୁଜ ପ୍ରଭୁ ମୁଖ୍ୟ ଭୂମିକାରେ ଅଭିନୟ କରିଛନ୍ତି। ଏହି ଚଳଚ୍ଚିତ୍ରର ସଙ୍ଗୀତ ନିର୍ଦ୍ଦେଶନା ଦେଇଛନ୍ତି ଦେଶର ପ୍ରସିଦ୍ଧ ସଙ୍ଗୀତକାର ଇଲୈୟାରାଜା।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
