ମହିଳା ଏସିଆ କପ୍‌: ଫାଇନାଲରେ ଭାରତ-ଶ୍ରୀଲଙ୍କା ମହାମୁକାବିଲା, ଟାଇଟଲ ପାଇଁ କିଏ ଫେଭରାଇଟ୍‌ ଜାଣନ୍ତୁ…

ଦୁବାଇ,୧୨ା୯: ମହିଳା ଟି୨୦ ଏସିଆ କପ୍‌ କ୍ରିକେଟ ଟୁର୍ନାମେଣ୍ଟର ଫାଇନାଲ ମ୍ୟାଚ୍‌ ରବିବାର ଭାରତ ଓ ଶ୍ରୀଲଙ୍କା ମଧ୍ୟରେ ଖେଳାଯିବ। ୭ ଥରର ବିଜେତା ଭାରତ ଟୁର୍ନାମେଣ୍ଟ ଇତିହାସର ସବୁଠୁ ସଫଳ ଦଳ ହୋଇଥିବା ବେଳେ ଶ୍ରୀଲଙ୍କା ଡିଫେଣ୍ଡିଂ ଚାମ୍ପିୟନ। ଏହା ଟୁର୍ନାମେଣ୍ଟର ଦଶମ ସଂସ୍କରଣ। ଉଭୟ ଦଳ ଏପର୍ଯ୍ୟନ୍ତ ଟୁର୍ନାମେଣ୍ଟରେ ଅପରାଜିତ ରହିଛନ୍ତି। ଗତ ସଂସ୍କରଣରେ ଭାରତକୁ ହରାଇ ଶ୍ରୀଲଙ୍କା ପ୍ରଥମ ଥର ପାଇଁ ଏସିଆ କପ୍‌ ଟ୍ରଫି ଉଠାଇଥିଲା। ଏହାସତ୍ତ୍ୱେ ହରମନପ୍ରୀତ କୌରଙ୍କ ନେତୃତ୍ୱାଧୀନ ଭାରତୀୟ ଦଳକୁ ମ୍ୟାଚ୍‌ ଲାଗି ଫେଭରାଇଟ୍‌ ବିବେଚନା କରାଯାଉଛି।

ଟୁର୍ନାମେଣ୍ଟରେ ଭାରତ ପାଇଁ ଦୁଇ ଓପନର ଶେଫାଳି ବର୍ମା ଓ ଦୀପ୍ତି ଶର୍ମା ବ୍ୟାଟିଂ ଭାର ସମ୍ଭାଳିଛନ୍ତି। ଶେଫାଳି ୨ ଅର୍ଦ୍ଧଶତକ ସହ ସର୍ବାଧିକ ୧୬୮ ରନ କରିଛନ୍ତି। ଦୁବାଇ ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମର ଧିମା ଓ ସ୍ପିନ-ଫ୍ରେଣ୍ଡଲି ପିଚ୍‌ରେ ତାଙ୍କ ପ୍ରଦର୍ଶନ ଖୁବ୍‌ ଭଲ ରହିଛି।

ସେହିଭଳି ଏକ ଦର୍ଶନୀୟ ଶତକ ସହ ମନ୍ଧାନା ୧୫୪ ରନ କରିଛନ୍ତି। ଏଣୁ ଭାରତ ଦୃଷ୍ଟିରୁ ଉଭୟ ବ୍ୟାଟରଙ୍କ ଉପରେ ଅନେକ କିଛି ନିର୍ଭର କରିବ। କାରଣ ମିଡିଲ ଅର୍ଡରର ସମସ୍ତ ବ୍ୟାଟର ଦ୍ରୁତ ଗତିରେ ରନ କରିବାରେ ସଂଘର୍ଷ କରୁଛନ୍ତି। ଅଧିନାୟିକା ହରମନପ୍ରୀତ, ଉଇକେଟକିପର-ବ୍ୟାଟର ରିଚା ଘୋଷ ଓ ଅଲରାଉଣ୍ଡର ଦୀପ୍ତି ଶର୍ମାଙ୍କଠାରୁ ଡେଥ୍‌ ଓଭରରେ ଯୋଗଦାନର ଆବଶ୍ୟକତା ରହିଛି। ଟୁର୍ନାମେଣ୍ଟରେ ମିଳିତ ସର୍ବାଧିକ ୧୧ ଉଇକେଟ ନେଇଥିବା ଦୀପ୍ତି ବୋଲିଂ ବିଭାଗର ନେତୃତ୍ୱ ନେବେ। ତାଙ୍କ ସହିତ ଶ୍ରୀ ଚରନି ଓ ପ୍ରେମା ରାଓ୍ବତ ଭଲ ରିଦିମ ବୋଲିଂ କରୁଛନ୍ତି।

୨୦୨୪ ସଂସ୍କରଣ ଫାଇନାଲରେ ଭାରତକୁ ୮ ଉଇକେଟରେ ହରାଇ ଚାମ୍ପିୟନ ହୋଇଥିବା ଚାମାରି ଆଥାପାଥଥୁଙ୍କ ନେତୃତ୍ୱାଧୀନ ଶ୍ରୀଲଙ୍କା ଏଥର ମଧ୍ୟ ସମାନ ଉଦ୍ଦେଶ୍ୟରେ ପଡ଼ିଆକୁ ଓହ୍ଲାଇବ। ଦଳ ଏପର୍ଯ୍ୟନ୍ତ ପ୍ରତ୍ୟେକ ବିଭାଗରେ ଭଲ ପ୍ରଦର୍ଶନ କରିଛି। ପାକିସ୍ତାନ ବିପକ୍ଷ ସେମିଫାଇନାଲରେ ୧୩୧ ରନର ଟାର୍ଗେଟ ପିଛା କରୁଥିବା ଶ୍ରୀଲଙ୍କା ଏକଦା ୭ ଓଭର ସୁଦ୍ଧା ୩୩ ରନରେ ୪ ଉଇକେଟ ହରାଇ ସଂଘର୍ଷ କରୁଥିଲା। ସଙ୍କଟ ପରିସ୍ଥିତିରେ ହର୍ଶିତା ସମରଓ୍ବିକ୍ରମା ୩୬ ଓ କଭିଶା ଦିଲହାରି ୩୩ ରନ କରି ଦଳକୁ ବିଜୟ ପଥକୁ ଆଣିଥିଲେ। ପରେ ନିଳାକ୍ଷୀ ସିଲଭା ଓ କୌଶିନି ନୁଥୟାଙ୍ଗାନା ମ୍ୟାଚ୍‌ ଫିନିଶ କରିଥିଲେ।