ନେପାଳ ବନ୍ୟାରେ ସାଙ୍ଘାତିକ ଲୁଟ୍! ଭାସିଆସିଲା ସିନ୍ଦୁକ, ଲୁଟିନେଲେ ୯୨.୭ ଲକ୍ଷ! ମୃତଦେହରୁ ବି ଚୋରି ହେଲା…

କାଠମାଣ୍ଡୁ, ୨୯।୮: ନେପାଳରେ ସମ୍ପ୍ରତି ଆସିଥିବା ବିନାଶକାରୀ ବନ୍ୟା ମଧ୍ୟରେ କିଛି ଚାଞ୍ଜଲ୍ୟକର ଘଟଣା ସାମ୍ନାକୁ ଆସିଛି। ବନ୍ୟା ପାଣିରେ ଭାସିଆସିଥିବା ଏକ ସେଫ୍‌ (ସିନ୍ଦୁକ)ରୁ ଟଙ୍କା ଚୋରି କରିବା ଅଭିଯୋଗରେ ନେପାଳ ପୋଲିସ ୨୯ ଜଣଙ୍କୁ ଅଟକ କରିବା ସହ ସେମାନଙ୍କ ନିକଟରୁ ମୋଟ ୯୨.୭ ଲକ୍ଷ ଟଙ୍କା (୯୨,୬୮,୫୦୫ ଟଙ୍କା) ଜବତ କରିଛି।

ମିଳିଥିବା ସୂଚନା ମୁତାବକ, ରସୁୱା ଜିଲାର ଭୋଟେକୋଶୀ ନଦୀ ବନ୍ୟାରେ ଏକ ସିନ୍ଦୁକ ଭାସିଆସି ଧାଡିଂ ଅଞ୍ଚଳର ତ୍ରିଶୂଳୀ ନଦୀ କୂଳରେ ଲାଗିଥିଲା। ଅଗଷ୍ଟ ୨୬ ତାରିଖରେ ଧାଡିଂର ଗଲ୍ଛି ଗ୍ରାମପାଳିକା ୱାର୍ଡ ନଂ-୪ ଅନ୍ତର୍ଗତ ବେଲଖୁଖୋଲା ନିକଟରୁ ଏହି ସେଫ୍‌ଟି ମିଳିଥିଲା। ଅଗଷ୍ଟ ୨୮ରେ ପୋଲିସକୁ ଖବର ମିଳିଥିଲା ଯେ ସ୍ଥାନୀୟ ଲୋକେ ଏହି ସିନ୍ଦୁକକୁ ଭାଙ୍ଗି ସେଥିରେ ଥିବା ବିପୁଳ ପରିମାଣର ଟଙ୍କା ଲୁଟି ନେଇଛନ୍ତି। ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହ ୨୯ ଜଣଙ୍କୁ ଅଟକ ରଖି ସେମାନଙ୍କ ସାମଗ୍ରୀ ଯାଞ୍ଚ କରିବାରୁ ଏହି ନଗଦ ଟଙ୍କା ଉଦ୍ଧାର ହୋଇଥିଲା। ଅଟକ ବ୍ୟକ୍ତିମାନଙ୍କ ବୟସ ୧୯ ରୁ ୪୯ ବର୍ଷ ମଧ୍ୟରେ ହୋଇଥିବା ବେଳେ ସେମାନଙ୍କ ମଧ୍ୟରୁ ଅଧିକାଂଶ ଗଲ୍ଛି-୪ ର ମାଷ୍ଟାର ଅଞ୍ଚଳର ଅଧିବାସୀ। ପୋଲିସ ବର୍ତ୍ତମାନ ଏହି ଟଙ୍କାର ପ୍ରକୃତ ଉତ୍ସ ଏବଂ ଏଥିରେ ଅନ୍ୟ କାହାର ସମ୍ପୃକ୍ତି ଅଛି କି ନାହିଁ, ସେ ନେଇ ଅଧିକ ତଦନ୍ତ ଚଳାଇଛି।

ଅନ୍ୟ ଏକ ଅମାନବୀୟ ଘଟଣାରେ, ନାରାୟଣୀ ନଦୀରେ ଭାସିଆସିଥିବା ଜଣେ ବନ୍ୟାପୀଡ଼ିତା ମହିଳାଙ୍କ ମୃତଦେହରୁ ସୁନା କାନଫୁଲ ଚୋରି କରିବା ଅଭିଯୋଗରେ ପୋଲିସ ଦୁଇ ଜଣଙ୍କୁ ଗିରଫ କରିଛି। ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହେବା ପରେ ପୋଲିସ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି, ଯେଉଁଥିରେ ଏହି ଦୁଇ ଜଣ ବନ୍ୟା ପାଣିରେ ଭାସୁଥିବା ମୃତଦେହରୁ କାନଫୁଲ ଖୋଲୁଥିବାର ଦୃଶ୍ୟ ରହିଥିଲା।

ଅନ୍ୟପଟେ ନେପାଳର ଆପଦା ପ୍ରବନ୍ଧନ ପ୍ରାଧିକରଣ ସୂଚନା ଦେଇଛି ଯେ ବନ୍ୟା ବିପର୍ଯ୍ୟୟରେ ମୃତ୍ୟୁ ସଂଖ୍ୟା ୬୨୬ କୁ ବୃଦ୍ଧି ପାଇଛି। ଏଥିସହ ନିଖୋଜ ଥିବା ଲୋକଙ୍କ ସଂଖ୍ୟାରେ ବଡ଼ ଧରଣର ବୃଦ୍ଧି ଘଟି ବର୍ତ୍ତମାନ ୨,୪୨୬ ରେ ପହଞ୍ଚିଛି। ନିଖୋଜ ଲୋକଙ୍କୁ ଉଦ୍ଧାର କରିବା ପାଇଁ ବର୍ତ୍ତମାନ ସୁଦ୍ଧା ସେନା ଓ ଉଦ୍ଧାରକାରୀ ଦଳ ପକ୍ଷରୁ ସର୍ଚ୍ଚ ଅପରେସନ୍ ଜାରି ରହିଛି।