କାଜୁଗଛରେ ଡେରା ଜମାଇଥିଲା ୧୨ ଫୁଟର ଅହିରାଜ, ବନ କର୍ମଚାରୀଙ୍କ କଠିନ ଉଦ୍ୟମ ପରେ…
ପାଟଣା, ୧।୯ (ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ରେଞ୍ଜ ସାହାରପଡ଼ା ସେକ୍ସନ ଅଧୀନ କୁମୁଳାବାହାଳି ଗାଁ ନିକଟସ୍ଥ ଏକ କାଜୁଗଛରୁ ମଙ୍ଗଳବାର ପ୍ରାୟ ୧୨ ଫୁଟ ଲମ୍ବର ଏକ ଅହିରାଜ (କିଙ୍ଗ କୋବ୍ରା) ସାପକୁ ବନ ବିଭାଗ ସଫଳତାର ସହ ଉଦ୍ଧାର କରିଛି।
ମାଛଗଡ଼ ଗାର୍ଡ ଅଶ୍ୱିନୀ ସାହୁଙ୍କ ନେତୃତ୍ୱରେ ବନ କର୍ମଚାରୀ ଓ ପାରାଷ୍ଟାଫ୍ଙ୍କ ମିଳିତ ଉଦ୍ୟମରେ ଉଦ୍ଧାର ଅପରେସନ କରାଯାଇଥିଲା। କାଜୁଗଛରେ ସାପଟି ଥିବା ଦେଖି ସ୍ଥାନୀୟ ଲୋକେ ଆତଙ୍କିତ ହୋଇପଡ଼ିଥିଲେ ଏବଂ ବନ ବିଭାଗକୁ ଖବର ଦେଇଥିଲେ। ପରେ କଠିନ ଉଦ୍ୟମ କରି ପାରାଷ୍ଟାଫ୍ ଏମ୍ଡି ୱାସିମ୍ ସାପଟିକୁ କାବୁ କରିବାରେ ସଫଳ ହୋଇଥିଲେ।
ଉଦ୍ଧାର ପରେ ସାପଟିକୁ ପାଟଣା ରେଞ୍ଜ କାର୍ଯ୍ୟାଳୟକୁ ଅଣାଯାଇଛି। ସାପଟି ଅତ୍ୟନ୍ତ ଭୟଭୀତ ହୋଇ ସଙ୍କୁଚିତ ଅବସ୍ଥାରେ ମୁଣି ଭିତରେ ରହିଥିବାରୁ ମଙ୍ଗଳବାର ରାତିରେ ଏହାର ସଠିକ୍ ଲମ୍ବ ମାପ କରାଯାଇପାରି ନ ଥିଲା।
ବୁଧବାର ସାପଟିର ସଠିକ୍ ଲମ୍ବ ମାପ କରାଯିବା ପରେ ଅଟେଇ ସଂରକ୍ଷିତ ଜଙ୍ଗଲରେ ସୁରକ୍ଷିତ ଭାବେ ଛାଡ଼ି ଦିଆଯିବ ବୋଲି ପ୍ରୋବେସନାଲ ଆଇଏଫ୍ଏସ୍ (IFS) ଅଧିକାରୀ ଲବ୍ଧ ଜୈନ ସୂଚନା ଦେଇଛନ୍ତି। ବନ ବିଭାଗ ପକ୍ଷରୁ ସାପଟିର ପ୍ରାଥମିକ ସ୍ୱାସ୍ଥ୍ୟ ଯାଞ୍ଚ ମଧ୍ୟ କରାଯାଇଛି।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି DHARITRI - ଧରିତ୍ରୀ ଦେଖନ୍ତୁ।
