ବିଳମ୍ବିତ ରାତ୍ରିରେ ଦୁର୍ଲ୍ଲଭ ନାଲିକଲି ବେଶରେ ଦର୍ଶନ ଦେଲେ ମାଆ ମଙ୍ଗଳା

ନନ୍ଦିଘୋଷ ବ୍ୟୁରୋ: ନବରାତ୍ରର ପ୍ରଥମ ଦିନ ବିଳମ୍ବିତ ରାତ୍ରିରେ ଦୁର୍ଲ୍ଲଭ ନାଲିକଲି ବେଶରେ ଶ୍ରଦ୍ଧାଳୁଙ୍କୁ ଦର୍ଶନ ଦେଲେ ମାଆ ମଙ୍ଗଳା । ପ୍ରାଚୀ ନଦୀ ତଟର ପ୍ରସିଦ୍ଧ ଶକ୍ତିପୀଠ, ପୁରୀର ଅଧିଷ୍ଠାତ୍ରୀ ଦେବୀ କାକଟପୁର ବାସିନୀ ମାଆ ମଙ୍ଗଳାଙ୍କ ପୀଠରେ ୯ ଦିନ ବ୍ୟାପୀ ଏହି ମହାପର୍ବର ଶୁଭାରମ୍ଭ ହୋଇଛି । ପ୍ରତିପଦା ପୁଣ୍ୟ ତିଥିର ବ୍ରହ୍ମ ମୁହୂର୍ତ୍ତରୁ ମାଆଙ୍କ ପୀଠରେ ଘଣ୍ଟ, ଘଣ୍ଟା, ମୃଦଙ୍ଗ, ଶଙ୍ଖ ଧ୍ୱନୀରେ ପୂରା ପରିବେଶ ପ୍ରକମ୍ପିତ ହୋଇଥିଲା । ଭୋରୁ ମଙ୍ଗଳ ଆଳତି, ଅବକାଶ, ମଇଲମ, ବଲ୍ଲଭ ଓ ସକାଳ ଧୂପ ପରେ ସିଂହଦ୍ୱାର ଖୋଲିଥିଲା । ହଜାର ହଜାର ଶ୍ରଦ୍ଧାଳୁ ଧାଡିରେ ଠିଆ ହୋଇ ମା’ଙ୍କ ଦର୍ଶନ କରିଥିଲେ । ପ୍ରଥମ ଦିନରେ ଆକର୍ଷଣ ସାଜିଥିଲା ସନ୍ଧ୍ୟାର ମହିଷାସୂର ସନ୍ଧାନ ନୀତି । ରାତି ୯ଟାରେ ନୀତିକାନ୍ତି ପରେ ମାଆ ମଙ୍ଗଳା ସ୍ୱତନ୍ତ୍ର ବିମାନରେ ବସି ମନ୍ଦିର ସାମ୍ନାରେ ଥିବା ରତ୍ନବେଦୀକୁ ବିଜେ କରିଥିଲେ ।

ପୁରାଣ ମତେ, ମହିଷାସୂରକୁ ବଧ କରିବା ପୂର୍ବରୁ ମାଆ ଦୁର୍ଗା ତାଙ୍କୁ ସନ୍ଧାନ କରିଥାଆନ୍ତି । ଏହି ଅପୂର୍ବ ଲୀଳା ଦେଖିବାକୁ ଲକ୍ଷାଧିକ ଭକ୍ତଙ୍କ ସମାଗମ ହୋଇଥିଲା । ଏହାପରେ ଜଗମୋହନରେ ମାଆ ଦୁର୍ଗା ଓ ମାଆ ମଙ୍ଗଳାଙ୍କ ଦିବ୍ୟ ଭେଟ ନୀତି ଅନୁଷ୍ଠିତ ହୋଇଥିଲା । ଭେଟ ନୀତି ପରେ ରାତି ୧୦ଟା ପରେ ଖୋଲିଥିଲା ବେଶ କବାଟ । ବିଳମ୍ବିତ ରାତ୍ରରେ ମାଆ ନାଲିକଲି ବେଶରେ ଦର୍ଶନ ଦେଇଥିଲେ । ତେବେ ଆଜି ନବରାତ୍ରର ଦ୍ୱିତୀୟ ଦିନରେ ଦେବୀ ବ୍ରହ୍ମଚାରିଣୀ ରୂପରେ ପୂଜା ପାଉଛନ୍ତି ମାଆ ।