28-Year Jail Term For 2 Indian-Origin Men: କାର୍‌ ରେସିଂରୁ ଦୁର୍ଘଟଣା, ମାଆ-ଝିଅଙ୍କ ମୃତ୍ୟୁ; ଦୁଇ ଜଣଙ୍କୁ ୨୮ ବର୍ଷ ଜେଲ୍ ଦଣ୍ଡ

ଇଂଲଣ୍ଡରେ ରାସ୍ତା ଉପରେ କାର୍‌ ରେସିଂ କରିବା ଯୋଗୁଁ ଜଣେ ମାଆ ଓ ତାଙ୍କ ୪ ବର୍ଷର ଝିଅଙ୍କ ମୃତ୍ୟୁ ଘଟଣାରେ ଦୁଇ ଭାରତୀୟ ବଂଶୋଦ୍ଭବଙ୍କୁ ମୋଟ ୨୮ ବର୍ଷ ଜେଲ୍‌ ଦଣ୍ଡ ମିଳିଛି।

ଦୋଷୀ ସାବ୍ୟସ୍ତ ହୋଇଥିବା ଜସ୍‌କମଲ ରିୟାତ୍‌ (୩୭)ଙ୍କୁ ୧୬ ବର୍ଷ ଏବଂ ହରଦୀପ ଭାଚୁ (୨୯)ଙ୍କୁ ୧୨ ବର୍ଷ ଜେଲ୍‌ ଦଣ୍ଡ ଦିଆଯାଇଛି।

ଉଭୟଙ୍କ ଉପରେ ୬ ବର୍ଷ ପାଇଁ ଗାଡ଼ି ଚଳାଇବା ଉପରେ ମଧ୍ୟ କଟକଣା ଲଗାଯାଇଛି।

ଏହା ସହ ନିଷେଧାଦେଶ ଶେଷ ହେବା ପରେ ସେମାନଙ୍କୁ ଅତିରିକ୍ତ ଡ୍ରାଇଭିଂ ପରୀକ୍ଷା ଦେବାକୁ ପଡ଼ିବ।

Advertisment ଏହି ଘଟଣା ୨୦୨୩ ଜାନୁଆରୀର।

ଜଷ୍ଟିନା ହୁଲବୋଜ୍‌ (୨୭) ଓ ତାଙ୍କ ୪ ବର୍ଷର ଝିଅ ଲେନା ଚେପଚୋର ସ୍କୁଲ୍‌କୁ ଯାଉଥିବା ସମୟରେ ସ୍କଟ୍‌ ହଲ୍‌ ରୋଡ୍‌ରେ ଏକ କାର୍‌ ଧକ୍କାରେ ପ୍ରାଣ ହରାଇଥିଲେ।

ହରଦୀପ ଭାଚୁଙ୍କ ଅଡି ଟିଟି ଆର୍‌ଏସ୍‌ କାର୍‌ ନିୟନ୍ତ୍ରଣ ହରାଇ ରାସ୍ତା କଡ଼କୁ ମାଡ଼ିଯିବା ପରେ ମାଆ-ଝିଅଙ୍କୁ ଧକ୍କା ଦେଇଥିଲା।

ବିଚାର ସମୟରେ ଜଣାପଡ଼ିଥିଲା ଯେ ଘଟଣାର କିଛି ମିନିଟ୍‌ ପୂର୍ବରୁ ଏକ ଟ୍ରାଫିକ୍‌ ସିଗ୍‌ନାଲ୍‌ରେ ରିୟାତ୍‌ ଓ ଭାଚୁ ନିଜ ନିଜ କାର୍‌ରେ ପାଖାପାଖି ଅଟକିଥିଲେ।

ସେମାନେ ପରସ୍ପରଙ୍କ କାର୍‌ର ଶକ୍ତି ବିଷୟରେ କଥା ହୋଇଥିଲେ।

ଏହା ପରେ ଦୁହେଁ ରାସ୍ତାରେ ରେସିଂ ଆରମ୍ଭ କରିଥିଲେ।

ସିସିଟିଭି ଫୁଟେଜ୍‌, ଡ୍ୟାସ୍‌କ୍ୟାମ୍‌ ଭିଡିଓ ଏବଂ ରିୟାତ୍‌ଙ୍କ ଫୋନ୍‌ରେ ଥିବା ରେକର୍ଡିଂରୁ ଏହା ସ୍ପଷ୍ଟ ହୋଇଥିଲା।

ରିୟାତ୍‌ଙ୍କ ବିଏମ୍‌ଡବ୍ଲ୍ୟୁ କାର୍‌ ଆଗରେ ଦ୍ରୁତ ଗତିରେ ଯାଇଥିବା ବେଳେ ଭାଚୁ ମଧ୍ୟ ତାଙ୍କ ପଛରେ କାର୍‌ ଚଳାଇଥିଲେ।

୪୦ କିଲୋମିଟର ପ୍ରତି ଘଣ୍ଟା ବେଗ ସୀମା ଥିବା ରାସ୍ତାରେ ଭାଚୁଙ୍କ କାର୍‌ର ବେଗ ପ୍ରାୟ ୯୦ କିଲୋମିଟର ପ୍ରତି ଘଣ୍ଟା ଥିଲା।

ଏହି ସମୟରେ କାର୍‌ଟି ରାସ୍ତା କଡ଼ରେ ଥିବା ଏକ କର୍ବ୍‌ରେ ଧକ୍କା ହୋଇ ନିୟନ୍ତ୍ରଣ ହରାଇଥିଲା ଏବଂ ଫୁଟ୍‌ପାଥ୍‌ ଉପରକୁ ମାଡ଼ିଯାଇଥିଲା।

Advertisment ତେବେ ତଦନ୍ତ ସମୟରେ ଭାଚୁ ୨୦୨୪ ଜୁନ୍‌ରେ ବିପଜ୍ଜନକ ଗାଡ଼ି ଚାଳନା ଯୋଗୁଁ ଦୁଇ ଜଣଙ୍କ ମୃତ୍ୟୁ ଘଟାଇଥିବା ଅଭିଯୋଗ ସ୍ୱୀକାର କରିଥିଲେ।

ତାଙ୍କୁ ୧୨ ବର୍ଷ ଜେଲ୍‌ ଦଣ୍ଡ ମିଳିଛି।

ଅନ୍ୟପକ୍ଷରେ, ରିୟାତ୍‌ ନିଜ ଦାୟିତ୍ୱକୁ ଅସ୍ୱୀକାର କରିଥିଲେ।

କିନ୍ତୁ ରେସିଂରେ ସାମିଲ ଥିବାରୁ ତାଙ୍କୁ ଦୋଷୀ ସାବ୍ୟସ୍ତ କରାଯାଇଥିଲା।

ତାଙ୍କୁ ୧୬ ବର୍ଷ ଜେଲ୍ ଦଣ୍ଡ ମିଳିଛି।