ବିକାଶଠୁ ବହୁଦୂର କପରଗଡ଼ ଗାଁ, ଖଟିଆରେ ବୁହା ହେଉଛନ୍ତି ରୋଗୀ
ନନ୍ଦିଘୋଷ ବ୍ୟୁରୋ : ଗାଁକୁ ନାହିଁ ପକ୍କା ରାସ୍ତା। ଖଟିଆରେ ବୁହା ହେଉଛନ୍ତି ରୋଗୀ ଓ ଗର୍ଭବତୀ। ନୂଆପଡ଼ା ଜିଲ୍ଲା ଖଡ଼ିଆଳ ବ୍ଲକ କପରଗଡ଼ ଗାଁରେ ଏବେ ବି ପହଞ୍ଚିନି ବିକାଶ। ଖାଲଖମା ରାସ୍ତା ଦେଇ ଯାଆସ କରୁଛନ୍ତି ଗ୍ରାମବାସୀ। ସ୍ୱାସ୍ଥ୍ୟ ସେବା ପାଇଁ ପ୍ରାୟ ୨୦ କିମି ଦୂର ଖଡ଼ିଆଳ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଉପରେ ନିର୍ଭର କରିବାକୁ ପଡ଼ୁଛି। ଖାଲି ସେତିକି ନୁହେଁ, ଗାଁରେ ନାହିଁ ବିଦ୍ୟାଳୟ କି ଅଙ୍ଗନବାଡ଼ି କେନ୍ଦ୍ର। ସ୍ଥାନୀୟ କିରିକିଟା ପ୍ରାଥମିକ ବିଦ୍ୟାଳୟକୁ ଯିବା ପାଇଁ ପିଲାମାନଙ୍କୁ ପାହାଡ଼ିଆ ଓ ଜଙ୍ଗଲି ରାସ୍ତା ଦେଇ ଯିବାକୁ ପଡ଼ୁଛି। ଫଳରେ ଅନେକ ପିଲା ଶିକ୍ଷାରୁ ବଞ୍ଚିତ ହେଉଛନ୍ତି।
ଗାଁରେ ରାସ୍ତା ନାହିଁ, ସ୍ୱାସ୍ଥ୍ୟ ସେବା ବି ନାହିଁ। ବିଜୁଳି ଆଲୁଅ ମଧ୍ୟ ବହୁଦୂରରେ। ପାନୀୟ ଜଳ ପାଇଁ ଗାଁରେ ରହିଛି ମାତ୍ର ଗୋଟିଏ ନଳକୂପ। ଯାହା ସମୁଦ୍ରକୁ ଶଙ୍ଖେ ସଦୃଶ। କାମ ଅଭାବରୁ ଅନେକ ଲୋକ ଦାଦନ ଖଟିବାକୁ ବାହାରକୁ ଯାଉଛନ୍ତି। ନିକଟରେ ଖଡ଼ିଆଳ ବିଧାୟକ ଅଧିରାଜ ପାଣିଗ୍ରାହୀ କିଛି ପ୍ରଶାସନିକ ଅଧିକାରୀଙ୍କ ସହ ଗାଁରେ ପହଞ୍ଚି ଲୋକଙ୍କ ସମସ୍ୟା ବୁଝିଛନ୍ତି। ଖୁବଶୀଘ୍ର ଗାଁରେ ମୌଳିକ ସେବା ଯୋଗାଇ ଦିଆଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି।
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ NANDIGHOSHA TV - ନନ୍ଦିଘୋଷ ଟିଭି ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି NANDIGHOSHA TV - ନନ୍ଦିଘୋଷ ଟିଭି ଦେଖନ୍ତୁ।
