ଇଣ୍ଡିଆ ମେଣ୍ଟ ବନାମ ବିଜେପି !

ନନ୍ଦିଘୋଷ ବ୍ୟୁରୋ:  ଇଣ୍ଡିଆ ମେଣ୍ଟ ପଦଯାତ୍ରାର କାଉଣ୍ଟରରେ ବିଜେପି ମହିଳା ମୋର୍ଚ୍ଚାର ବିକ୍ଷୋଭ। କଂଗ୍ରେସ ସାଂସଦ ପ୍ରଫେସର ଆଙ୍ଗମୋଚା ବିମଲ ଆକୋଇଜାମିଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗକୁ ନେଇ ପ୍ରତିବାଦ କରିଛି ବିଜେପି ମହିଳା ମୋର୍ଚ୍ଚା। କଂଗ୍ରେସ ଅଫିସ ଆଗରେ ବିକ୍ଷୋଭ କରିଛି ବିଜେପି ମହିଳା ମୋର୍ଚ୍ଚା। ବିଜେପି ପ୍ରଶ୍ନ କରିଛି, ରାହୁଲ ଗାନ୍ଧି କାହିଁକି ତାଙ୍କ ସାଂସଦ ବିରୋଧରେ ପଦକ୍ଷେପ ନେଉ ନାହାନ୍ତି। କଂଗ୍ରେସ ଦଳରେ କଣ ମହିଳାଙ୍କ ସମ୍ମାନ ନାହିଁ ? ସାଂସଦ ଆକୋଇଜାମିଙ୍କ ଉପରେ ଦଳୀୟ କାର୍ଯ୍ଯାନୁଷ୍ଠାନ ଦାବିରେ ଦିଲ୍ଲୀର କଂଗ୍ରେସ ମୁଖ୍ଯାଳୟ ସାମ୍ନାରେ ବିକ୍ଷୋଭ କରିଛନ୍ତି ବିଜେପି ମହିଳା ମୋର୍ଚ୍ଚାର କର୍ମୀ ଓ ବିଜେପି ସାଂସଦ। ଗୋଟିଏ ପଟେ ଦିଲ୍ଲୀରେ ସିଇସି ଜ୍ଞାନେଶ କୁମାର ଓ ଭୋଟ ଚୋରି ପ୍ରସଙ୍ଗରେ ରାହୁଲ ଗାନ୍ଧିଙ୍କ ସମେତ ଇଣ୍ଡିମେଣ୍ଟ ପଦଯାତ୍ରା କରିଥିବା ବେଳେ ବିଜେପି ସାଂସଦ ବାଂଶୁରୀ ସ୍ବରାଜଙ୍କ ନେତୃତ୍ବରେ ବିଜେପି ମହିଳା ମୋର୍ଚ୍ଚା କଂଗ୍ରେସ ଅଫିସ ଆଗରେ ନାରାବାଜି କରିଛି।

ବିଜେପି ଅଭିଯୋଗ କରିଛି ଜେଏନୟୁ ପ୍ରଫେସର ତଥା କଂଗ୍ରେସ ସାଂସଦ ଆକୋଇଜାମି ୧୧ ଜଣ ଛାତ୍ରୀଙ୍କୁ ଯୌନ ନିର୍ଯାତନା ଦେଇଛନ୍ତି, ଅସଦାଚରଣ କରିଛନ୍ତି। ଜେଏନୟୁ ବିଶ୍ବବିଦ୍ୟାଳୟ ଏହି ଘଟଣାରେ ପ୍ରଫେସର ଆକୋଇଜାମିଙ୍କୁ ବହିଷ୍କାର କରିଥିଲେ ବି କଂଗ୍ରେସ ଦଳ ସାଂସଦ ଆକୋଇଜାମିଙ୍କ ବିରୋଧରେ କିଛି ବି କାର୍ଯ୍ୟାନୁଷ୍ଠାନ ନେଇନି। କଂଗ୍ରେସର ଏହା କିପରି ମାନସିକତା ବୋଲି ପ୍ରଶ୍ନ କରିଛନ୍ତି ବାଂସୁରୀ । ସେପଟେ ପ୍ରଫେସରଙ୍କ ବିରୋଧରେ ଦିଲ୍ଲୀ ପୋଲିସ ମାମଲା ରୁଜୁ କରିଛି। ଏନେଇ ବସନ୍ତ କୁଞ୍ଜ ନର୍ଥ ଥାନାରେ ଏତଲା ଦିଆଯାଇଥିଲା।

ଗୋଟେ ପଟେ ଇଣ୍ଡି ମେଣ୍ଟ ପକ୍ଷରୁ ସିଇସିଙ୍କ ଇସ୍ତଫା ଦାବି କରି ପ୍ରତିବାଦ କରାଯାଉଥିବା ବେଳେ ଏବେ କଂଗ୍ରେସ ସାଂସଦଙ୍କ ଯୌନ ନିର୍ଯାତନା ମାମଲାକୁ ଅସ୍ତ୍ର କରି ବିଜେପି ମହିଳା ମୋର୍ଚ୍ଚା ମଧ୍ୟ ପ୍ରତିଆକ୍ରମଣ କରିଦେଇଛି । ଆଗକୁ ଏହି ପ୍ରତିବାଦ ବନାମ ପ୍ରତିବାଦ କି ମୋଡ ନେଉଛି ତାହା ଉପରେ ସମସ୍ତଙ୍କ ନଜର  ।