ଜୁନାଗଡ଼ ବ୍ଲକ୍ PEO ସଂଘର ସାଧାରଣ ପରିଷଦ ବୈଠକ: ପୁନର୍ବାର ସଭାପତି ଭାବେ ଆକାଶ ସାହୁ ମନୋନୀତ
ଜୁନାଗଡ଼,୨୯।୯ (ସୁନୀଲ କୁମାର ସିଂହ): କଳାହାଣ୍ଡି ଜିଲା ଜୁନାଗଡ଼ ବ୍ଲକ୍ ସମ୍ମିଳନୀ କକ୍ଷରେ ମଙ୍ଗଳବାର ଅପରାହ୍ନରେ ସ୍ଥାନୀୟ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ (PEO) ସଂଘର ସାଧାରଣ ପରିଷଦ ବୈଠକ ଓ ନୂତନ କର୍ମକର୍ତ୍ତା ଚୟନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ପୂର୍ବତନ ସଂଘ ସଭାପତି ଆକାଶ କୁମାର ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ବ୍ଲକର ୩୪ଟି ପଞ୍ଚାୟତରେ କାର୍ଯ୍ୟରତ PEOମାନେ ଯୋଗଦେଇ ସଂଘର ବିଭିନ୍ନ ଦିଗ ଓ ଆଗାମୀ କାର୍ଯ୍ୟପନ୍ଥା ଉପରେ ବିସ୍ତୃତ ଆଲୋଚନା କରିଥିଲେ।
ଆଲୋଚନା ପରେ ସମସ୍ତଙ୍କ ସର୍ବସମ୍ମତି କ୍ରମେ ସଂଘର ନୂତନ କର୍ମକର୍ତ୍ତା କମିଟି ଗଠନ କରାଯାଇଥିଲା। ଏଥିରେ ନୂତନ ସଭାପତି ଭାବେ ପୁଣି ଥରେ ଆକାଶ କୁମାର ମନୋନୀତ ହୋଇଥିବା ବେଳେ ଉପ-ସଭାପତି ଭାବେ ଅବିନାଶ ତ୍ରିପାଠୀ, ସାଧାରଣ ସମ୍ପାଦକ ଭାବେ କୃଷ୍ଣଚନ୍ଦ୍ର ଦାଶ, କୋଷାଧ୍ୟକ୍ଷ ଭାବେ ମୃତ୍ୟୁଞ୍ଜୟ ମୁଣ୍ଡ ଏବଂ ସହ-ସାଧାରଣ ସମ୍ପାଦକ ଭାବେ ନୀଳମଣି ନାଏକ ନିର୍ବାଚିତ ହୋଇଛନ୍ତି।
ଏହା ବ୍ୟତୀତ ଗଣମାଧ୍ୟମ ସଂଯୋଜକ ଭାବେ ରମେଶ କୁମାର ମେହେର, ଗୋବର୍ଦ୍ଧନ ମଶ୍ରା, ଆଦିତ୍ୟ କୁମାର ସାହୁ, ରସିକ କୁମାର ସାହୁ ଓ ସଞ୍ଜୟ କୁମାର ପ୍ରଧାନଙ୍କୁ ଦାୟିତ୍ୱ ଦିଆଯାଇଥିବା ବେଳେ ଉପଦେଷ୍ଟା କମିଟି ସଦସ୍ୟ ଭାବେ ନରେନ୍ଦ୍ର ରାଉତ, ବିନୋଦ ବିହାରୀ ସାହୁ, ମୁକୁନ୍ଦ ଦୋରା, ଶୁଭଶ୍ରୀ ପାଣିଗ୍ରାହୀ ଓ ସଦାଶିବ ମହାରଣା ମନୋନୀତ ହୋଇଛନ୍ତି।
ନୂତନ କମିଟି ଗଠନ ପରେ ସମସ୍ତ ସଦସ୍ୟ ନବନିର୍ବାଚିତ କର୍ମକର୍ତ୍ତାମାନଙ୍କୁ ଶୁଭେଚ୍ଛା ଜଣାଇଥିଲେ। ଏହି ଅବସରରେ ନବନିର୍ବାଚିତ ସଭାପତି ସାହୁ କହିଛନ୍ତି ଯେ ସଂଘର ଏକତାକୁ ବଜାୟ ରଖି ସମସ୍ତ PEOଙ୍କ ହକ୍ ପାଇଁ ସଂଘ ଲଢ଼େଇ ଜାରି ରଖିବ ଏବଂ ବ୍ଲକ୍ ପ୍ରଶାସନ ସହ ଉତ୍ତମ ସମନ୍ୱୟ ରଖି ପଞ୍ଚାୟତଗୁଡ଼ିକର ବିକାଶ କାର୍ଯ୍ୟକୁ ଆହୁରି ତ୍ୱରାନ୍ୱିତ କରାଯିବ।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
