Shoe Care: ଓଦା ଜୋତାକୁ ଶୀଘ୍ର ଶୁଖାଇବା ଓ ସୁରକ୍ଷିତ ରଖିବାର ସହଜ ଉପାୟ

ବର୍ଷା ଋତୁରେ ଘରୁ ବାହାରକୁ ଯିବା ସମୟରେ ଜୋତା ଓଦା ହୋଇଯିବା ଏକ ସାଧାରଣ ସମସ୍ୟା। ଅଫିସ୍, କଲେଜ କିମ୍ବା ବଜାରକୁ ଯିବା ବେଳେ ହଠାତ୍ ବର୍ଷା ହେଲେ ଜୋତାରେ ପାଣି ପଶିଯାଏ। ଅନେକେ ଘରକୁ ଫେରିବା ପରେ ଜୋତାକୁ ସିଧାସଳଖ ଖରା, ହିଟର କିମ୍ବା ଉଚ୍ଚ ତାପମାତ୍ରାର ହେୟାର ଡ୍ରାୟର ସାମ୍ନାରେ ଶୁଖାଇବାକୁ ରଖନ୍ତି। କିନ୍ତୁ ଏହି ପଦ୍ଧତି ଜୋତାର ଆକାର, ଗୁଣବତ୍ତା ଓ ସ୍ଥାୟୀତ୍ୱକୁ କ୍ଷତି ପହଞ୍ଚାଇଥାଏ।

Sepsis: ସେପ୍‌ସିସ୍‌ କ’ଣ, ଏହାର କାରଣ, ଲକ୍ଷଣ, ବିପଦପୂର୍ଣ୍ଣ ବର୍ଗ, ଜଟିଳତା ବିଷୟରେ ଜାଣିବା....

ବିଶେଷଜ୍ଞଙ୍କ ମତରେ ଘରକୁ ଫେରିବା ମାତ୍ରେ ପ୍ରଥମେ ଜୋତାରୁ ଅତିରିକ୍ତ ପାଣି ବାହାର କରିବା ଉଚିତ। ଏଥିପାଇଁ ଜୋତାକୁ ହାଲୁକା ହଲାଇ ଏକ ଶୁଖିଲା କପଡ଼ାରେ ଭିତର ଓ ବାହାର ଅଂଶକୁ ଭଲରେ ପୋଛିଦେବେ। ଏହାପରେ ଜୋତାର ଲେସ୍‌ ଓ ଇନସୋଲ୍‌କୁ ବାହାର କରି ଅଲଗା ଭାବେ ଶୁଖାଇଲେ ଜୋତା ଶୀଘ୍ର ଶୁଖିଥାଏ।

ବେକିଂ ସୋଡ଼ା ଦୁର୍ଗନ୍ଧ ଦୂର କରେ

ଜୋତା ଭିତରେ ଅଧିକ ଆର୍ଦ୍ରତା ଥିଲେ ପୁରୁଣା ଖବରକାଗଜ କିମ୍ବା ପେପର ଟାୱେଲ ଭରି ରଖିଦେବେ। କାରଣ କାଗଜ ଆର୍ଦ୍ରତା ଶୋଷିନେଇଥାଏ। ଜୋତାକୁ ଶୁଖାଇବା ପାଇଁ ଭଲ ବାୟୁ ଚଳାଚଳ ଥିବା ସ୍ଥାନ କିମ୍ବା ପଙ୍ଖା ସାମ୍ନାରେ ରଖିବା ସବୁଠୁ ସୁରକ୍ଷିତ ଅଟେ। ସିଧାସଳଖ ଖରା, ହିଟର କିମ୍ବା ଅତ୍ୟଧିକ ତାପମାତ୍ରା ବ୍ୟବହାର କଲେ ଚମଡା ଓ ସିନ୍ଥେଟିକ୍ ଜୋତାର ଉଜ୍ଜ୍ବଳତା ନଷ୍ଟ ହେବା ସହ ଫାଟ ସୃଷ୍ଟି ହୋଇଥାଏ। ଏହାଛଡ଼ା, ନୂଆ ଜୋତା କିମ୍ବା ଇଲେକ୍ଟ୍ରୋନିକ୍ସ ସାମଗ୍ରୀ ସହ ମିଳୁଥିବା ସିଲିକା ଜେଲ୍ ପ୍ୟାକେଟ୍‌କୁ ଜୋତା ଭିତରେ ରଖିଲେ ଆର୍ଦ୍ରତା ଶୀଘ୍ର ଶୋଷି ନିଏ। ବିକଳ୍ପ ଭାବେ ଅପରିଷ୍କାର ଚାଉଳ ଭିତରେ କିଛି ଘଣ୍ଟା ଜୋତା ରଖିଲେ ମଧ୍ୟ ଆର୍ଦ୍ରତା କମିଥାଏ। ଜୋତା ସମ୍ପୂର୍ଣ୍ଣ ଶୁଖିବା ପରେ ତାହାର ଭିତରେ ଅଳ୍ପ ପରିମାଣର ବେକିଂ ସୋଡ଼ା ଛିଞ୍ଚି ରାତିସାରା ରଖିଦେଲେ ଦୁର୍ଗନ୍ଧ ଦୂର ହୋଇ ଜୋତା ସତେଜ ରହିଥାଏ। ବର୍ଷା ଋତୁରେ ନିୟମିତ ବାହାରକୁ ଯିବାକୁ ପଡ଼ୁଥିଲେ ଶୀଘ୍ର ଶୁଖୁଥିବା କିମ୍ବା ପାଣି ପ୍ରତିରୋଧୀ ଜୋତା ବ୍ୟବହାର କରିବାକୁ ଚେଷ୍ଟା କରନ୍ତୁ। ସଠିକ୍ ଯତ୍ନ ନେଲେ ଜୋତା ଦୀର୍ଘଦିନ ପର୍ଯ୍ୟନ୍ତ ବ୍ୟବହାର ଉପଯୋଗୀ ହୋଇପାରିବ।