ମାନିଲାରେ ପ୍ରଶିକ୍ଷଣ ସମୟରେ ଫିଲିପାଇନ୍ସ ବାୟୁସେନାର ଦୁଇ ବିମାନ ଦୁର୍ଘଟଣାଗ୍ରସ୍ତ, ୪ ପାଇଲଟ୍‌ଙ୍କ ମୃତ୍ୟୁ

ନୂଆଦିଲ୍ଲୀ : ଫିଲିପାଇନ୍ସ ବାୟୁସେନାର ୪ ପାଇଲଟଙ୍କର ବିମାନ ଦୁର୍ଘଟଣାରେ ମୃତ୍ୟୁ ହୋଇଯାଇଛି। ଗତକାଲି ଫର୍ନାଣ୍ଡୋ ବାୟୁସେନା ଘାଟିରେ ପ୍ରଶିକ୍ଷଣ ଉଡ଼ାଣ ସମୟରେ ଦୁଇଟି ଏସଏଫ୍‌-୨୬୦ ବିମାନ ଦୁର୍ଘଟଣାଗ୍ରସ୍ତ ହେବାରୁ ବାୟୁସେନାର ୪ ଜଣ ପାଇଲଟ୍‌ଙ୍କ ମୃତ୍ୟୁ ହୋଇଛି। ସ୍ଥାନୀୟ ସମୟ ଅପରାହ୍ନ ପ୍ରାୟ ୩ଟା ୫୧ ମିନିଟ୍‌ରେ ଏହି ଦୁର୍ଘଟଣା ଘଟିଥିଲା। ଉଭୟ ବିମାନ ବାୟୁସେନା ଘାଟିର ସୀମା ମଧ୍ୟରେ ଖସିପଡ଼ିଥିଲା। ବାୟୁସେନା ସୂଚନା ଅନୁଯାୟୀ, ଏହି ଘଟଣାରେ ଅନ୍ୟ କୌଣସି ବ୍ୟକ୍ତିଙ୍କ ମୃତାହତ ହେବାର ଖବର ନାହିଁ। ଫିଲିପାଇନ୍ସ ବାୟୁସେନା ଏକ ବିବୃତି ଜାରି କରି ୪ ଜଣ ବିମାନ ଚାଳକଙ୍କ ମୃତ୍ୟୁ ନିଶ୍ଚିତ କରିଛି। ଏଥିସହ ମୃତକଙ୍କ ପରିବାର ପ୍ରତି ସମବେଦନା ଜଣାଇବା ସହ ଦେଶ ପାଇଁ ସେମାନଙ୍କ ସେବାକୁ ସ୍ମରଣ କରିଛି। ଦୁର୍ଘଟଣାର ପ୍ରକୃତ କାରଣ ଏବେ ମଧ୍ୟ ଅସ୍ପଷ୍ଟ ରହିଛି। ଘଟଣାର ତଦନ୍ତ ଚାଲିଥିବାରୁ ସତର୍କତାମୂଳକ ପଦକ୍ଷେପ ଭାବେ ବାୟୁସେନା ସମସ୍ତ ଏସଏଫ୍‌-୨୬୦ ବିମାନର ଉଡ଼ାଣକୁ ଅସ୍ଥାୟୀ ଭାବେ ବନ୍ଦ କରିଦେଇଛି । ପ୍ରଶିକ୍ଷଣ ଉଡ଼ାଣ ସମୟରେ ବିମାନଗୁଡ଼ିକରେ କୌଣସି ଯାନ୍ତ୍ରିକ ତ୍ରୁଟି ଦେଖାଦେଇଥିଲା କିମ୍ବା ଅନ୍ୟ କୌଣସି ସମସ୍ୟା ଯୋଗୁଁ ଦୁର୍ଘଟଣା ଘଟିଥିଲା, ସେ ସମ୍ପର୍କରେ ଏପର୍ଯ୍ୟନ୍ତ କୌଣସି ସ୍ପଷ୍ଟ ସୂଚନା ମିଳିନାହିଁ। ଫିଲିପାଇନ୍ସ ବାୟୁସେନା କହିଛି ଯେ, ଦୁର୍ଘଟଣାର ପ୍ରକୃତ କାରଣ ଜାଣିବା ପାଇଁ ତଦନ୍ତ ଆରମ୍ଭ କରାଯାଇଛି। ତଦନ୍ତକାରୀମାନେ ଘଟଣାର ପରିସ୍ଥିତି ଏବଂ କାରଣ ନିର୍ଦ୍ଧାରଣ କରିବା ପର୍ଯ୍ୟନ୍ତ ଏସଏଫ୍‌-୨୬୦ ବିମାନଗୁଡ଼ିକର ଉଡ଼ାଣ ବନ୍ଦ ରଖାଯିବ। ଏସଏଫ୍‌-୨୬୦ ହେଉଛି ଏକ ହାଲୁକା ବିମାନ, ଯାହା ସାମରିକ ପ୍ରଶିକ୍ଷଣ ପାଇଁ ବ୍ୟବହୃତ ହୋଇଥାଏ। ଦୁର୍ଘଟଣାଗ୍ରସ୍ତ ଦୁଇଟି ବିମାନ ମଧ୍ୟ ପ୍ରଶିକ୍ଷଣ ଉଡ଼ାଣରେ ନିୟୋଜିତ ଥିଲା। ମୃତ ପାଇଲଟ୍‌ମାନଙ୍କ ପରିଚୟ କିମ୍ବା ଦୁର୍ଘଟଣା ପୂର୍ବରୁ ଘଟିଥିବା ଘଟଣାକ୍ରମ ସମ୍ପର୍କରେ ବାୟୁସେନା ଅଧିକ ବିବରଣୀ ଦେଇନାହିଁ। ଦୁର୍ଘଟଣାରେ ପ୍ରାଣ ହରାଇଥିବା ପାଇଲଟ୍‌ମାନଙ୍କ ପରିବାର ସହ ଫିଲିପାଇନ୍ସ ବାୟୁସେନା ଯୋଗାଯୋଗରେ ରହିଛି। ପରିବାରଗୁଡ଼ିକୁ ଆବଶ୍ୟକ ସହାୟତା ଯୋଗାଇଦେବା ପାଇଁ ବ୍ୟବସ୍ଥା କରାଯାଉଛି। ଏହି ଦୁଃଖଦ ସମୟରେ ଶୋକସନ୍ତପ୍ତ ପରିବାରର ଗୋପନୀୟତାକୁ ସମ୍ମାନ ଦେବା ପାଇଁ ବାୟୁସେନା ସାଧାରଣ ଜନତାଙ୍କୁ ଅନୁରୋଧ କରିଛି। ଏହି ଅନୁରୋଧ ମୃତକଙ୍କ ପରିବାର ପକ୍ଷରୁ କରାଯାଇଥିବା ମଧ୍ୟ କୁହାଯାଇଛି। ବାୟୁସେନା ମୃତ ପାଇଲଟ୍‌ମାନଙ୍କ ସେବା ଓ ବଳିଦାନକୁ ସମ୍ମାନ ଜଣାଇଛି।