ବିହାରର ପର୍ଯ୍ୟଟନସ୍ଥଳୀରେ ମହିଳାଙ୍କୁ ମାଡ଼ ଏବଂ ଯୌନ ଉତ୍ପୀଡ଼ନ

ପାଟନା‌ : ବିହାରର ବାଙ୍କା ଜିଲ୍ଲାର ମନ୍ଦାର ପାହାଡ଼ ନିକଟରେ ଜଣେ ମହିଳାଙ୍କୁ କିଛି ଲୋକ ନିସ୍ତୁକ ମାଡ଼ ମାରିବା ସହ ‌ଯୌନ ଉତ୍ପୀଡ଼ନ ଦେଉଥିବାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍‌ ହେବାରେ ଲାଗିଛି। ଭାଇରାଲ୍‌ ଭିଡିଓ ଆଧାରରେ ପୁଲିସ ୬ ଜଣ ଅଜଣା ଯୁବକଙ୍କ ବିରୋଧରେ ମାମଲା ରୁଜୁ କରିଛି। ଭାଇରାଲ ଭିଡିଓରେ ଥିବା ଟାଇମ୍‌ଷ୍ଟାମ୍ପ ଅନୁସାରେ ଏହା ସେପ୍ଟେମ୍ବର ୩ରେ ରେକର୍ଡ ହୋଇଥିଲା। ଭିଡିଓରେ ଅଭିଯୁକ୍ତମାନେ ମହିଳାଙ୍କ ସହ ଅଶ୍ଳୀଳ ଆଚରଣ କରିବା ଏବଂ ଚପଲରେ ତାଙ୍କୁ ମାଡ଼ ମାରିବା ଦେଖାଯାଉଛି। ସ୍ଥାନୀୟ ଥାନାର ଭାରପ୍ରାପ୍ତ ଅଧିକାରୀଙ୍କ କହିବା ଅନୁସାରେ, ପୁଲିସର ସୋସିଆଲ ମିଡିଆ ସେଲ୍‌ ମାଧ୍ୟମରେ ସେପ୍ଟେମ୍ବର ୨୨ରେ ଏହି ଭିଡିଓ ପାଇଥିଲା। ଭିଡିଓଟି ପ୍ରସାରିତ ହେବା ପରେ ପୁଲିସ ଏହାର ସତ୍ୟତା ଯାଞ୍ଚ କରିବା ପାଇଁ ମନ୍ଦାର ପାହାଡ଼ରେ ପହଞ୍ଚିଥିଲା। ପୁଲିସ ଟିମ୍‌ ଘଟଣାସ୍ଥଳରେ ପହଞ୍ଚି ଯାଞ୍ଚ କରିବା ପରେ ଭିଡିଓରେ ଦେଖାଯାଇଥିବା ସ୍ଥାନଟି ପ୍ରକୃତରେ ମନ୍ଦାର ପାହାଡ଼ ଅଞ୍ଚଳର ବୋଲି ନିଶ୍ଚିତ କରିଥିଲା। ଅଭିଯୁକ୍ତମାନେ ଓ ଭିଡିଓରେ ଦେଖାଯାଉଥିବା ମହିଳାଙ୍କ ପରିଚୟ ଜାଣିବା ପାଇଁ ପୁଲିସ ମନ୍ଦାର ପାହାଡ଼ ଆଖପାଖରେ ଥିବା ସ୍ଥାନୀୟ ବାସିନ୍ଦା ଓ ଦୋକାନୀମାନଙ୍କୁ ପଚରାଉଚରା କରିଥିଲା। ପୁଲିସ ନିଜ ଆଡ଼ୁ ଭାରତୀୟ ନ୍ୟାୟ ସଂହିତା (ବିଏନ୍‌ଏସ୍‌) ର ଧାରା ୭୪ ରେ ଜଣେ ମହିଳାଙ୍କ ମର୍ଯ୍ୟାଦା ଭଙ୍ଗ କରିବା ଉଦ୍ଦେଶ୍ୟରେ ଅପରାଧିକ ବଳ ପ୍ରୟୋଗ, ଧାରା ୭୫ ଅଧୀନରେ ଯୌନ ଉତ୍ପୀଡ଼ନ, ଧାରା ୭୬ ଅଧୀନରେ ମହିଳାଙ୍କ ପୋଷାକ ଖୋଲିବା ଉଦ୍ଦେଶ୍ୟରେ ଅପରାଧିକ ବଳ ପ୍ରୟୋଗ ଏବଂ ଧାରା ୩(୫) ସାଧାରଣ ଉଦ୍ଦେଶ୍ୟ ଅନୁଯାୟୀ କାର୍ଯ୍ୟ କରିବା ଅଧୀନରେ ମାମଲା ରୁଜୁ କରିଛି। ସୂଚନା ପ୍ରଯୁକ୍ତି ଆଇନ, ୨୦୦୦ର ଧାରା ୬୬ଇ ଓ ୬୭ଏ ଅଧୀନରେ ମଧ୍ୟ ମାମଲା ରୁଜୁ ହୋଇଛି। ପୁଲିସ ଭାଇରାଲ ଭିଡିଓକୁ ପ୍ରମାଣ ଭାବେ ରେକର୍ଡରେ ରଖିଛି। ତଦନ୍ତରୁ ମିଳୁଥିବା ତଥ୍ୟ ଆଧାରରେ ପରବର୍ତ୍ତୀ ଆଇନଗତ ପଦକ୍ଷେପ ନିଆଯିବ ବୋଲି ପୁଲିସ କହିଛି। ବିହାରର ଜମୁଇରେ କୋଚିଂ କ୍ଲାସରୁ ଫେରୁଥିବା ଜଣେ କିଶୋର ଓ ଜଣେ କିଶୋରୀଙ୍କୁ ଏକ ଦଳ ଯୁବକ ଅଟକାଇ, ଘେରି, ପଚରାଉଚରା କରିବା ସହ ମାଡ଼ ଓ ଯୌନ ଉତ୍ପୀଡ଼ନ କରିଥିବା ଘଟଣାର କିଛି ଦିନ ପରେ ଏହି ଭିଡିଓ ସାମ୍ନାକୁ ଆସିଛି। ଅଭିଯୁକ୍ତମାନେ ନିଜେ ଏହି ଘଟଣାକୁ କ୍ୟାମେରାରେ ରେକର୍ଡ କରିଥିଲେ ଏବଂ ପରେ ଭିଡିଓଟି ଭାଇରାଲ ହୋଇଥିଲା। ଭିଡିଓରେ କିଶୋରୀଙ୍କୁ ଯୌନ ଉତ୍ପୀଡ଼ନ କରାଯାଉଥିବା ଏବଂ ତାଙ୍କ ସାଙ୍ଗ ତାଙ୍କୁ ଛାଡ଼ିଦେବା ପାଇଁ ଅଭିଯୁକ୍ତମାନଙ୍କୁ ନିବେଦନ କରୁଥିବା ଦେଖାଯାଇଥିଲା। ଏହି ଘଟଣା ସେପ୍ଟେମ୍ବର ୧୯ରେ ଘଟିଥିଲା। ସେପ୍ଟେମ୍ବର ୨୨, ମଙ୍ଗଳବାର ପୁଲିସ ଦାବି କରିଥିଲା ଯେ ଏହି ଘଟଣାର ‘ଦୁଇ ମୁଖ୍ୟ ଅଭିଯୁକ୍ତ’ ଙ୍କୁ ଧରାଯାଇଛି। ଏକ ଏନକାଉଣ୍ଟର ପରେ ଉଭୟଙ୍କୁ ହେପାଜତକୁ ନିଆଯାଇଥିଲା ଏବଂ ସେଥିରେ ସେମାନେ ଆହତ ହୋଇଥିଲେ। ଏଥିସହ ଜମୁଇ ଘଟଣାରେ ଗିରଫ କିମ୍ବା ହେପାଜତରେ ନିଆଯାଇଥିବା ଲୋକଙ୍କ ସଂଖ୍ୟା ଅତି କମରେ ୫ରେ ପହଞ୍ଚିଛି, ଯେଉଁମାନଙ୍କ ମଧ୍ୟରେ ୩ ଜଣ ନାବାଳକ ଅଛନ୍ତି।