Catering Truck Helped Hide Trump’s Secret Military Aircraft Switch: ଇରାନର ହତ୍ୟା ଧମକ ପରେ... ତୁର୍କୀରେ ବିମାନ ପରିବର୍ତ୍ତନ କରିଦେଲେ ଟ୍ରମ୍ପ

ନାଟୋ ସମ୍ମିଳନୀ ପରେ ତୁର୍କୀରୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନୂଆକରି ସଜ୍ଜିତ ହୋଇଥିବା ଏବଂ କତାର ପକ୍ଷରୁ ଦାନ କରାଯାଇଥିବା ବୋଇଂ ବିମାନ ବଦଳରେ ପୁରୁଣା ଏୟାର ଫୋର୍ସ ଓ୍ୱାନ୍ ବିମାନରେ ଯାତ୍ରା କରିଥିବା ଘଟଣା ପ୍ରଥମେ ଅନେକ ପ୍ରଶ୍ନ ସୃଷ୍ଟି କରିଥିଲା।

ଏବେ ଦ ୱାଶିଂଟନ୍ ପୋଷ୍ଟର ଏକ ରିପୋର୍ଟ ଅନୁସାରେ, ଇରାନ ପକ୍ଷରୁ ହତ୍ୟା ଧମକ ମିଳିବା ପରେ ଟ୍ରମ୍ପଙ୍କୁ ତୁର୍କୀରୁ ଏକ ସାମରିକ ବିମାନରେ ଗୁପ୍ତ ଭାବେ ବାହାର କରାଯାଇଥିଲା। ଏହି ଯୋଜନାରେ ଏୟାର ଫୋର୍ସ ଓ୍ୱାନ୍‌କୁ ଏକ ଡିକଏ ବିମାନ ଭାବେ ବ୍ୟବହାର କରାଯାଇଥିଲା।

ଟ୍ରମ୍ପଙ୍କୁ ଅଙ୍କାରା ବିମାନବନ୍ଦରରେ ଗଣମାଧ୍ୟମର ସମ୍ପୂର୍ଣ୍ଣ ନଜର ସାମ୍ନାରେ ଏୟାର ଫୋର୍ସ ଓ୍ୱାନ୍‌ରେ ଚଢ଼ୁଥିବା ଦେଖାଯାଇଥିଲା। କିନ୍ତୁ ପରେ ତାଙ୍କୁ ଏକ କ୍ୟାଟରିଂ ଟ୍ରକ୍‌ରେ ବସାଇ ବିମାନବନ୍ଦର ଭିତରୁ ନେଇ ଯାଇ ଏକ ଛୋଟ C-32A ସାମରିକ ବିମାନକୁ ସ୍ଥାନାନ୍ତର କରାଯାଇଥିଲା।

ଏହି ଗୁପ୍ତ ବିମାନ ପରିବର୍ତ୍ତନର ଉଦ୍ଦେଶ୍ୟ ଥିଲା କିଛି ଘଣ୍ଟା ଧରି ଟ୍ରମ୍ପଙ୍କ ପ୍ରକୃତ ଅବସ୍ଥାନକୁ ଗୋପନ ରଖିବା। ଏପରିକି ସାମ୍ବାଦିକମାନେ ଏବଂ ହ୍ୱାଇଟ୍ ହାଉସର କିଛି କର୍ମଚାରୀ ମଧ୍ୟ ବଡ଼ ବିମାନରେ ରହି ଟ୍ରମ୍ପ ମଧ୍ୟ ସେହି ବିମାନରେ ଯାତ୍ରା କରୁଛନ୍ତି ବୋଲି ଭାବିଥିଲେ।

ଟ୍ରମ୍ପ ନୂଆକରି ସଜ୍ଜିତ ହୋଇଥିବା ଏବଂ କତାର ପକ୍ଷରୁ ଦାନ କରାଯାଇଥିବା ବୋଇଂ ୭୪୭-୮ ବିମାନରେ ତୁର୍କୀରେ ପହଞ୍ଚିଥିଲେ। ପରେ C-32A ଏବଂ ଡିକଏ ଏୟାର ଫୋର୍ସ ଓ୍ୱାନ୍ ଦୁଇଟି ବିମାନ ଟ୍ରାନ୍ଜିଟ୍ ଷ୍ଟପ୍‌ ଥିବା ବ୍ରିଟେନ୍‌ରେ ମାତ୍ର କିଛି ମିନିଟ୍‌ ବ୍ୟବଧାନରେ ପହଞ୍ଚିଥିଲେ। ଏହା ଫଳରେ ସାଧାରଣ ଲୋକଙ୍କ ସାମ୍ନାରେ ଏହି ଧାରଣା ସୃଷ୍ଟି ହୋଇଥିଲା ଯେ ଟ୍ରମ୍ପ ଡିକଏ ଏୟାର ଫୋର୍ସ ଓ୍ୱାନ୍‌ରେ ହିଁ ଯାତ୍ରା କରିଥିଲେ।

ଘଟଣା ପଛରେ କ’ଣ ଥିଲା?

ତୁର୍କୀ ଛାଡ଼ିବା ସମୟରେ ଟ୍ରମ୍ପଙ୍କ ଯାତ୍ରା ପ୍ରଥମେ ସମ୍ପୂର୍ଣ୍ଣ ସାଧାରଣ ଲାଗୁଥିଲା। ଟେଲିଭିଜନ୍ କ୍ୟାମେରାରେ ତାଙ୍କୁ ଏକ ଲିମୋଜିନ୍‌ରେ ବିମାନବନ୍ଦରରେ ପହଞ୍ଚିବା, ପରିଚିତ ନୀଳ-ଧଳା ବୋଇଂ ୭୪୭ ବିମାନର ସିଡ଼ି ଚଢ଼ିବା ଏବଂ ହାତ ହଲାଇ ବିଦାୟ ଜଣାଇବାର ଦୃଶ୍ୟ ଦେଖାଯାଇଥିଲା।

ଏହା ପୂର୍ବରୁ ହ୍ୱାଇଟ୍ ହାଉସ୍ ମଧ୍ୟ କହିଥିଲା ଯେ ଆମେରିକାର ରାଷ୍ଟ୍ରପତି ତୁର୍କୀରୁ ପୁରୁଣା ଏୟାର ଫୋର୍ସ ଓ୍ୱାନ୍ ବିମାନରେ ହିଁ ବାହାରିବେ। ଏପରିକି ୮୦ ବର୍ଷ ବୟସ୍କ ଟ୍ରମ୍ପ ନିଜେ ମଧ୍ୟ ଘୋଷଣା କରିଥିଲେ ଯେ ସେ ତୁର୍କୀ ଛାଡ଼ିବା ପାଇଁ ନୂଆ ବୋଇଂ ୭୪୭-୮ ବଦଳରେ ପୁରୁଣା ବିମାନଟିକୁ ବ୍ୟବହାର କରିବେ।