CJP Leaders Ashutosh and Saurabh Released: ସାତ ଦିନ ପରେ ଜେଲରୁ ମୁକୁଳିଲେ CJP ନେତା ଆଶୁତୋଷ ଓ ସୌରଭ

ଜେଲରୁ ବାହାରିଲେ CJP ନେତା। କକ୍ରୋଚ୍ ଜନତା ପାର୍ଟି ନେତା ସୌରଭ ଦାସ ଓ ଆଶୁତୋଷ ରାଙ୍କାଙ୍କୁ ୭ ଦିନ ପରେ ଜେଲରୁ ମୁକ୍ତି ମିଳିଛି। ଦିଲ୍ଲୀର ଏକ ସ୍ପେଶାଲ୍ ଏକ୍ଜିକ୍ୟୁଟିଭ୍ ମାଜିଷ୍ଟ୍ରେଟ୍ କୋର୍ଟ ସୌରଭ ଓ ଆଶୁତୋଷଙ୍କୁ ମୁକ୍ତ କରିବାକୁ ନିର୍ଦ୍ଦେଶ ଦେଇଛନ୍ତି। ଜନ୍ତର ମନ୍ତରକୁ ପ୍ରତିବାଦ ସ୍ଥଳ ତାଲିକାରୁ ବାଦ୍ ଦିଆଯାଇଥିବା ସତ୍ତ୍ୱେ ସେଠାରେ ପ୍ରବେଶ କରି ଜାତୀୟ ପତାକା ଉଡ଼ାଇବା ଅଭିଯୋଗରେ ଅକ୍ଟୋବର ୧୪ ତାରିଖରୁ ସେମାନେ ବିଚାରଭିଭାଗୀୟ ହେପାଜତରେ ଥିଲେ। ଜେଲ୍ ରୁ ବାହାରିବା ସମୟରେ ସୌରଭ ଦାସ କହିଥିଲେ, "ସତ୍ୟର ଜୟ ହୋଇଛି"। 

ସିଜେପିର ମୁଖପାତ୍ର ଥିବା ଆଶୁତୋଷ ରାଙ୍କା ଏବଂ ସୌରଭ ଦାସ ଅକ୍ଟୋବର ୧୩ ତାରିଖରେ ଜନ୍ତର ମନ୍ତରର ବନ୍ଦ ଗେଟ୍ ଚଢ଼ି ଜାତୀୟ ପତାକା ଉଡ଼ାଇବା ସହ ଏହି ସ୍ଥାନକୁ ପ୍ରତିବାଦ ସ୍ଥଳରୁ ବାଦ୍ ଦିଆଯିବା ନିଷ୍ପତ୍ତିର ବିରୋଧ କରିଥିଲେ। ଅଭିଯୋଗପକ୍ଷ ଅନୁସାରେ, ଏହି କାର୍ଯ୍ୟ ସେମାନଙ୍କ ଦ୍ୱାରା ଅକ୍ଟୋବର ୧୦ରେ ଅଟକ ହେବା ପରେ ସ୍ୱାକ୍ଷର କରାଯାଇଥିବା ଶାନ୍ତି ବଣ୍ଡ୍ ର ଉଲ୍ଲଂଘନ ଥିଲା। 

ଅକ୍ଟୋବର ୧୪ରେ ଏହି ଦୁଇ ମୁଖପାତ୍ରଙ୍କୁ ସ୍ପେଶାଲ୍ ଏକ୍ଜିକ୍ୟୁଟିଭ୍ ମାଜିଷ୍ଟ୍ରେଟ୍ ଙ୍କ ସାମ୍ନାରେ ହାଜର କରାଯାଇ ପ୍ରଥମେ ୫ ଦିନ ପାଇଁ ଜେଲ୍ ପଠାଯାଇଥିଲା। ପରେ ଗତ ସୋମବାର ଦିନ ସେମାନଙ୍କ ହେପାଜତ ଅବଧିକୁ ଆଉ ୨ ଦିନ ବୃଦ୍ଧି କରାଯାଇଥିଲା। ସିଜେପି ଅଭିଯୋଗ କରିଥିଲା ଯେ, ଦୁଇ ନେତାଙ୍କ ମୁକ୍ତିକୁ ରୋକିବା ପାଇଁ ମାମଲାକୁ ଜାଣିଶୁଣି ବିଳମ୍ବ କରାଯାଉଛି ଏବଂ ସେମାନେ ହେପାଜତ ବୃଦ୍ଧି ଆଦେଶ ବିରୋଧରେ ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ହାଇକୋର୍ଟ ବୁଧବାର ଦିନ ଏହି ଆବେଦନ ଉପରେ ଶୁଣାଣି କରି "ବଣ୍ଡ୍ ଉଲ୍ଲଂଘନ" ପ୍ରସଙ୍ଗ ଉଠାଇଥିଲେ।