Naturally Increase Hemoglobin: ଆପଣଙ୍କର କମୁଛି କି ହିମୋଗ୍ଲୋବିନ୍? କରନ୍ତୁନି ଅଣଦେଖା, ଡାଏଟ୍‌ରେ ରଖନ୍ତୁ ଏହି ଖାଦ୍ୟ

ମହିଳାଙ୍କ ମଧ୍ୟରେ ବାରମ୍ବାର ଦୁର୍ବଳତା, ଥକାପଣ, ମୁଣ୍ଡ ଘୁରିବା କିମ୍ବା ଶ୍ୱାସ ଫୁଲିବା ଭଳି ସମସ୍ୟା କେବେକେବେ ରକ୍ତହିନତା  ବା ଏନିମିଆ ସହ ଜଡିତ ହୋଇପାରେ। ଏନିମିଆର ଏକ ପ୍ରମୁଖ କାରଣ ହେଉଛି ଆୟରନ୍‌ର ଅଭାବ। ବିଶେଷକରି ପିରିୟଡ୍‌ସ ସମୟରେ ଅଧିକ ରକ୍ତସ୍ରାବ ହେଉଥିବା ମହିଳାଙ୍କ ଶରୀରରେ ଆୟରନ୍ କମିବାର ଆଶଙ୍କା ବଢ଼ିପାରେ।

ଆୟରନ୍ ଶରୀରରେ ହିମୋଗ୍ଲୋବିନ୍ ତିଆରିରେ ସାହାଯ୍ୟ କରେ। ହିମୋଗ୍ଲୋବିନ୍ ରକ୍ତ ମାଧ୍ୟମରେ ଶରୀରର ବିଭିନ୍ନ ଅଂଶକୁ ଅକ୍ସିଜେନ୍ ପହଞ୍ଚାଇଥାଏ। ତେଣୁ ଦୈନିକ ଡାଏଟ୍‌ରେ ଆୟରନ୍‌ଯୁକ୍ତ ଖାଦ୍ୟ ରଖିବା ଜରୁରୀ।

ମହିଳାଙ୍କ ଶରୀରରେ ଆୟରନ୍ କାହିଁକି କମେ?

ମହିଳାଙ୍କ ମଧ୍ୟରେ ଆୟରନ୍ ଅଭାବର ଅନେକ କାରଣ ଥାଇପାରେ। ପିରିୟଡ୍‌ସ ସମୟରେ ଅଧିକ ରକ୍ତସ୍ରାବ, ଗର୍ଭାବସ୍ଥାରେ ବଢ଼ୁଥିବା ଆୟରନ୍ ଆବଶ୍ୟକତା, ଡାଏଟ୍‌ରେ ପର୍ଯ୍ୟାପ୍ତ ଆୟରନ୍ ନଥିବା କିମ୍ବା ଶରୀର ଆୟରନ୍‌କୁ ଠିକ୍ ଭାବରେ ଶୋଷଣ ନ କରିପାରିବା ଏହାର କାରଣ ହୋଇପାରେ। ଦୀର୍ଘ ସମୟ ଧରି ଆୟରନ୍ କମ୍ ରହିଲେ ଥକାପଣ, ଦୁର୍ବଳତା, ମୁଣ୍ଡ ଘୁରିବା, ମୁଣ୍ଡବଥା ଓ ଶ୍ୱାସ ଫୁଲିବା ଭଳି ଲକ୍ଷଣ ଦେଖାଦେଇପାରେ।

ଆୟରନ୍ ପାଇଁ କ’ଣ ଖାଇବେ?

• ପାଳଙ୍ଗ ଓ ସବୁଜ ପତ୍ରଯୁକ୍ତ ପରିବା: ପାଳଙ୍ଗ, ସୋରିଷ ଶାଗ ଓ ଅନ୍ୟାନ୍ୟ ସବୁଜ ପତ୍ରଯୁକ୍ତ ପରିବାରେ ଆୟରନ୍ ସହ ଅନ୍ୟାନ୍ୟ ପୋଷକତତ୍ୱ ମଧ୍ୟ ଥାଏ।
• ଚଣା ଓ ରାଜମା: ଚଣା, ଛୋଲେ, ରାଜମା ଓ ଅନ୍ୟାନ୍ୟ ବିନ୍ସ ଆୟରନ୍‌ର ଭଲ ଉତ୍ସ। ଶାକାହାରୀଙ୍କ ପାଇଁ ଏଗୁଡ଼ିକ ଭଲ ବିକଳ୍ପ ହୋଇପାରେ।
• ମସୁର ଓ ଅନ୍ୟ ଡାଲି: ମସୁର, ମୁଗ ଓ ଅନ୍ୟାନ୍ୟ ଡାଲିରେ ମଧ୍ୟ ଆୟରନ୍ ରହିଛି। ସନ୍ତୁଳିତ ମାତ୍ରାରେ ଦୈନିକ ଡାଲି ଖାଇବା ଉପକାରୀ ହୋଇପାରେ।
• ରାଶି ଓ ମଞ୍ଜି ଜାତୀୟ: ରାଶି, କଖାରୁ ମଞ୍ଜି ଓ ଅନ୍ୟ କିଛି ମଞ୍ଜିରେ ମଧ୍ୟ ଆୟରନ୍ ମିଳେ। ଏଗୁଡ଼ିକୁ ସୀମିତ ମାତ୍ରାରେ ସାଲାଡ୍, ସ୍ନାକ୍ସ କିମ୍ବା ଭୋଜନ ସହ ଖାଇପାରିବେ।
• ନନ୍‌ଭେଜ୍ ଖାଉଥିବା ଲୋକଙ୍କ ପାଇଁ: ମାଂସ, ମାଛ ଓ ପୋଲ୍ଟ୍ରିରେ ଥିବା ଆୟରନ୍ ଶରୀର ସାଧାରଣତଃ ସହଜରେ ଶୋଷଣ କରିପାରେ।

କେବଳ ଡାଏଟ୍‌ରେ ସବୁବେଳେ ଠିକ୍ ହୁଏନି

ଯଦି ହିମୋଗ୍ଲୋବିନ୍ ବହୁତ କମ୍ ରହିଛି କିମ୍ବା ଗୁରୁତର ଆୟରନ୍ ଅଭାବ ରହିଛି, ତେବେ କେବଳ ଖାଦ୍ୟରେ ପରିବର୍ତ୍ତନ ପର୍ଯ୍ୟାପ୍ତ ନ ହୋଇପାରେ। ଏପରି ସ୍ଥିତିରେ ଡାକ୍ତର ରକ୍ତ ପରୀକ୍ଷା ପରେ ଆୟରନ୍ ସପ୍ଲିମେଣ୍ଟ କିମ୍ବା ଅନ୍ୟ ଚିକିତ୍ସା ପରାମର୍ଶ ଦେଇପାରନ୍ତି। ତେଣୁ ନିଜେ ନିଜେ ଆୟରନ୍ ଟାବଲେଟ୍ ଖାଇବା ଉଚିତ ନୁହେଁ।