ମାତ୍ର ୧୬ ରନ୍‌ କରି ପ୍ଲେୟର ଅଫ ଦି ମ୍ୟାଚ୍‌ ପୁରସ୍କାର ଜିତିଲେ ଶ୍ରେୟସ ଆୟର: ଉଠିଲା ପ୍ରଶ୍ନ

ନୂଆଦିଲ୍ଲୀ,୨୩।୯: ଭାରତ ଓ ଜାପାନ ମଧ୍ୟରେ ଐତିହାସିକ ଟି-୨୦ ମ୍ୟାଚ ଶେଷରେ ଖେଳାଯାଇଛି। ଏହି ମୁକାବିଲାକୁ ନେଇ ଆରମ୍ଭରୁ ଉତ୍ସାହ ରହିଥିଲା। ହେଲେ ବର୍ଷା ଯୋଗୁ ମ୍ୟାଚ୍‌କୁ ୫-୫ ଓଭରକୁ କମାଇ ଦିଆଯିବା ପରେ ରୋମାଞ୍ଚ ଅପେକ୍ଷା ଆଣ୍ଟି-କ୍ଲାଇମାକ୍ସ ଭଳି ପରିସ୍ଥିତି ଦେଖିବାକୁ ମିଳିଥିଲା। ଭାରତ ମାତ୍ର ୩୨ ରନ କରିଥିବା ବେଳେ ଶେଷରେ ୨ ରନ୍‌ରେ ବିଜୟ ହାସଲ କରିଥିଲା।

ଏହି ମ୍ୟାଚ୍‌ରେ ପ୍ଲେୟର ଅଫ ଦି ମ୍ୟାଚ ପୁରସ୍କାର ଅଧିନାୟକ ଶ୍ରେୟସ ଆୟରଙ୍କୁ ଦିଆଯିବା ପରେ ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଛି। କିଛି ପ୍ରଶଂସକ ଏହି ନିଷ୍ପତ୍ତିକୁ ନେଇ ପ୍ରଶ୍ନ ଉଠାଇଥିବା ବେଳେ ସୋସିଆଲ ମିଡିଆରେ ମଧ୍ୟ ଏହାକୁ ନେଇ ଟ୍ରୋଲ ଦେଖିବାକୁ ମିଳିଛି। ଜାପାନର ସାନୋରେ ଖେଳାଯାଇଥିବା ଏହି ମ୍ୟାଚ୍‌ରେ ଭାରତୀୟ ବ୍ୟାଟିଂ ଆଶାନୁରୂପ ହୋଇ ନ ଥିଲା। ମାତ୍ର ୫ ଓଭରର ମ୍ୟାଚ୍‌ରେ ଟିମ ଇଣ୍ଡିଆ ୩୨ ରନ୍‌ରେ ସୀମିତ ରହିଥିଲା। ବିସ୍ଫୋରକ ବ୍ୟାଟର ଅଭିଷେକ ଶର୍ମା ପ୍ରଥମ ବଲ୍‌ରେ ହିଁ ଆଉଟ ହୋଇଥିଲେ। ଅନ୍ୟପଟେ ଈଶାନ କିଶନ ୬ଟି ବଲ ଖେଳି ମାତ୍ର ୩ ରନ କରିଥିଲେ। ଆରମ୍ଭରୁ ଭାରତ ଚାପରେ ପଡ଼ିଥିଲା।

ମାତ୍ର ୮ଟି ବଲ୍‌ରେ ଦୁଇଟି ଉଇକେଟ ହରାଇ ଭାରତର ସ୍କୋର ମାତ୍ର ୯ ରନ ଥିଲା। ଏହି ସମୟରେ କ୍ରିଜକୁ ଆସିଥିଲେ ଅଧିନାୟକ ଶ୍ରେୟସ ଆୟର। ଆୟର କ୍ରିଜକୁ ଆସିବା ପରେ ମଧ୍ୟ ଭାରତକୁ ଝଟକା ଲାଗିଥିଲା। ୧୪ ରନ୍‌ରେ ତୃତୀୟ ଉଇକେଟ ପଡ଼ିଥିଲା। ସେତେବେଳେ ମାତ୍ର ୧୫ଟି ବଲ ବାକି ଥିଲା। ଏଭଳି ସ୍ଥିତିରେ ଆୟରଙ୍କ ଉପରେ ଦଳକୁ ଲଢ଼ିବା ଭଳି ସ୍କୋର ପର୍ଯ୍ୟନ୍ତ ନେବାର ଦାୟିତ୍ୱ ଥିଲା। ଅଧିନାୟକ ମଧ୍ୟ ଏହି ଦାୟିତ୍ୱ ତୁଲାଇଥିଲେ। ସେ ୧୨ଟି ବଲ୍‌ରୁ ୧୬ ରନ କରିଥିଲେ। ଅର୍ଥାତ୍‌ ଭାରତର ମୋଟ ୩୨ ରନ୍‌ର ଅଧା ରନ ଏକାକି ଆୟର କରିଥିଲେ। ଶେଷରେ ଏହି ସ୍କୋରକୁ ଭାରତ ରକ୍ଷା କରିବାରେ ସଫଳ ହୋଇ ୨ ରନ୍‌ରେ ମ୍ୟାଚ ଜିତିଥିଲା।

ଆୟରଙ୍କୁ ପ୍ଲେୟର ଅଫ ଦି ମ୍ୟାଚ ଦିଆଯିବା ପରେ ଚର୍ଚ୍ଚାର ମୁଖ୍ୟ କାରଣ ହୋଇଛନ୍ତି ଅକ୍ଷର ପଟେଲ। ଜାପାନର ବ୍ୟାଟିଂ ଇନିଂନ୍‌ରେ ଅକ୍ଷର ଭାରତ ପାଇଁ ନିର୍ଣ୍ଣାୟକ ଭୂମିକା ନେଇଥିଲେ। ଜାପାନ ଲକ୍ଷ୍ୟ ଆଡ଼କୁ ଆଗକୁ ବଢ଼ୁଥିବା ବେଳେ ଶେଷ ଓଭରରେ ତାଙ୍କୁ ୭ ରନ ଆବଶ୍ୟକ ଥିଲା। ହେଲେ ଅକ୍ଷର ପଟେଲ ଚାପ ମଧ୍ୟରେ ଭଲ ବୋଲିଂ କରି ଜାପାନକୁ ଲକ୍ଷ୍ୟ ହାସଲ କରିବାକୁ ଦେଇ ନ ଥିଲେ। ଅକ୍ଷର ତାଙ୍କ ୨ ଓଭରରେ ମାତ୍ର ୭ ରନ ଖର୍ଚ୍ଚ କରିଥିଲେ। ତେଣୁ କିଛି ପ୍ରଶଂସକଙ୍କ ମତରେ, ମ୍ୟାଚ୍‌ର ନିର୍ଣ୍ଣାୟକ ପର୍ଯ୍ୟାୟରେ ବୋଲିଂ ପ୍ରଦର୍ଶନ ପାଇଁ ଅକ୍ଷରଙ୍କୁ ମଧ୍ୟ ପ୍ଲେୟର ଅଫ ଦି ମ୍ୟାଚ ଦିଆଯିବ ବୋଲି ଭାବୁଥିଲେ। ଏହି କାରଣରୁ ଶ୍ରେୟସ ଆୟରଙ୍କୁ ମିଳିଥିବା ପୁରସ୍କାରକୁ ନେଇ ସୋସିଆଲ ମିଡିଆରେ ଭିନ୍ନ ଭିନ୍ନ ପ୍ରତିକ୍ରିୟା ଆସୁଛି।