ବଡ଼ ଦାବି କଲେ ସୋନମ ୱାଙ୍ଗଚୁକ, କହିଲେ ପ୍ରଥମେ ଜେଲରେ ଭର୍ତ୍ତି କଲେ ଏବେ ଏନକାଉଣ୍ଟର….

ନୂଆଦିଲ୍ଲୀ,୨୫।୯: ଲଦାଖରେ ହୋଇଥିବା ହିଂସାକୁ ଗୁରୁବାର ଏକ ବର୍ଷ ପୂରିଛି । ଏହି ଅବସରରେ ଆନ୍ଦୋଳନକାରୀ ତଥା Leh Apex Body (LAB) ସହ ଜଡ଼ିତ ସୋନମ ୱାଙ୍ଗଚୁକ ସରକାର ବିରୋଧରେ ନିଜ ମତ ରଖିବା କାରଣରୁ ତାଙ୍କୁ ଏନକାଉଣ୍ଟର କରାଯାଇପାରେ ବୋଲି ଆଶଙ୍କା ପ୍ରକାଶ କରିଛନ୍ତି। ସେ ଲଦାଖ ହିଂସା ପାଇଁ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କ ଇସ୍ତଫା ମଧ୍ୟ ଦାବି କରିଛନ୍ତି।

ଗୁରୁବାର ଲେହରେ ଆୟୋଜିତ ଏକ ସଭାରେ ୱାଙ୍ଗଚୁକ କହିଛନ୍ତି ଯେ, ତାଙ୍କ ଜୀବନ ପ୍ରତି ବିପଦ ଥିବା ନେଇ ତାଙ୍କୁ ଚେତାବନୀ ମିଳିଛି । ଯଦି ତାଙ୍କ ଉପରେ କୌଣସି ଅଘଟଣ ଘଟେ ଏବଂ ଏହା ଦେଶକୁ ଜାଗ୍ରତ କରିବାରେ ସହାୟକ ହୁଏ, ତେବେ ସେ ଏଥିପାଇଁ ପ୍ରସ୍ତୁତ ବୋଲି କହିଛନ୍ତି । ୱାଙ୍ଗଚୁକ କହିଛନ୍ତି, “ଲଦାଖରେ ଯାହା ଘଟିଛି, ତାହାର ଦାୟିତ୍ୱ ସ୍ବରାଷ୍ଟ୍ରମନ୍ତ୍ରୀ ନେବା ଉଚିତ। ଅମିତ ଶାହା ଇସ୍ତଫା ଦିଅନ୍ତୁ।”

୨୦୨୫ ସେପ୍ଟେମ୍ବର ୨୪ରେ ଲଦାଖକୁ ପୂର୍ଣ୍ଣ ରାଜ୍ୟ ମାନ୍ୟତା ଏବଂ ସମ୍ବିଧାନର ଷଷ୍ଠ ଅନୁସୂଚୀ ଅଧୀନରେ ସୁରକ୍ଷା ଦାବି ନେଇ ହୋଇଥିବା ପ୍ରଦର୍ଶନ ହିଂସାତ୍ମକ ହୋଇଥିଲା। ପୋଲିସ ଗୁଳିରେ ୪ ଜଣଙ୍କ ମୃତ୍ୟୁ ହୋଇଥିବାବେଳେ ଅନେକ ଲୋକ ଆହତ ହୋଇଥିଲେ। ୱାଙ୍ଗଚୁକ ଗତବର୍ଷର ଘଟଣା ଉପରେ ହୋଇଥିବା ନ୍ୟାୟିକ ତଦନ୍ତ ରିପୋର୍ଟକୁ ଶୀଘ୍ର ସାର୍ବଜନୀନ କରିବାକୁ ଦାବି କରିଛନ୍ତି। ରିପୋର୍ଟ ପ୍ରକାଶ ନହେଲେ ପୋଲିସ ଗୁଳିକାଣ୍ଡର ତଦନ୍ତ ପାଇଁ ସ୍ୱାଧୀନ ‘ଜନ ନ୍ୟାୟାଧିକରଣ’ ଗଠନ କରାଯିବ ବୋଲି ସେ ଚେତାବନୀ ଦେଇଛନ୍ତି। ସେ ସୁରକ୍ଷାକର୍ମୀମାନେ ପ୍ରଦର୍ଶନକାରୀଙ୍କ ବିରୋଧରେ AK-47 ସମେତ ସ୍ୱୟଂଚାଳିତ ଅସ୍ତ୍ର ବ୍ୟବହାର କରିଥିବା ଅଭିଯୋଗ ମଧ୍ୟ ଆଣିଛନ୍ତି।

ହିଂସାର ପ୍ରଥମ ବର୍ଷପୂର୍ତ୍ତିରେ ଲେହ ଓ କାରଗିଲ ସମେତ ଲଦାଖର ବିଭିନ୍ନ ଅଞ୍ଚଳରେ ବନ୍ଦ ପାଳନ କରାଯାଇଥିଲା। ଦୋକାନ ଓ ବ୍ୟବସାୟିକ ପ୍ରତିଷ୍ଠାନ ବନ୍ଦ ରହିଥିବାବେଳେ ରାସ୍ତାରେ ଯାନବାହନ ଚଳାଚଳ ମଧ୍ୟ କମ୍ ରହିଥିଲା। ଏହା ପୂର୍ବରୁ ୱାଙ୍ଗଚୁକ ଲେହରେ ୨୦ କିଲୋମିଟରର ଏକ ପ୍ରତୀକାତ୍ମକ ପଦଯାତ୍ରା କରିଥିଲେ। ଲଦାଖ ପାଇଁ ରାଜ୍ୟ ମାନ୍ୟତା, ଷଷ୍ଠ ଅନୁସୂଚୀ ଅଧୀନରେ ସାମ୍ବିଧାନିକ ସୁରକ୍ଷା ଏବଂ ଗତବର୍ଷର ହିଂସାରେ ପୀଡ଼ିତଙ୍କ ପାଇଁ ନ୍ୟାୟ ଦାବି ଆନ୍ଦୋଳନର ପ୍ରମୁଖ ବିଷୟ ରହିଛି।

ଅନ୍ୟପକ୍ଷରେ, ଲଦାଖ ପୋଲିସ ୱାଙ୍ଗଚୁକଙ୍କ କିଛି ଅଭିଯୋଗକୁ ମିଥ୍ୟା, ଭିତ୍ତିହୀନ ଓ ଭ୍ରମାତ୍ମକ ବୋଲି କହିଛି। ୨୦୨୫ ହିଂସାର ମୃତକଙ୍କ ସ୍ମୃତିରେ ଆୟୋଜିତ ପ୍ରାର୍ଥନା ସଭାରେ ଯୋଗଦେବାରୁ କାହାକୁ ରୋକାଯାଇନଥିବା ପୋଲିସ କହିଛି। ଗତବର୍ଷର ହିଂସା ମାମଲାରେ ଗିରଫ/ମାମଲା ହୋଇଥିବା ୮୭ ଜଣଙ୍କ ମଧ୍ୟରୁ ୨୦ ଜଣଙ୍କ ବିରୋଧରେ ମାମଲା ପ୍ରତ୍ୟାହାର କରିବାକୁ ଲଦାଖ ପ୍ରଶାସନ ନିକଟରେ ଘୋଷଣା କରିଛି।