Major FSSAI Action: FSSAIର ବଡ଼ ପଦକ୍ଷେପ: ‘ଭେଜ୍ ଭୁଜିଆ ନମକିନ୍’ ଉତ୍ପାଦନ ବନ୍ଦ ନିର୍ଦ୍ଦେଶ

ଖାଦ୍ୟ ନିୟନ୍ତ୍ରକ FSSAI ପକ୍ଷରୁ କୁହାଯାଇଛି ଯେ, ଏକାଧିକ ନିୟମ ଉଲ୍ଲଂଘନ, ବିଶେଷକରି ସ୍ୱଚ୍ଛତା ସମ୍ବନ୍ଧୀୟ ତ୍ରୁଟି ମିଳିବା ପରେ CG Foods India Pvt Ltdକୁ ‘Veg Bhujia Namkeen’ ଉତ୍ପାଦନ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି।

Food Safety and Standards Authority of India (FSSAI) କହିଛି ଯେ, “ଅସୁରକ୍ଷିତ ପ୍ରକ୍ରିୟାକରଣ, ବିନା ଲାଇସେନ୍ସରେ ଭୁଜିଆ ଉତ୍ପାଦନ ଏବଂ ପ୍ୟାକେଜିଂରେ ପୂର୍ବ ତାରିଖ ବ୍ୟବହାର” ଭଳି ଅଭିଯୋଗକୁ ନେଇ CG Foods India ବିରୋଧରେ ଏନଫୋର୍ସମେଣ୍ଟ କାର୍ଯ୍ୟାନୁଷ୍ଠାନ ଆରମ୍ଭ କରାଯାଇଛି।

ନିର୍ମାଣ ପ୍ରକ୍ରିୟା ଏବଂ ସ୍ୱଚ୍ଛତା ନିୟମ ପାଳନ ଯାଞ୍ଚ କରିବା ପାଇଁ FSSAI ରାଜସ୍ଥାନର ଅଜମେର ଜିଲ୍ଲା ରୂପନଗଡ଼ରେ ଥିବା କମ୍ପାନୀର ୟୁନିଟ୍‌ରେ ଯାଞ୍ଚ କରିଥିଲା।
FSSAI ଅନୁଯାୟୀ, ଯାଞ୍ଚ ସମୟରେ ଚଟାଣରୁ ସଂଗ୍ରହ କରାଯାଇଥିବା ଭଙ୍ଗା ନୁଡୁଲ୍ସକୁ ପୁନଃ ପ୍ରକ୍ରିୟାକରଣ କରି ଭୁଜିଆ ଉତ୍ପାଦରେ ବ୍ୟବହାର କରାଯାଉଥିବା ଦେଖିବାକୁ ମିଳିଥିଲା। ଏହି ପ୍ରକ୍ରିୟାରେ ହିଟ୍ ଟ୍ରିଟମେଣ୍ଟ ମଧ୍ୟ କରାଯାଉନଥିଲା। ଏଥିସହ ପ୍ୟାକେଜିଂରେ ପୂର୍ବ ତାରିଖ ବ୍ୟବହାର କରାଯାଇଥିବା ମଧ୍ୟ ଜଣାପଡ଼ିଥିଲା।

‘Wai-Wai MaMa’ ଏବଂ ‘Wai-Wai Mama Punte’ ଭୁଜିଆ ବିନା ଲାଇସେନ୍ସରେ ଉତ୍ପାଦନ କରାଯାଉଥିବା ମଧ୍ୟ ଯାଞ୍ଚ ବେଳେ ଚିହ୍ନଟ ହୋଇଥିଲା। FSSAI କହିଛି ଯେ, ଏହା Food Safety and Standards Act, 2006ର ଧାରା 31(1)ର ସିଧାସଳଖ ଉଲ୍ଲଂଘନ।

ଯାଞ୍ଚ ବେଳେ ପରିସରରୁ ମୋଟ ୩୨,୧୦୭.୨ କିଲୋଗ୍ରାମ ଷ୍ଟକ୍ ଜବତ କରାଯାଇଛି। ଏଥିରେ ଖୋଲା ଅବସ୍ଥାରେ ଥିବା ଭଙ୍ଗା ନୁଡୁଲ୍ସ ମଧ୍ୟ ସାମିଲ ଥିଲା।
ଏହାସହ ଯାଞ୍ଚ ସମୟରେ ସ୍ୱଚ୍ଛତା ଏବଂ ଦସ୍ତାବିଜ ସମ୍ବନ୍ଧୀୟ ଏକାଧିକ ତ୍ରୁଟି ମିଳିଥିବା FSSAI କହିଛି। ବିଶେଷକରି ପୋକ ନିୟନ୍ତ୍ରଣ ସମ୍ବନ୍ଧୀୟ ରେକର୍ଡ ଠିକ୍ ନଥିବା ସହ ଖାଦ୍ୟ ସ୍ୱଚ୍ଛତା ଓ ସୁରକ୍ଷା ସମ୍ବନ୍ଧୀୟ ଅନ୍ୟାନ୍ୟ ତ୍ରୁଟି ମଧ୍ୟ ଚିହ୍ନଟ ହୋଇଛି।

ଲାବୋରେଟୋରୀ ପରୀକ୍ଷା ପାଇଁ ଖାଦ୍ୟ ନମୁନା ସଂଗ୍ରହ କରାଯାଇଛି। ଏଥିସହ ୧,୯୨୫ ବକ୍ସ ଏକ୍ସପାଏରୀ ଉତ୍ପାଦକୁ ରଖାଯାଇଛି।
FSSAI କମ୍ପାନୀ ବିରୋଧରେ କଠୋର ଆଇନଗତ ପ୍ରକ୍ରିୟା ମଧ୍ୟ ଆରମ୍ଭ କରିଛି। ଆବଶ୍ୟକ ଅନୁମୋଦନ ଓ ସୁରକ୍ଷା ବ୍ୟବସ୍ଥା ବିନା ‘Veg Bhujia Namkeen’ ଉତ୍ପାଦନ ବନ୍ଦ କରିବାକୁ ନିୟନ୍ତ୍ରକ କମ୍ପାନୀକୁ ନିର୍ଦ୍ଦେଶ ଦେଇଛି।

ଲାବୋରେଟୋରୀ ପରୀକ୍ଷା ଏବଂ ଯାଞ୍ଚରେ ମିଳିଥିବା ତଥ୍ୟ ଆଧାରରେ ଆଗକୁ ଆହୁରି କଠୋର ନିୟାମକ ପଦକ୍ଷେପ ନିଆଯିବ ବୋଲି FSSAI ଚେତାବନୀ ଦେଇଛି। ଏ ସଂପର୍କରେ ସଂପୃକ୍ତ କଂପାନୀର ପ୍ରତିକ୍ରିୟା ମିଳିପାରିନାହିଁ ।