୫୯ ନଂ ଜାତୀୟ ରାଜପଥ ଗାଜଲବାଡି ଘାଟି ସିଲ୍, ଗୋପାଳପୁର-ରାଇପୁର ଯାତାୟାତ ବନ୍ଦ

ଦାରିଙ୍ଗବାଡି,୨୪।୯(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ଦେଇ ଯାଇଥିବା ଗୋପାଳପୁର -ରାଇପୁର ୫୯ ନଂ ଜାତୀୟ ରାଜପଥର ଗାଜଲବାଡି ଘାଟି ରାସ୍ତାକୁ ସିଲ୍ କଲା କନ୍ଧମାଳ ଜିଲା ପ୍ରଶାସନ । ଗୁରୁବାର ଅପରାହ୍ନ ଠାରୁ ସିଲ୍ କରାଯାଇଥିବା ବେଳେ ଉକ୍ତ ରାଜପଥର ଦାରିଙ୍ଗବାଡି ଦେଇ ବ୍ରହ୍ମପୁରକୁ ଯାତାୟାତ ବନ୍ଦ ରହିଛି ।

କହିରଖୁଛି କି, ଏବେ ଜିଲାରେ ପ୍ରବଳ ବର୍ଷା ଜାରି ରହିଥିବା ବେଳେ ଦାରିଙ୍ଗବାଡି ଦେଇ ଯାଇଥିବା ଗାଜଲବାଡି ଘାଟିରେ ମଧ୍ୟ ବର୍ଷା ଜାରି ରହିଛି । ପୂର୍ବରୁ ଉକ୍ତ ରାସ୍ତାରେ ଏକାଧିକ ଥର ହୁଡ଼ ହୁଡ଼ ଓ ଫାଇଲିନ ବେଳେ ଭୂସ୍ଖଳନ ହୋଇଥିବା ନଜିର ରହିଥିବାରୁ ଏବେକାର ବାଦଲ ଫଟା ବର୍ଷାରେ ଉକ୍ତ ଘାଟି ରାସ୍ତାର ପ୍ରାୟ ୧୭ କିମି ରାସ୍ତା ବିପଦ ଓ ପାହାଡ଼ରୁ ପଥର, ମାଟି ଅତଡ଼ା ଖସିବା ଆଶଙ୍କା ରହିଛି । ଏହାକୁ ଦୃଷ୍ଟିରେ ରଖି ରାଜପଥର ଉକ୍ତ ଘାଟି ରାସ୍ତାକୁ ସିଲ କରିବାକୁ କନ୍ଧମାଳ ଜିଲାପାଳ ବେଦ ଭୂଷଣ ଦାରିଙ୍ଗବାଡି ପ୍ରଶାସନକୁ ନିର୍ଦ୍ଦେଶ ଦେଇଥିଲେ ।

ନିର୍ଦ୍ଦେଶ ପାଇ ଦାରିଙ୍ଗବାଡି ବିଡ଼ିଓ ପ୍ରୀତିରଞ୍ଜନ ରଥ, ତହସିଲଦାର ଧୀରଜ ପାତ୍ର, ଏଏସଆଇ ଅର୍ଜୁନ ଶବର, ଜାତୀୟ ରାଜପଥ ବିଭାଗର କନିଷ୍ଠ ଯନ୍ତ୍ରୀ ଜଗନ୍ନାଥ ରଥ ପ୍ରମୁଖ କନ୍ଧମାଳ -ଗଞ୍ଜାମ ସୀମାନ୍ତ ବାଇମାଲା ଠାରେ ସିଲ କରିଛନ୍ତି । ପୋଲିସ ବ୍ଲାକିଂ ସ୍ଥାନରେ ଜଗିରହିଛି । ସୂଚନାଯୋଗ୍ୟଯେ, ବୁଧବାର ବିଳମ୍ବିତ ରାତିରୁ ଏକ ଭାରୀଯାନ ଉକ୍ତ ଘାଟିରେ ଦାରିଙ୍ଗବାଡି ଅଭିମୁଖେ ଆସୁଥିବା ବେଳେ ଘାଟି ବୁଲାଣିରେ ଟ୍ରକଟି ଗୋଟିଏ ସାଇଡ ଢଳି ବିପଦପୂର୍ଣ୍ଣ ଅବସ୍ଥାରେ ରହିଛି ଓ ଉକ୍ତ ଘାଟିରେ ବିଳମ୍ବିତ ରାତ୍ରିଠାରୁ ହିଁ ଗାଡି ମୋଟର ଯାତାୟାତ ବନ୍ଦ ହୋଇଯାଇଥିଲା ।