AI Without Job Loss: କରୋନାରୁ AI ଯାଏଁ ସଙ୍କଟ; ୧୦୧ ବର୍ଷ ଭିତରେ ଏହି କମ୍ପାନୀରୁ ଜଣେ ବି ଛଟେଇ ହୋଇ ନାହାନ୍ତି

ବିଶ୍ୱର ବଡ଼ ବଡ଼ କମ୍ପାନୀ ଛଟେଇ କରୁଥିବା ବେଳେ ୧୦୧ ବର୍ଷ ପୁରୁଣା ଆମେରିକୀୟ କମ୍ପାନୀ 'ଟୋରାନି' କର୍ମଚାରୀଙ୍କ ଚାକିରି ସୁରକ୍ଷାକୁ ପ୍ରାଥମ୍ୟ ଦେଇ ଚର୍ଚ୍ଚାରେ ରହିଛି।

କରୋନା, ଋଣ ଚାପ ଓ ବିକ୍ରି ହ୍ରାସ ସତ୍ତ୍ୱେ କମ୍ପାନୀ ଛଟେଇ ବଦଳରେ ଅନ୍ୟ ଖର୍ଚ୍ଚ କମାଇଥିଲା।

ଏବେ AIକୁ ମଧ୍ୟ କର୍ମଚାରୀଙ୍କ ବିକଳ୍ପ ଭାବେ ନୁହେଁ, ସେମାନଙ୍କ ଉତ୍ପାଦକତା ବଢ଼ାଇବାର ମାଧ୍ୟମ ଭାବେ ବ୍ୟବହାର କରୁଛି।

Advertisment ମାନ୍ଦା, AI ଓ ଛଟେଇକୁ ନେଇ ସାରା ବିଶ୍ୱର କର୍ପୋରେଟ୍ ଜଗତରେ ଚିନ୍ତା ବଢ଼ୁଥିବା ସମୟରେ 'ଟୋରାନି'ର କାହାଣୀ ଏବେ ଚର୍ଚ୍ଚାରେ।

କମ୍ପାନୀ ଦାବି କରୁଛି ଯେ, ଦୀର୍ଘ ଇତିହାସରେ ଆର୍ଥିକ ସଙ୍କଟକୁ କାରଣ କରି କର୍ମଚାରୀ ଛଟେଇ କରିବାର ରାସ୍ତା ସେମାନେ ବାଛିନାହାନ୍ତି।

କାହିଁକି କର୍ମଚାରୀଙ୍କୁ ଛଟେଇ କରେନି ଟୋରାନି?

ଟୋରାନି ସିଇଓ ମେଲାନି ଡୁଲବେକୋଙ୍କ ମତରେ, ଆର୍ଥିକ ମାନ୍ଦା ଅବସ୍ଥା ଆସିଲେ କର୍ମଚାରୀଙ୍କୁ ବାହାର କରିବା ଏକମାତ୍ର ସମାଧାନ ନୁହେଁ।

ଏହା ଅନେକ ସମୟରେ କମ୍ପାନୀର ଏକ ପରିଚାଳନାଗତ ନିଷ୍ପତ୍ତି।

Advertisment ତାଙ୍କ ମତରେ— ଅଭିଜ୍ଞ କର୍ମଚାରୀ କମ୍ପାନୀର ସବୁଠୁ ବଡ଼ ସମ୍ପଦ।

ସଙ୍କଟ ସମୟରେ କର୍ମଚାରୀଙ୍କୁ ଧରିରଖିଲେ ପୁନରୁଦ୍ଧାର ଶୀଘ୍ର ହୋଇପାରେ।

ଛଟେଇ ପରେ ନୂଆ ନିଯୁକ୍ତି ଓ ପ୍ରଶିକ୍ଷଣରେ ଅଧିକ ଖର୍ଚ୍ଚ ହୁଏ।

କର୍ମଚାରୀଙ୍କ ଭରସା କମ୍ପାନୀର ଦୀର୍ଘମିଆଦି ବୃଦ୍ଧିରେ ସାହାଯ୍ୟ କରେ।

କରୋନା ସମୟରେ ଆସିଥିଲା ସବୁଠୁ ବଡ଼ ସଙ୍କଟ ୨୦୨୦ରେ କରୋନା ମହାମାରୀ ଟୋରାନି ପାଇଁ ବଡ଼ ପରୀକ୍ଷା ନେଇଆସିଥିଲା।

ଲକଡାଉନ୍ ଯୋଗୁଁ କାଫେ, ରେଷ୍ଟୁରାଣ୍ଟ ଓ ହୋଟେଲ୍ ବନ୍ଦ ହୋଇଯିବାରୁ କମ୍ପାନୀର ସିରପ୍ ବିକ୍ରି ହଠାତ୍ କମିଯାଇଥିଲା।

ଏହା ସହିତ ନୂଆ କାରଖାନା ନିର୍ମାଣ ପାଇଁ କମ୍ପାନୀ ଉପରେ ଋଣ ଚାପ ମଧ୍ୟ ଥିଲା।

ତଥାପି କର୍ମଚାରୀଙ୍କ ଦରମା କମାଇବା କିମ୍ବା ଛଟେଇ କରିବା ବଦଳରେ ଅନ୍ୟ ଖର୍ଚ୍ଚ କମାଇଥିଲା ଟୋରାନି।

ଚାକିରି ବଞ୍ଚାଇବାକୁ କ'ଣ କରିଥିଲା କମ୍ପାନୀ?

ମାର୍କେଟିଂ ଓ ବିଜ୍ଞାପନ ଖର୍ଚ୍ଚରେ କଟକଣା ଲଗାଇଥିଲା।

ଅନାବଶ୍ୟକ ବିଜନେସ୍ ଟ୍ରାଭେଲ୍ ବନ୍ଦ କରାଯାଇଥିଲା।

ପ୍ରତ୍ୟେକ ବିଭାଗକୁ ଅପ୍ରୟୋଜନୀୟ ଖର୍ଚ୍ଚ କମାଇବାକୁ କୁହାଯାଇଥିଲା।

କାଫେ ବନ୍ଦ ଥିବାରୁ ଅନଲାଇନ୍ ବିକ୍ରି ଉପରେ ଜୋର ଦିଆଯାଇଥିଲା।

ଗ୍ରୋସରି ଷ୍ଟୋର୍ ମାଧ୍ୟମରେ ସିଧାସଳଖ ଗ୍ରାହକଙ୍କ ପାଖକୁ ପହଞ୍ଚିବାର ରଣନୀତି ନିଆଯାଇଥିଲା।

ଏହାର ଫଳ ମଧ୍ୟ ମିଳିଥିଲା।

ଏପ୍ରିଲ ୨୦୨୦ରେ ବିକ୍ରି ପ୍ରାୟ ୨୦ ପ୍ରତିଶତ କମିଯାଇଥିଲେ ମଧ୍ୟ, ପରବର୍ତ୍ତୀ ମାସରୁ ବ୍ୟବସାୟ ଧୀରେ ଧୀରେ ସ୍ୱାଭାବିକ ଅବସ୍ଥାକୁ ଫେରିଥିଲା।

ବର୍ଷ ଶେଷରେ କମ୍ପାନୀର ଆୟ ପ୍ରାୟ ୧୫ ପ୍ରତିଶତ ବଢ଼ିଥିବା କୁହାଯାଇଛି।

କର୍ମଚାରୀ ପ୍ରଥମେ, ଲାଭ ପରେ ଟୋରାନି କର୍ମଚାରୀଙ୍କୁ କେବଳ ଶ୍ରମଶକ୍ତି ଭାବେ ନୁହେଁ, ବରଂ ଦୀର୍ଘମିଆଦି ନିବେଶ ଭାବେ ଦେଖୁଥିବା କୁହାଯାଏ।

୨୦୨୦ରେ କମ୍ପାନୀ ନିଜ କାରଖାନାକୁ ଅନ୍ୟ ସ୍ଥାନକୁ ସ୍ଥାନାନ୍ତର କରିବାବେଳେ ମଧ୍ୟ କର୍ମଚାରୀଙ୍କ ସୁବିଧାକୁ ପ୍ରାଥମ୍ୟ ଦେଇଥିଲା।

ନୂଆ ସ୍ଥାନ ଚୟନ ପୂର୍ବରୁ କର୍ମଚାରୀମାନଙ୍କ ଘରର ପିନ୍‌କୋଡ୍ ମ୍ୟାପ୍ କରାଯାଇଥିଲା, ଯାହାଦ୍ୱାରା ଯାତାୟାତରେ ଅଧିକ ସମସ୍ୟା ନହେବ।

AI ଆସିଲା, କିନ୍ତୁ ଚାକିରି ଯାଇନି ବର୍ତ୍ତମାନ ଅନେକ କମ୍ପାନୀ AI ଓ ଅଟୋମେସନ୍ ଯୋଗୁଁ ମାନବ ସମ୍ବଳ କମାଇବା ଉପରେ ଜୋର ଦେଉଛନ୍ତି।

କିନ୍ତୁ ଟୋରାନିର ନୀତି ଏଥିରେ ମଧ୍ୟ ଭିନ୍ନ।

କମ୍ପାନୀ ମାର୍କେଟ ରିସର୍ଚ୍ଚ, ସେଲ୍ସ ଓ ଅନ୍ୟାନ୍ୟ କାମରେ AI ବ୍ୟବହାର କରୁଛି।

ତେବେ ଏହାର ଉଦ୍ଦେଶ୍ୟ କର୍ମଚାରୀଙ୍କୁ ବଦଳାଇବା ନୁହେଁ।

ବରଂ କାମକୁ ସହଜ କରିବା, ଶୀଘ୍ର ନିଷ୍ପତ୍ତି ନେବା ଓ ଉତ୍ପାଦକତା ବଢ଼ାଇବା ପାଇଁ AIକୁ ବ୍ୟବହାର କରାଯାଉଛି।

ବୃଦ୍ଧିର ପଛରେ କର୍ମଚାରୀଙ୍କ ଭରସା?

ଟୋରାନି ଗତ କିଛି ଦଶନ୍ଧି ଧରି ନିରନ୍ତର ବୃଦ୍ଧି କରୁଥିବା କୁହାଯାଉଛି।

ଗତ ୩୫ ବର୍ଷରେ କମ୍ପାନୀ ପ୍ରାୟ ୨୦ ପ୍ରତିଶତ ବାର୍ଷିକ ବୃଦ୍ଧି ହାର ରଖିଆସିଛି।

୨୦୨୬ରେ ଏହାର ରେଭେନ୍ୟୁ ୮୦୦ ମିଲିୟନ ଡଲାର ଅତିକ୍ରମ କରିବାର ଆଶା ରହିଛି।

ମାଇକ୍ରୋସଫ୍ଟ ଭଳି ବଡ଼ କମ୍ପାନୀରେ ଛଟେଇ ଓ ସ୍ୱଇଚ୍ଛିକ ବିଦାୟ ଯୋଜନା ଚର୍ଚ୍ଚାରେ ଥିବା ସମୟରେ ଟୋରାନିର ଏହି ମଡେଲ୍ କର୍ପୋରେଟ୍ ଜଗତ ପାଇଁ ଏକ ଭିନ୍ନ ସନ୍ଦେଶ ଦେଉଛି—ଆର୍ଥିକ ସଙ୍କଟ ସମୟରେ କର୍ମଚାରୀଙ୍କୁ ଛାଡ଼ିଦେବା ହିଁ ସବୁବେଳେ ଏକମାତ୍ର ରାସ୍ତା ନୁହେଁ।